ନୂଆଦିଲ୍ଲୀ: ୨୦୨୬ ମସିହାର ମେଡିସିନ୍ କ୍ଷେତ୍ରର ନୋବେଲ୍ ପୁରସ୍କାର ଘୋଷଣା ହୋଇଛି। ଚଳିତ ବର୍ଷ ଏହି ସମ୍ମାନ ପାଇଛନ୍ତି ୩ ଜଣ ବୈଜ୍ଞାନିକ—କାର୍ଲ ଡିସେରୋଥ, ପିଟର ହେଗେମାନ୍ ଏବଂ ଜର୍ଜ ନାଗେଲ୍। ଆଲୋକ ଦ୍ୱାରା ନିୟନ୍ତ୍ରିତ ଆୟନ୍ ଚ୍ୟାନେଲ୍ ଏବଂ ‘ଅପ୍ଟୋଜେନେଟିକ୍ସ’ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଆବିଷ୍କାର ପାଇଁ ସେମାନଙ୍କୁ ଏହି ସମ୍ମାନ ଦିଆଯାଇଛି।
ସରଳ ଭାଷାରେ କହିଲେ, ଅପ୍ଟୋଜେନେଟିକ୍ସ ଏଭଳି ଏକ ବୈଜ୍ଞାନିକ ପ୍ରଣାଳୀ, ଯାହା ଜରିଆରେ ଜୀବନ୍ତ ମସ୍ତିଷ୍କରେ ଥିବା ସ୍ନାୟୁ କୋଷଗୁଡ଼ିକୁ ଆଲୋକ ମାଧ୍ୟମରେ ନିୟନ୍ତ୍ରଣ କରି ସେମାନଙ୍କ କାର୍ଯ୍ୟକଳାପ ଅଧ୍ୟୟନ କରାଯାଇପାରେ। ଏହା ମସ୍ତିଷ୍କର ସ୍ନାୟୁ କୋଷ କିପରି ଆମର ସ୍ମୃତି, ଭାବନା ଏବଂ ବ୍ୟବହାରକୁ ପ୍ରଭାବିତ କରେ, ତାହା ବୁଝିବାରେ ବୈଜ୍ଞାନିକମାନଙ୍କୁ ନୂଆ ରାସ୍ତା ଦେଇଛି।
ଶୈବାଳରୁ ମିଳିଥିଲା ଗୁରୁତ୍ୱପୂର୍ଣ୍ଣ ପ୍ରୋଟିନ୍
ପିଟର ହେଗେମାନ୍ ଏବଂ ଜର୍ଜ ନାଗେଲ୍ ଏକକୋଷୀ ଶୈବାଳରେ ‘ଚ୍ୟାନେଲରୋଡୋପ୍ସିନ୍’ ନାମକ ଏକ ବିଶେଷ ପ୍ରୋଟିନ୍ ଆବିଷ୍କାର କରିଥିଲେ। ଏହି ପ୍ରୋଟିନ୍ ଆଲୋକର ପ୍ରତିକ୍ରିୟାରେ କୋଷର ଆୟନ୍ ଚ୍ୟାନେଲ୍କୁ ନିୟନ୍ତ୍ରଣ କରିପାରେ।
ପରେ କାର୍ଲ ଡିସେରୋଥ ଏହି ଆବିଷ୍କାରକୁ ସ୍ନାୟୁ କୋଷ ଉପରେ ପ୍ରୟୋଗ କରି ଆଲୋକ ମାଧ୍ୟମରେ ନ୍ୟୁରନ୍କୁ ନିୟନ୍ତ୍ରଣ କରିବାର ଉପାୟ ବିକଶିତ କରିଥିଲେ। ଏହାକୁ ଆଧୁନିକ ଅପ୍ଟୋଜେନେଟିକ୍ସର ଏକ ମୁଖ୍ୟ ଆଧାର ଭାବେ ଦେଖାଯାଏ।
କିଏ କେଉଁଠି କାମ କରୁଛନ୍ତି?
କାର୍ଲ ଡିସେରୋଥ: ୧୯୭୧ରେ ଜନ୍ମିତ ଡିସେରୋଥ ୧୯୯୮ରେ ଷ୍ଟାନଫୋର୍ଡ ୟୁନିଭର୍ସିଟିରୁ ପିଏଚ୍ଡି ଏବଂ ୨୦୦୦ରେ ଏମ୍ଡି ଡିଗ୍ରୀ ହାସଲ କରିଥିଲେ। ସେ ବର୍ତ୍ତମାନ ହାୱାର୍ଡ ହ୍ୟୁଜ୍ ମେଡିକାଲ୍ ଇନ୍ଷ୍ଟିଚ୍ୟୁଟ୍ ଏବଂ ଷ୍ଟାନଫୋର୍ଡ ୟୁନିଭର୍ସିଟି ସହ ଜଡ଼ିତ ଅଛନ୍ତି। ସେ ବାୟୋଇଞ୍ଜିନିୟରିଂ, ସାଇକିଆଟ୍ରି ଏବଂ ବିହେଭିଅରାଲ୍ ସାଇନ୍ସରେ ଅଧ୍ୟାପନା କରୁଛନ୍ତି।
ପିଟର ହେଗେମାନ୍: ୧୯୮୪ରେ ଜର୍ମାନୀର ମ୍ୟାକ୍ସ ପ୍ଲାଙ୍କ ଇନ୍ଷ୍ଟିଚ୍ୟୁଟ୍ ଫର୍ ବାୟୋକେମିଷ୍ଟ୍ରିରୁ ପିଏଚ୍ଡି କରିଥିଲେ। ବର୍ତ୍ତମାନ ସେ ହମ୍ବୋଲ୍ଟ ୟୁନିଭର୍ସିଟି ଅଫ୍ ବର୍ଲିନ୍ରେ ନ୍ୟୁରୋସାଇନ୍ସର ହର୍ଟି ସିନିୟର ପ୍ରଫେସର ଅଛନ୍ତି।
ଜର୍ଜ ନାଗେଲ୍: ୧୯୫୩ରେ ଜନ୍ମିତ ନାଗେଲ୍ ୧୯୮୮ରେ ଜର୍ମାନୀର ଫ୍ରାଙ୍କଫର୍ଟ ୟୁନିଭର୍ସିଟିରୁ ପିଏଚ୍ଡି ହାସଲ କରିଥିଲେ। ସେ ବର୍ତ୍ତମାନ ୟୁନିଭର୍ସିଟି ଅଫ୍ ୱୁର୍ଜବର୍ଗର ମଲିକ୍ୟୁଲାର ପ୍ଲାଣ୍ଟ ଫିଜିଓଲୋଜି ବିଭାଗରେ ପ୍ରଫେସର ଅଛନ୍ତି।
କେତେ ଟଙ୍କାର ନୋବେଲ୍ ପୁରସ୍କାର?
ମେଡିସିନ୍ ନୋବେଲ୍ ପୁରସ୍କାରର ମୋଟ ପୁରସ୍କାର ରାଶି ୧.୨ କୋଟି ସ୍ୱିଡିଶ୍ କ୍ରୋନର୍। ଏହି ରାଶି ୩ ଜଣ ବିଜେତାଙ୍କ ମଧ୍ୟରେ ସମାନ ଭାବେ ବଣ୍ଟନ କରାଯିବ।
ଷ୍ଟକହୋମ୍ସ୍ଥିତ କାରୋଲିନ୍ସ୍କା ଇନ୍ଷ୍ଟିଚ୍ୟୁଟ୍ରେ ମେଡିସିନ୍ ନୋବେଲ୍ର ଘୋଷଣା ହୋଇଛି। ଏହା ସହିତ ଆରମ୍ଭ ହୋଇଛି ଚଳିତ ବର୍ଷର ନୋବେଲ୍ ସପ୍ତାହ। ମେଡିସିନ୍ କ୍ଷେତ୍ରରେ ନୋବେଲ୍ ପୁରସ୍କାର ପ୍ରଦାନ କରୁଥିବା ନୋବେଲ୍ ଆସେମ୍ବଲି କାରୋଲିନ୍ସ୍କା ଇନ୍ଷ୍ଟିଚ୍ୟୁଟ୍ ସହ ଜଡ଼ିତ ରହିଛି।
