କଳାର କୌଣସି ସୀମା ନାହିଁ। ଏହାକୁ ପୁଣିଥରେ ପ୍ରମାଣିତ କରିଛନ୍ତି ଓଡ଼ିଶାର କ୍ଷୁଦ୍ରଶିଳ୍ପୀ କେ. ବିଜୟ କୁମାର ରେଡ୍ଡୀ। ଚକ୍ର ଏକ ଛୋଟ ଖଣ୍ଡରେ ମାତ୍ର ୧ ସେଣ୍ଟିମିଟର ଉଚ୍ଚତାରେ BRICS ଦେଶଗୁଡ଼ିକର ନେତାଙ୍କ ପ୍ରତିକୃତି ତିଆରି କରି ସେ ନିଜର ଅସାଧାରଣ କଳା ପ୍ରତିଭାର ପରିଚୟ ଦେଇଛନ୍ତି। ବ୍ରାଜିଲ, ରୁଷିଆ, ଭାରତ, ଚୀନ ଓ ଦକ୍ଷିଣ ଆଫ୍ରିକାର ନେତାମାନଙ୍କୁ ଏତେ କ୍ଷୁଦ୍ର ଆକାରରେ ଚକ୍ରେ ଉତାରିବା ସହଜ ନଥିଲା।
ଏହି ଅନନ୍ୟ କଳାକୃତିର ଆଉ ଏକ ଆକର୍ଷଣ ହେଉଛି ମାତ୍ର ୫ ମିଲିମିଟର ଆକାରର BRICS ଲୋଗୋ। ଏତେ କ୍ଷୁଦ୍ର ପରିସରରେ ନେତାମାନଙ୍କ ମୁହଁର ସୂକ୍ଷ୍ମ ଆକୃତି ଏବଂ ଲୋଗୋର ଗଠନକୁ ସଠିକ୍ ଭାବେ ତିଆରି କରିବା ପାଇଁ ବିଜୟଙ୍କୁ ଦୀର୍ଘ ସମୟ ଧରି ଅତ୍ୟନ୍ତ ଏକାଗ୍ରତାର ସହ କାମ କରିବାକୁ ପଡ଼ିଛି। ତାଙ୍କ ଅନୁସାରେ, ସମଗ୍ର କଳାକୃତି ସମ୍ପୂର୍ଣ୍ଣ କରିବାକୁ ପ୍ରାୟ ଏକ ମାସର ନିରନ୍ତର ପରିଶ୍ରମ ଲାଗିଛି।
ପେସାରେ ବିଜୟ କୁମାର ରେଡ୍ଡୀ ଜଣେ ଇଲେକ୍ଟ୍ରିକାଲ ଇଞ୍ଜିନିୟର। ସେ ଟାଟା ପାୱାରରେ କାର୍ଯ୍ୟରତ ଥିବା ସତ୍ତ୍ୱେ କ୍ଷୁଦ୍ରକଳା ପ୍ରତି ନିଜର ଆଗ୍ରହକୁ ଜାରି ରଖିଛନ୍ତି। ତାଙ୍କର ଅସାଧାରଣ କଳାକୃତି ପାଇଁ ସେ ଗିନିଜ୍ ୱାର୍ଲ୍ଡ ରେକର୍ଡଧାରୀ ଭାବେ ମଧ୍ୟ ସ୍ୱୀକୃତି ପାଇଛନ୍ତି। ବିଭିନ୍ନ ସରକାରୀ ସଂସ୍ଥା ଓ ଅନ୍ୟାନ୍ୟ ଅନୁଷ୍ଠାନ ମଧ୍ୟ ତାଙ୍କ କଳା ପ୍ରତିଭାକୁ ପ୍ରଶଂସା କରିଛନ୍ତି।
ବିଜୟଙ୍କ ଏହି ପ୍ରୟାସର ଉଦ୍ଦେଶ୍ୟ କେବଳ ଏକ ଅନନ୍ୟ କଳାକୃତି ତିଆରି କରିବା ନୁହେଁ। ଭାରତୀୟ କ୍ଷୁଦ୍ରକଳାକୁ ବିଶ୍ୱ ମଞ୍ଚରେ ପହଞ୍ଚାଇବା ଏବଂ କଳା ମାଧ୍ୟମରେ ବିଭିନ୍ନ ଦେଶ ମଧ୍ୟରେ ବନ୍ଧୁତ୍ୱ ଓ ସାଂସ୍କୃତିକ ସମ୍ପର୍କ ବଢ଼ାଇବା ତାଙ୍କର ଲକ୍ଷ୍ୟ।
ଏଥିପାଇଁ ସେ BRICS ସଦସ୍ୟ ଦେଶଗୁଡ଼ିକର ଦୂତାବାସକୁ ଚିଠି ଲେଖି ନିଜ କଳାକୃତି ବିଷୟରେ ଜଣାଇଥିଲେ। ଏହାର ଉତ୍ତରରେ ଦକ୍ଷିଣ ଆଫ୍ରିକା ହାଇ କମିଶନ ପକ୍ଷରୁ ତାଙ୍କୁ ଏକ ଅଧିକାରିକ ପତ୍ର ମିଳିଛି। ଗିନିଜ୍ ୱାର୍ଲ୍ଡ ରେକର୍ଡ ହାସଲ ପାଇଁ ତାଙ୍କୁ ଅଭିନନ୍ଦନ ଜଣାଇବା ସହ କ୍ଷୁଦ୍ରକଳାରେ ତାଙ୍କ ପ୍ରତିଭାକୁ ହାଇ କମିଶନ ପ୍ରଶଂସା କରିଛି।
ଏଥିସହ BRICS ଲୋଗୋ ଏବଂ BRICS ନେତାଙ୍କ କ୍ଷୁଦ୍ର ଚକ୍ ପ୍ରତିକୃତି ପ୍ରସ୍ତୁତ କରି ଦକ୍ଷିଣ ଆଫ୍ରିକା ହାଇ କମିଶନକୁ ପଠାଇବା ପାଇଁ ମଧ୍ୟ ବିଜୟଙ୍କୁ ଅନୁରୋଧ କରାଯାଇଛି।
ବିଜୟଙ୍କ ଏହି ପ୍ରୟାସ ଭାରତୀୟ କଳାର ଏକ ନିଆରା ରୂପକୁ ବିଶ୍ୱ ସମ୍ମୁଖରେ ଉପସ୍ଥାପନ କରୁଛି। ତାଙ୍କ ମତରେ, ଆକାରରେ ଛୋଟ ହେଲେ ମଧ୍ୟ କଳାର ବାର୍ତ୍ତା ବହୁତ ବଡ଼ ହୋଇପାରେ। ଭାରତୀୟ କ୍ଷୁଦ୍ରକଳାକୁ ଅନ୍ତର୍ଜାତୀୟ ସ୍ତରରେ ପହଞ୍ଚାଇବା ସହ ଦେଶଗୁଡ଼ିକ ମଧ୍ୟରେ ବନ୍ଧୁତ୍ୱ, ସଂସ୍କୃତି, ସୃଜନଶୀଳତା ଓ ସହଯୋଗର ସେତୁ ଗଢ଼ିବା ହିଁ ତାଙ୍କର ମୁଖ୍ୟ ଉଦ୍ଦେଶ୍ୟ।
