ଭାରତର ଆନିମେସନ୍, ଭିଜୁଆଲ୍ ଇଫେକ୍ଟସ୍, ଗେମିଂ ଓ କମିକ୍ସ (AVGC) କ୍ଷେତ୍ରରେ ଦକ୍ଷ ମାନବ ସମ୍ବଳ ଗଠନ ପାଇଁ ବଡ଼ ପଦକ୍ଷେପ ନିଆଯାଇଛି। ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ କ୍ରିଏଟିଭ୍ ଟେକ୍ନୋଲୋଜିଜ୍ (IICT) ଓ ନେଟଫ୍ଲିକ୍ସ ମିଳିତ ଭାବେ ୧୦୦ ଜଣ ଛାତ୍ରଛାତ୍ରୀଙ୍କ ପାଇଁ ସ୍କଲାରସିପ୍ ଘୋଷଣା କରିଛନ୍ତି। ଏଥିରେ ଶିକ୍ଷା ଖର୍ଚ୍ଚର ୮୦ ପ୍ରତିଶତ ପର୍ଯ୍ୟନ୍ତ ଆର୍ଥିକ ସହାୟତା ମିଳିବ।
ଏହି ସ୍କଲାରସିପ୍ ଅଧୀନରେ ଦୁଇଟି ଏକବର୍ଷିଆ ଡିପ୍ଲୋମା ଏବଂ ଚାରିଟି ୬ ମାସିଆ ସାର୍ଟିଫିକେଟ୍ ପ୍ରୋଗ୍ରାମ୍ ରହିଛି। ସାରା ଦେଶର ଛାତ୍ରଛାତ୍ରୀଙ୍କ ସହ କାର୍ଯ୍ୟରତ ପେଶାଦାରମାନେ ମଧ୍ୟ ଏହି ସୁଯୋଗ ପାଇପାରିବେ।
ସ୍କଲାରସିପ୍ ଅଧୀନରେ ଡିପ୍ଲୋମା ଇନ୍ ଇଣ୍ଟରଆକ୍ଟିଭ୍ କମିକ୍ସ ଆଣ୍ଡ ସିକ୍ୱେନ୍ସିଆଲ୍ ଆର୍ଟସ୍ ଓ ଡିପ୍ଲୋମା ଇନ୍ ଭିଜୁଆଲ୍ ଇଫେକ୍ଟସ୍ ମାଷ୍ଟରୀ ସହିତ ଭର୍ଚୁଆଲ୍ ଆର୍ଟ ଡିପାର୍ଟମେଣ୍ଟ କଣ୍ଟେଣ୍ଟ କ୍ରିଏସନ୍, ମିଡିଆ ଟେକ୍ ୱାର୍କଫ୍ଲୋ, ଆର୍ଟ ଅଫ୍ କ୍ୟାରେକ୍ଟର ଆନିମେସନ୍ ଏବଂ ଇ-ସ୍ପୋର୍ଟସ୍ ଆଣ୍ଡ ଗେମିଂ ମ୍ୟାନେଜମେଣ୍ଟ ଭଳି ଚାରିଟି ସାର୍ଟିଫିକେଟ୍ କୋର୍ସ ରହିଛି।
ଅଗଷ୍ଟ ୫, ୨୦୨୬ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ନେଟଫ୍ଲିକ୍ସର କୋ-ସିଇଓ ଟେଡ୍ ସାରାଣ୍ଡୋସଙ୍କ ମଧ୍ୟରେ ହୋଇଥିବା ବୈଠକ ପରେ ‘Netflix India Storytelling Initiative’ ଆରମ୍ଭ ହୋଇଛି। ବୈଠକରେ ଭାରତର ସମୃଦ୍ଧ କାହାଣୀ କହିବା ପରମ୍ପରା ଓ ବିଶାଳ କ୍ରିଏଟିଭ୍ ଟ୍ୟାଲେଣ୍ଟକୁ ବିଶ୍ୱସ୍ତରରେ ଆହୁରି ଆଗକୁ ନେବା ନେଇ ଆଲୋଚନା ହୋଇଥିଲା।
IICTର ଭିଜୁଆଲ୍ ଇଫେକ୍ଟସ୍ ମାଷ୍ଟରୀ ଓ ମିଡିଆ ଟେକ୍ ୱାର୍କଫ୍ଲୋ ପ୍ରୋଗ୍ରାମ୍ର ପାଠ୍ୟକ୍ରମକୁ ଆଧୁନିକ ଇଣ୍ଡଷ୍ଟ୍ରି ୱାର୍କଫ୍ଲୋ ଓ ଅନ୍ତର୍ଜାତୀୟ ମାନଦଣ୍ଡ ଅନୁଯାୟୀ ପ୍ରସ୍ତୁତ କରାଯାଇଛି। ନେଟଫ୍ଲିକ୍ସ ପକ୍ଷରୁ ମଧ୍ୟ ଏଥିରେ ଇନ୍ପୁଟ୍ ଦିଆଯାଇଛି।
IICT ସିଇଓ ଡ. ବିଶ୍ୱାସ ଦେଓସ୍କର କହିଛନ୍ତି, ଶିକ୍ଷା ବ୍ୟବସ୍ଥାରେ ଇଣ୍ଡଷ୍ଟ୍ରିର ଅଭିଜ୍ଞତା, ପ୍ରଫେସନାଲ୍ ୱାର୍କଫ୍ଲୋ ଓ ଆବଶ୍ୟକ ମାନଦଣ୍ଡକୁ ସାମିଲ କରାଯାଉଛି। ଶିକ୍ଷା ସହ ଆର୍ଥିକ ସହାୟତା ଯୋଡ଼ିବା ଦ୍ୱାରା ଭାରତର କ୍ରିଏଟିଭ୍ ଇଣ୍ଡଷ୍ଟ୍ରି ପାଇଁ ଏକ ଦୃଢ଼ ଟ୍ୟାଲେଣ୍ଟ ପାଇପଲାଇନ୍ ଗଠନ ହୋଇପାରିବ।
ଭାରତର AVGC-XR କ୍ଷେତ୍ରର ଜାତୀୟ ଉତ୍କର୍ଷ କେନ୍ଦ୍ର ଭାବେ IICT କାର୍ଯ୍ୟ କରୁଛି। ମୁମ୍ବାଇର NFDC କମ୍ପ୍ଲେକ୍ସରୁ ବର୍ତ୍ତମାନ ଏହା କାର୍ଯ୍ୟ କରୁଥିବା ବେଳେ ଗୋରେଗାଓଁ ଫିଲ୍ମ ସିଟିରେ ୧୦ ଏକରର ସ୍ଥାୟୀ କ୍ୟାମ୍ପସ୍ ନିର୍ମାଣ ହେଉଛି।
ଏହି ସହଯୋଗ ମାଧ୍ୟମରେ ଯୁବ ପ୍ରତିଭାଙ୍କୁ ଆର୍ଥିକ ସହାୟତା ସହ ଇଣ୍ଡଷ୍ଟ୍ରି ଆଧାରିତ ପ୍ରଶିକ୍ଷଣ ଦିଆଯାଇ ଭାରତକୁ ବିଶ୍ୱର ଏକ ପ୍ରମୁଖ କଣ୍ଟେଣ୍ଟ କ୍ରିଏସନ୍ ହବ୍ ଭାବେ ଗଢ଼ିତୋଳିବା ଦିଗରେ ପ୍ରୟାସ କରାଯାଉଛି।
