କୃତ୍ରିମ ବୁଦ୍ଧିମତା ବା AI ଦିନକୁ ଦିନ ଅଧିକ ଉନ୍ନତ ହେଉଛି। ଚାଟ୍ବଟ୍ଠାରୁ ଆରମ୍ଭ କରି ଗବେଷଣା, ତଥ୍ୟ ବିଶ୍ଳେଷଣ ଏବଂ ଜଟିଳ ସମସ୍ୟାର ସମାଧାନ ପର୍ଯ୍ୟନ୍ତ ବିଭିନ୍ନ କ୍ଷେତ୍ରରେ AIର ବ୍ୟବହାର ଦ୍ରୁତ ଗତିରେ ବଢ଼ୁଛି। ଏହା ମଧ୍ୟରେ ବିଶ୍ୱର ଧନୀ ବ୍ୟକ୍ତି ଏଲନ୍ ମସ୍କ AIକୁ ନେଇ ଏକ ବଡ଼ ଦାବି କରିଛନ୍ତି।
ଏକ ସୋସିଆଲ ମିଡିଆ ପୋଷ୍ଟର ଉତ୍ତର ଦେଇ ଏଲନ୍ ମସ୍କ କହିଛନ୍ତି ଯେ, ଆସନ୍ତା ୪ରୁ ୫ ବର୍ଷ ମଧ୍ୟରେ AI ମଣିଷଙ୍କ ସାମୂହିକ ବୁଦ୍ଧିମତାଠାରୁ ମଧ୍ୟ ଅଧିକ ସ୍ମାର୍ଟ ହୋଇପାରେ। ସେ କହିଛନ୍ତି, AIର ବିକାଶ ଯେଉଁ ଗତିରେ ଚାଲିଛି, ତାହା ଆଗାମୀ ସମୟରେ ବଡ଼ ପରିବର୍ତ୍ତନ ଆଣିପାରେ।
ଏଲନ୍ ମସ୍କ ପୂର୍ବରୁ ମଧ୍ୟ ଏଭଳି ମତ ଦେଇଥିଲେ। ତାଙ୍କ ମତରେ, ଆଗାମୀ ବର୍ଷ ମଧ୍ୟରେ ଏଭଳି AI ମଡେଲ୍ ଆସିପାରେ ଯାହା ଜଣେ ମଣିଷଙ୍କ ବୁଦ୍ଧିମତାକୁ ଅତିକ୍ରମ କରିବ। ସେହିପରି ୨୦୩୦ ସୁଦ୍ଧା Artificial Super Intelligence (ASI) ଆସିବା ଆରମ୍ଭ ହୋଇପାରେ ବୋଲି ସେ ଆଶା ପ୍ରକାଶ କରିଛନ୍ତି।
ବର୍ତ୍ତମାନ AI କ୍ଷେତ୍ରରେ ବିଶ୍ୱର ବଡ଼ ବଡ଼ କମ୍ପାନୀମାନଙ୍କ ମଧ୍ୟରେ ତୀବ୍ର ପ୍ରତିଯୋଗିତା ଚାଲିଛି। OpenAI, Google, Meta ଓ Anthropic ଭଳି କମ୍ପାନୀ ଲଗାତାର ନୂଆ ଓ ଅଧିକ ଶକ୍ତିଶାଳୀ AI ମଡେଲ୍ ବଜାରକୁ ଆଣୁଛନ୍ତି। ଏବେ AI କେବଳ ପ୍ରଶ୍ନର ଉତ୍ତର ଦେବାରେ ସୀମିତ ନାହିଁ, ବରଂ ଗବେଷଣା, ତଥ୍ୟ ବିଶ୍ଳେଷଣ ଓ ଅନେକ ଜଟିଳ କାର୍ଯ୍ୟରେ ବ୍ୟବହୃତ ହେଉଛି।
ଏହି କ୍ଷେତ୍ରରେ ବିପୁଳ ନିବେଶ ମଧ୍ୟ ହେଉଛି। ଡାଟା ସେଣ୍ଟର, କମ୍ପ୍ୟୁଟିଂ ଇନଫ୍ରାଷ୍ଟ୍ରକ୍ଚର ଏବଂ AI ଟେକ୍ନୋଲୋଜି ପାଇଁ କମ୍ପାନୀମାନେ ବହୁ ଅର୍ଥ ଖର୍ଚ୍ଚ କରୁଛନ୍ତି। ଏହା AIର ଭବିଷ୍ୟତ ବିକାଶକୁ ଆହୁରି ଦ୍ରୁତ କରିପାରେ।
ଅନ୍ୟପଟେ Google Xର ବ୍ୟବସାୟ ମୁଖ୍ୟ ମୋ ଗାୱଦାତ୍ ମଧ୍ୟ AIକୁ ନେଇ ସମାନ ମତ ପ୍ରକାଶ କରିଛନ୍ତି। ତାଙ୍କ କହିବା ଅନୁସାରେ, ବର୍ତ୍ତମାନର AI କେବଳ ଆରମ୍ଭ ମାତ୍ର। ଆସନ୍ତା ତିନି ବର୍ଷ ମଧ୍ୟରେ AI ଏତେ ଶକ୍ତିଶାଳୀ ହୋଇପାରେ ଯେ ଏହା ସମାଜର କାର୍ଯ୍ୟ ପ୍ରଣାଳୀକୁ ବଦଳାଇ ଦେବ।
ତେବେ ସେ ସତର୍କ କରି କହିଛନ୍ତି ଯେ, AI ନିଜେ ବିପଦ ନୁହେଁ। ବରଂ ବଡ଼ କମ୍ପାନୀ ଓ ସରକାରମାନେ ଏହାକୁ କିପରି ବ୍ୟବହାର କରିବେ, ତାହା ଭବିଷ୍ୟତରେ ବଡ଼ ଚ୍ୟାଲେଞ୍ଜ ହୋଇପାରେ।
AIର ଦ୍ରୁତ ବିକାଶକୁ ନେଇ ବିଶ୍ୱସ୍ତରରେ ଚର୍ଚ୍ଚା ବଢ଼ୁଥିବା ବେଳେ ଆଗାମୀ କିଛି ବର୍ଷରେ ଏହି ଟେକ୍ନୋଲୋଜି ମଣିଷର ଜୀବନଶୈଳୀ, କାର୍ଯ୍ୟ ପ୍ରଣାଳୀ ଏବଂ ସମାଜ ଉପରେ କେତେ ପ୍ରଭାବ ପକାଇବ, ତାହା ଦେଖିବାକୁ ବାକି ରହିଲା।
