ଆଜିର ସମୟରେ ଇନଷ୍ଟାଗ୍ରାମ ଦୁନିଆର ସବୁଠାରୁ ଲୋକପ୍ରିୟ ସୋସିଆଲ ମିଡିଆ ପ୍ଲାଟଫର୍ମ ମଧ୍ୟରୁ ଗୋଟିଏ। ସେଲିବ୍ରିଟିଠାରୁ ସାଧାରଣ ଲୋକ ପର୍ଯ୍ୟନ୍ତ ପ୍ରାୟ ସମସ୍ତେ ଏହି ପ୍ଲାଟଫର୍ମରେ ସକ୍ରିୟ ଅଛନ୍ତି। କିଛି ସମୟ ପୂର୍ବରୁ Instagram ନିଜର ନୂଆ Edits ଆପ୍ ଲଞ୍ଚ କରିଥିଲା। ଏବେ କମ୍ପାନୀ ଏହି ଆପ୍ରେ ଅନେକ ନୂଆ AI ଆଧାରିତ ଫିଚର ଯୋଡ଼ିଛି, ଯାହା ଭିଡିଓ ଏଡିଟିଂକୁ ଆହୁରି ସହଜ ଓ ଆଧୁନିକ କରିବ।
ନୂଆ ଅପଡେଟ୍ ସହ କମ୍ପାନୀ କିଛି କ୍ରିଏଟିଭ୍ ଟୁଲ୍ ମଧ୍ୟ ଯୋଡ଼ିଛି। ଏହାର ସାହାଯ୍ୟରେ ୟୁଜରମାନେ ଏବେ ସହଜରେ ଭିଡିଓ ଟେମ୍ପଲେଟ୍ରେ Overlay ଯୋଡ଼ିପାରିବେ। ସେହିପରି ନିଜର କୌଣସି ଭିଡିଓକୁ ଲକ୍ କରି ରଖିବାର ସୁବିଧା ମଧ୍ୟ ମିଳିବ।
ଏହା ସହିତ ଆପ୍ରେ Seasonal Sound Effects ନାମରେ ଏକ ନୂଆ ଫିଚର ମଧ୍ୟ ଆସିଛି। ଏହା ମାଧ୍ୟମରେ ୟୁଜରମାନେ ଋତୁ ଅନୁଯାୟୀ ବିଭିନ୍ନ ଅଡିଓ ଇଫେକ୍ଟ ବ୍ୟବହାର କରିପାରିବେ। ବର୍ତ୍ତମାନ ଗ୍ରୀଷ୍ମ ଋତୁ ସହ ଜଡିତ ଅନେକ ସାଉଣ୍ଡ ଇଫେକ୍ଟ ଏଥିରେ ଉପଲବ୍ଧ କରାଯାଇଛି।
ଏହି ଅପଡେଟ୍ର ସବୁଠାରୁ ବଡ଼ ବିଶେଷତା ହେଉଛି Bilingual Captions ଫିଚର। ଏହାର ସାହାଯ୍ୟରେ ଭିଡିଓର କ୍ୟାପ୍ସନ୍ ସ୍ୱୟଂଚାଳିତ ଭାବେ ଆଉ ଏକ ଭାଷାରେ ମଧ୍ୟ ଦେଖାଯିବ। ଏଥିପାଇଁ ଆଉ କୌଣସି ଅଲଗା ଟ୍ରାନ୍ସଲେସନ୍ ଆପ୍ ବ୍ୟବହାର କରିବାର ଆବଶ୍ୟକ ପଡ଼ିବ ନାହିଁ।
କମ୍ପାନୀ ବର୍ତ୍ତମାନ ଏହି ସୁବିଧାକୁ ୧୫ଟି ଭାଷାରେ ଉପଲବ୍ଧ କରାଇଛି। ଏଥିରେ ଇଂରାଜୀ, ହିନ୍ଦୀ, ପର୍ତ୍ତୁଗୀଜ୍, ସ୍ପାନିଶ୍, ଜର୍ମାନ୍, ଫ୍ରେଞ୍ଚ, କୋରିଆନ୍, ଜାପାନୀ, ଇଟାଲିଆନ୍, ଥାଇ, ରୁଷିଆନ୍, ଇଣ୍ଡୋନେସିଆନ୍, ଗୁଜରାଟୀ, ବଙ୍ଗଳା ଓ କନ୍ନଡ଼ ଭଳି ଭାଷା ସାମିଲ ରହିଛି।
Meta ପକ୍ଷରୁ Edits ଆପ୍କୁ ଗତବର୍ଷ ଲଞ୍ଚ କରାଯାଇଥିଲା। ଏହି ଆପ୍ରେ ୟୁଜରମାନେ ଭିଡିଓ ରେକର୍ଡ କରିପାରିବେ, ଫ୍ରେମ୍-ଲେଭେଲ୍ ପର୍ଯ୍ୟନ୍ତ ସଠିକ୍ ଏଡିଟିଂ କରିପାରିବେ ଏବଂ କୌଣସି ୱାଟରମାର୍କ ବିନା ୪କେ (4K) କ୍ୱାଲିଟିର ୧୦ ମିନିଟ୍ ପର୍ଯ୍ୟନ୍ତ ଭିଡିଓ ମାଗଣାରେ ଏକ୍ସପୋର୍ଟ କରିପାରିବେ।
ସୂଚନା ଅନୁସାରେ, Instagram ଖୁବଶୀଘ୍ର Edits ଆପ୍ର ଡେସ୍କଟପ୍ ଭର୍ସନ୍ ମଧ୍ୟ ଲଞ୍ଚ କରିପାରେ। ଏହା ଆସିବା ପରେ ୟୁଜରମାନେ ବଡ଼ ସ୍କ୍ରିନ୍ରେ ଭିଡିଓ ଏଡିଟିଂ କରିବାର ସୁବିଧା ପାଇବେ। ସବୁଠାରୁ ବଡ଼ କଥା ହେଲା, ମୋବାଇଲ୍ ଓ ଡେସ୍କଟପ୍ ମଧ୍ୟରେ ପ୍ରୋଜେକ୍ଟ ସ୍ୱୟଂଚାଳିତ ଭାବେ ସିଙ୍କ୍ ହୋଇଯିବ, ଯାହା ଫଳରେ ଗୋଟିଏ ଡିଭାଇସ୍ରେ ଆରମ୍ଭ କରାଯାଇଥିବା କାମକୁ ଅନ୍ୟ ଡିଭାଇସ୍ରେ ସହଜରେ ଜାରି ରଖିହେବ।
