ନୂଆଦିଲ୍ଲୀ: ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ସୁରକ୍ଷା ବ୍ୟବସ୍ଥାକୁ ଆହୁରି ମଜବୁତ କରାଯାଇଛି। ତାଙ୍କ ବିରୋଧରେ ବିଭିନ୍ନ ବିରୋଧୀ ଦଳ ଓ କର୍ମୀଙ୍କ ବିକ୍ଷୋଭ ଜାରି ରହିଥିବା ବେଳେ ସୁରକ୍ଷା ସମ୍ପର୍କିତ ଗୁଇନ୍ଦା ଇନପୁଟ୍କୁ ଆଧାର କରି ଏହି ପଦକ୍ଷେପ ନିଆଯାଇଥିବା ଜଣାପଡ଼ିଛି।
ଜ୍ଞାନେଶ କୁମାରଙ୍କ ଦିଲ୍ଲୀସ୍ଥିତ ଆବାସ ଓ କାର୍ଯ୍ୟାଳୟରେ ଅତିରିକ୍ତ ପୁଲିସ ବଳ ମୁତୟନ କରାଯାଇଛି। ଏଥିସହ ଉତ୍ତରପ୍ରଦେଶର ଆଗ୍ରାରେ ଥିବା ତାଙ୍କ ପୈତୃକ ଘରର ସୁରକ୍ଷାକୁ ମଧ୍ୟ ବଢ଼ାଇ ଦିଆଯାଇଛି। ଆବଶ୍ୟକତା ଅନୁସାରେ ଅର୍ଦ୍ଧସାମରିକ ବଳର ମୁତୟନ ବୃଦ୍ଧି କରାଯିବାର ସୂଚନା ମିଳିଛି।
ବର୍ତ୍ତମାନ ଜ୍ଞାନେଶ କୁମାରଙ୍କୁ Z+ ସୁରକ୍ଷା କଭର ମିଳୁଛି। ଏହା ଅଧୀନରେ ତାଙ୍କ ଆବାସ, ଯାତାୟାତ ଓ ସର୍ବସାଧାରଣ କାର୍ଯ୍ୟକ୍ରମ ସମୟରେ ବ୍ୟାପକ ସୁରକ୍ଷା ବ୍ୟବସ୍ଥା ରହିଥାଏ। ଏବେ ସ୍ଥିତିକୁ ଦୃଷ୍ଟିରେ ରଖି ଏହି ସୁରକ୍ଷା ବଳୟକୁ ଆହୁରି କଡ଼ା କରାଯାଇଛି।
ସୂଚନା ଅନୁସାରେ, Z+ ସୁରକ୍ଷା ବ୍ୟବସ୍ଥାରେ ଅନେକ ସୁରକ୍ଷାକର୍ମୀ ପାଳିକ୍ରମେ ଦାୟିତ୍ୱ ତୁଲାଇଥାନ୍ତି। ଜ୍ଞାନେଶ କୁମାରଙ୍କୁ ନେଇ ସୃଷ୍ଟି ହୋଇଥିବା ବିରୋଧ ଓ ଆନ୍ଦୋଳନ ମଧ୍ୟରେ ସମ୍ଭାବ୍ୟ ସୁରକ୍ଷା ଆଶଙ୍କାକୁ ଏଡ଼ାଇବା ପାଇଁ ପୁଲିସ ପକ୍ଷରୁ ଅଧିକ ସତର୍କତା ଅବଲମ୍ବନ କରାଯାଉଛି।
ଗୁଇନ୍ଦା ରିପୋର୍ଟ, ବିରୋଧୀଙ୍କ ବିକ୍ଷୋଭ ଏବଂ ସୁରକ୍ଷା ଆଶଙ୍କାକୁ ସମୀକ୍ଷା କରିବା ପରେ ଜ୍ଞାନେଶ କୁମାରଙ୍କ ସୁରକ୍ଷା ବ୍ୟବସ୍ଥାରେ ଏହି ପରିବର୍ତ୍ତନ ଅଣାଯାଇଛି।
