ଅଯୋଧ୍ୟା ରାମ ମନ୍ଦିରର ଚଢ଼ାଉ ଟଙ୍କା ଚୋରି ମାମଲାକୁ ନେଇ ନୂଆ ତଥ୍ୟ ସାମ୍ନାକୁ ଆସିଛି। ଶ୍ରୀରାମଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟର କୋଷାଧ୍ୟକ୍ଷ ଗୋବିନ୍ଦ ଦେବ ଗିରି କହିଛନ୍ତି ଯେ, ଏହି ଘଟଣା ସୋସିଆଲ ମିଡିଆରେ ଆସିବା ପୂର୍ବରୁ ସେତେବେଳର ମହାସଚିବ ଚମ୍ପତ ରାୟଙ୍କୁ ଚୋରି ବିଷୟରେ ସୂଚନା ମିଳିଯାଇଥିଲା।
ଗୋବିନ୍ଦ ଦେବ ଗିରି କହିଛନ୍ତି, ଚମ୍ପତ ରାୟ ପ୍ରଥମେ ଏହି ଘଟଣାକୁ ବ୍ୟକ୍ତିଗତ ସ୍ତରରେ ସମାଧାନ କରିବାକୁ ଚେଷ୍ଟା କରିଥିଲେ। କିନ୍ତୁ ପରେ ଏହା ଗୁରୁତର ମାମଲା ବୋଲି ଜଣାପଡ଼ିବା ପରେ ସେ ଏସଆଇଟି ତଦନ୍ତ ଦାବି କରିଥିଲେ।
ଏଫଆଇଆର ଦାଖଲ କରିବାରେ ବିଳମ୍ବ କାହିଁକି ହେଲା ବୋଲି ପଚରାଯିବାରୁ ସେ କହିଥିଲେ ଯେ, ଟ୍ରଷ୍ଟ ପକ୍ଷରୁ କିଏ ଅଭିଯୋଗ କରିବ ଏବଂ କିପରି କରିବ, ତାହାକୁ ନେଇ ଦ୍ୱନ୍ଦ୍ୱ ରହିଥିଲା। ଏହି କାରଣରୁ ବିଳମ୍ବ ହୋଇଥିଲା। ସେ ଏହାକୁ ଅସାବଧାନତାର ପରିଣାମ ବୋଲି କହିଛନ୍ତି।
ଗୋବିନ୍ଦ ଦେବ ଗିରିଙ୍କ ଦାବି ଅନୁସାରେ, ଏହି ସମଗ୍ର ଘଟଣାର ମୁଖ୍ୟ ସୂତ୍ରଧର ଥିଲେ ଚମ୍ପତ ରାୟଙ୍କ ବ୍ୟକ୍ତିଗତ ଡ୍ରାଇଭର। ତେବେ ସେ କହିଛନ୍ତି ଯେ, ଚମ୍ପତ ରାୟ ଜାଣିଶୁଣି କାହାକୁ ବଞ୍ଚାଇବାକୁ ଚେଷ୍ଟା କରିନଥିଲେ। ଭୁଲ ଲୋକଙ୍କ ଉପରେ ବିଶ୍ୱାସ କରିବା ଏବଂ ଦୟାଳୁ ସ୍ୱଭାବ ଯୋଗୁଁ ସେ ଭୁଲ କରିଥିଲେ।
ସେ କହିଛନ୍ତି, ତିନି ଦଶକ ଧରି ଚମ୍ପତ ରାୟଙ୍କ ସହ ତାଙ୍କର ସମ୍ପର୍କ ରହିଛି। ତେଣୁ ସେ ବ୍ୟକ୍ତିଗତ ଭାବେ ଏହି ଘଟଣାରେ ଜଡ଼ିତ ଥିବେ ବୋଲି ତାଙ୍କର ବିଶ୍ୱାସ ନାହିଁ। କିନ୍ତୁ ତାଙ୍କୁ ଦିଆଯାଇଥିବା ସୂଚନାକୁ ସେ ଗୁରୁତ୍ୱ ଦେଇନଥିଲେ। ଏହା ତାଙ୍କ ସ୍ୱଭାବଗତ ତ୍ରୁଟି ଥିଲା, ଚରିତ୍ରଗତ ତ୍ରୁଟି ନୁହେଁ। ଗିରି କହିଛନ୍ତି, ଚମ୍ପତ ରାୟଙ୍କ ଅତ୍ୟଧିକ ଆତ୍ମବିଶ୍ୱାସ ଏହି ଘଟଣାର ଏକ କାରଣ ହୋଇଥାଇପାରେ।
ଏସଆଇଟି ରିପୋର୍ଟକୁ ନେଇ ସେ କହିଛନ୍ତି, ଅନ୍ତିମ ରିପୋର୍ଟ ଆସିବା ପରେ ଟ୍ରଷ୍ଟ ପକ୍ଷରୁ ଆବଶ୍ୟକ ପଦକ୍ଷେପ ନିଆଯିବ। ସେ କହିଛନ୍ତି, ଏହି ଘଟଣା ପାଇଁ ଟ୍ରଷ୍ଟ ଦୁଃଖିତ ଏବଂ ରାମଲଲା ଓ ସମସ୍ତ ରାମଭକ୍ତଙ୍କୁ କ୍ଷମା ପ୍ରାର୍ଥନା କରୁଛି। କିନ୍ତୁ ଏହି ଘଟଣାକୁ ନେଇ ରାଜନୀତି କରୁଥିବା ଲୋକଙ୍କ ପାଖରେ କ୍ଷମା ମାଗିବାର ପ୍ରଶ୍ନ ଉଠୁନାହିଁ।
ନିଜେ ଇସ୍ତଫା ଦେବେ କି ନାହିଁ ବୋଲି ପଚରାଯିବାରୁ ଗୋବିନ୍ଦ ଦେବ ଗିରି କହିଥିଲେ, “ମୁଁ କାହିଁକି ଇସ୍ତଫା ଦେବି?” ସେ ସ୍ପଷ୍ଟ କରି କହିଛନ୍ତି ଯେ, ମନ୍ଦିରର ହୁଣ୍ଡିରୁ ମିଳୁଥିବା ଟଙ୍କା ଗଣନା ପ୍ରକ୍ରିୟାରେ ତାଙ୍କର ପୂର୍ବରୁ ମଧ୍ୟ କୌଣସି ଭୂମିକା ନଥିଲା ଏବଂ ବର୍ତ୍ତମାନ ମଧ୍ୟ ନାହିଁ।
