ପଶ୍ଚିମବଙ୍ଗ ବିଧାନସଭାରେ ବିରୋଧୀ ଦଳ ନେତା ନିଯୁକ୍ତିକୁ ନେଇ ଆରମ୍ଭ ହୋଇଥିବା ବିବାଦ ଏବେ କଲକାତା ହାଇକୋର୍ଟରେ ପହଞ୍ଚିଛି। ଋତବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା ଭାବେ ନିଯୁକ୍ତ କରାଯିବାକୁ ଚ୍ୟାଲେଞ୍ଜ କରି ମାମଲା ଦାଖଲ ହୋଇଛି।
ଏହି ମାମଲାର ଶୁଣାଣି ବେଳେ କଲକାତା ହାଇକୋର୍ଟ ବିଧାନସଭା ଅଧ୍ୟକ୍ଷ ରଥୀନ୍ଦ୍ର ବସୁଙ୍କ ଭୂମିକାକୁ ନେଇ ଅନେକ ପ୍ରଶ୍ନ ଉଠାଇଛନ୍ତି। କୋର୍ଟ ପଚାରିଛନ୍ତି ଯେ, ବହୁମତ ଥିବା ବିରୋଧୀ ଦଳର ପ୍ରସ୍ତାବକୁ ଅଧ୍ୟକ୍ଷ ଅଣଦେଖା କରିପାରିବେ କି? ଏବଂ ଦୁଇ ପକ୍ଷଙ୍କୁ ଶୁଣିବା ବିନା ସେ କାହାକୁ ବିରୋଧୀ ଦଳ ନେତା ଭାବେ ନିଯୁକ୍ତ କରିପାରିବେ କି?
ସୂଚନା ଅନୁସାରେ, ତୃଣମୂଳ କଂଗ୍ରେସ ପକ୍ଷରୁ ବିଧାନସଭା ଅଧ୍ୟକ୍ଷଙ୍କ ନିକଟକୁ ଦୁଇଟି ଭିନ୍ନ ପ୍ରସ୍ତାବ ପଠାଯାଇଥିଲା। ଗୋଟିଏ ପ୍ରସ୍ତାବ ଦଳର ବିଦ୍ରୋହୀ ବିଧାୟକମାନଙ୍କ ପକ୍ଷରୁ ଆସିଥିଲା, ଯେଉଁଥିରେ ଋତବ୍ରତ ବାନାର୍ଜୀଙ୍କ ନାମ ଥିଲା। ଅନ୍ୟପଟେ ଦଳୀୟ ନେତୃତ୍ୱ ପକ୍ଷରୁ ଶୋଭନଦେବ ଚଟ୍ଟୋପାଧ୍ୟାୟଙ୍କ ନାମ ପଠାଯାଇଥିଲା।
ତେବେ ବିଧାନସଭା ଅଧ୍ୟକ୍ଷ ବିଦ୍ରୋହୀ ଗୋଷ୍ଠୀ ପକ୍ଷରୁ ଆସିଥିବା ଋତବ୍ରତ ବାନାର୍ଜୀଙ୍କ ନାମକୁ ଗ୍ରହଣ କରିଥିଲେ। ଏହାକୁ ବିରୋଧ କରି ଶୋଭନଦେବ ଚଟ୍ଟୋପାଧ୍ୟାୟ ହାଇକୋର୍ଟରେ ଆବେଦନ କରିଛନ୍ତି।
ମାମଲାର ଶୁଣାଣି କରୁଥିବା ଜଷ୍ଟିସ କୃଷ୍ଣ ରାଓ କହିଛନ୍ତି ଯେ, ସବୁଠାରୁ ବଡ଼ ବିରୋଧୀ ଦଳର ପ୍ରସ୍ତାବ ମିଳିବା ପରେ ଅଧ୍ୟକ୍ଷଙ୍କୁ ଆଇନ ଅନୁଯାୟୀ ପଦକ୍ଷେପ ନେବାକୁ ପଡ଼ିବ। କିନ୍ତୁ ଏପରି ବିବାଦ ଦେଖାଦେଲେ ତାହାର ସମାଧାନ ମଧ୍ୟ ଆଇନ ଅନୁସାରେ କରିବା ଆବଶ୍ୟକ।
କୋର୍ଟ ପଚାରିଛନ୍ତି ଯେ, ଏକେ ରାଜନୈତିକ ଦଳ ପକ୍ଷରୁ ଦୁଇଟି ଭିନ୍ନ ପ୍ରସ୍ତାବ ଆସିଲେ ବିଧାନସଭା ଅଧ୍ୟକ୍ଷଙ୍କ କର୍ତ୍ତବ୍ୟ କଣ? ସେ ନିଜ ଆଡ଼ୁ ନିଷ୍ପତ୍ତି ନେଇପାରିବେ କି, ନା ଦୁଇ ପକ୍ଷଙ୍କୁ ଶୁଣିବା ପରେ ନିଷ୍ପତ୍ତି ନେବା ଉଚିତ?
ବିଧାନସଭା ଅଧ୍ୟକ୍ଷଙ୍କ ପକ୍ଷରୁ ଉପସ୍ଥିତ ଆଇନଜୀବୀ ବିଲ୍ୱଦଳ ଭଟ୍ଟାଚାର୍ଯ୍ୟ କୋର୍ଟରେ ଯୁକ୍ତି ରଖି କହିଥିଲେ ଯେ, ପଶ୍ଚିମବଙ୍ଗ ବିଧାନସଭା ପରିଲବ୍ଧି ଆଇନ-୧୯୩୭ ଅନୁଯାୟୀ, ସଦନରେ ସବୁଠାରୁ ଅଧିକ ସଂଖ୍ୟା ବିଶିଷ୍ଟ ବିରୋଧୀ ଦଳର ନେତାଙ୍କୁ ବିରୋଧୀ ଦଳ ନେତା ଭାବେ ସ୍ୱୀକୃତି ମିଳିଥାଏ।
ସେ ଆହୁରି କହିଥିଲେ ଯେ, ଯଦି କୌଣସି ଦଳର ସଂଖ୍ୟାବଳ କିମ୍ବା ନେତୃତ୍ୱକୁ ନେଇ ବିବାଦ ସୃଷ୍ଟି ହୁଏ, ତେବେ ସେହି କ୍ଷେତ୍ରରେ ବିଧାନସଭା ଅଧ୍ୟକ୍ଷଙ୍କ ନିଷ୍ପତ୍ତି ହିଁ ଚୂଡ଼ାନ୍ତ ହେବ।
ଶୁଣାଣି ବେଳେ ଆବେଦନକାରୀଙ୍କ ଓକିଲ କୋର୍ଟକୁ କହିଥିଲେ ଯେ ଦୁଇଜଣ ବିଧାୟକ ଋତବ୍ରତ ବାନାର୍ଜୀ ଓ ସନ୍ଦୀପନ ସାହା ବିଧାନସଭା ଅଧ୍ୟକ୍ଷଙ୍କୁ ଜଣାଇଥିଲେ ଯେ ପ୍ରସ୍ତାବ ପତ୍ରରେ ଥିବା ସ୍ୱାକ୍ଷର ସେମାନଙ୍କର ନୁହେଁ।
କୋର୍ଟ ଏହା ମଧ୍ୟ ପଚାରିଛନ୍ତି ଯେ, ବିରୋଧୀ ଦଳ ନେତା ପଦ ପାଇଁ ଋତବ୍ରତ ବାନାର୍ଜୀଙ୍କ ନାମ କିଏ ପ୍ରସ୍ତାବ କରିଥିଲେ? କାରଣ ଏଭଳି ପ୍ରସ୍ତାବ କୌଣସି ରାଜନୈତିକ ଦଳ ପକ୍ଷରୁ ଆସିବା ଆବଶ୍ୟକ।
ଜଷ୍ଟିସ କୃଷ୍ଣ ରାଓ କହିଛନ୍ତି ଯେ, ତୃଣମୂଳ କଂଗ୍ରେସ ପକ୍ଷରୁ ଶୋଭନଦେବ ଚଟ୍ଟୋପାଧ୍ୟାୟଙ୍କୁ ବିରୋଧୀ ଦଳ ନେତା କରିବା ପାଇଁ ପ୍ରସ୍ତାବ ପଠାଯାଇଥିଲା। କିନ୍ତୁ ଅଧ୍ୟକ୍ଷ ସେହି ପ୍ରସ୍ତାବ ଉପରେ ତୁରନ୍ତ କୌଣସି ପଦକ୍ଷେପ ନେଇନଥିଲେ।
ରାଜ୍ୟ ସରକାରଙ୍କ ଅତିରିକ୍ତ ମହାଧିବକ୍ତା ଭଟ୍ଟାଚାର୍ଯ୍ୟ କହିଛନ୍ତି ଯେ, ଏହି ମାମଲାର ମୁଖ୍ୟ ପ୍ରଶ୍ନ ହେଉଛି ଶୋଭନଦେବ ଚଟ୍ଟୋପାଧ୍ୟାୟଙ୍କ ନାମରେ ହୋଇଥିବା ସୁପାରିଶକୁ ବୈଧ ମନାଯାଇପାରିବ କି ନାହିଁ।
ଏହି ମାମଲାର ଶୁଣାଣି ବୁଧବାର ମଧ୍ୟ ଜାରି ରହିବ ବୋଲି କୋର୍ଟ ସୂଚନା ଦେଇଛନ୍ତି। ପଶ୍ଚିମବଙ୍ଗ ବିଧାନସଭା ଇତିହାସରେ ପ୍ରଥମ ଥର ପାଇଁ ବିରୋଧୀ ଦଳ ନେତା ନିଯୁକ୍ତିକୁ ନେଇ ଏପରି ବିବାଦ କୋର୍ଟରେ ପହଞ୍ଚିଥିବା କୁହାଯାଉଛି।
