ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଆନ୍ଧ୍ରପ୍ରଦେଶର ବିଜୟନଗରମ ଜିଲ୍ଲାର ଭୋଗାପୁରମରେ ୧୭,୯୦୦ କୋଟି ଟଙ୍କାରୁ ଅଧିକ ମୂଲ୍ୟର ବିକାଶମୂଳକ ପ୍ରକଳ୍ପର ଉଦ୍ଘାଟନ, ଲୋକାର୍ପଣ ଓ ଶିଳାନ୍ୟାସ କରିଛନ୍ତି। ବିମାନବନ୍ଦର, ସଡ଼କ ସଂଯୋଗ ଏବଂ ଶକ୍ତି କ୍ଷେତ୍ର ସମ୍ବନ୍ଧୀୟ ଏହି ପ୍ରକଳ୍ପଗୁଡ଼ିକ ଆନ୍ଧ୍ରପ୍ରଦେଶର ବିକାଶକୁ ନୂଆ ଗତି ଦେବ ବୋଲି ସେ କହିଛନ୍ତି।
ସାଧାରଣ ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ, ଆନ୍ଧ୍ରପ୍ରଦେଶରେ ‘ସ୍ୱର୍ଣ୍ଣ ଆନ୍ଧ୍ର’ ଏବଂ ‘ବିକଶିତ ଭାରତ’ର ସ୍ୱପ୍ନ ସାକାର କରିବାର ବ୍ୟାପକ ସମ୍ଭାବନା ରହିଛି। ରାଜ୍ୟ ଭାରତର ବିକାଶର ଏକ ପ୍ରମୁଖ ଇଞ୍ଜିନ୍ ହୋଇପାରିବ ବୋଲି ସେ ବିଶ୍ୱାସ ପ୍ରକାଶ କରିଥିଲେ।
କାର୍ଯ୍ୟକ୍ରମରେ ୧୩ ହଜାରରୁ ଅଧିକ ଆଦିବାସୀ ମହିଳା ଓ ବାଳିକାଙ୍କ ଦ୍ୱାରା ପରିବେଷିତ ଧିମ୍ସା ନୃତ୍ୟର ପ୍ରଶଂସା କରି ପ୍ରଧାନମନ୍ତ୍ରୀ କହିଥିଲେ ଯେ, ଏହା ଭାରତର ସାଂସ୍କୃତିକ ବିବିଧତା ଓ ଆଦିବାସୀ ପରମ୍ପରାର ଏକ ଜୀବନ୍ତ ପ୍ରତିଛବି।
ଏହି ଅବସରରେ ଅଲ୍ଲୁରୀ ସୀତାରାମ ରାଜୁ ଆନ୍ତର୍ଜାତୀୟ ବିମାନବନ୍ଦରର ଉଦ୍ଘାଟନ କରାଯାଇଥିଲା। ପ୍ରଧାନମନ୍ତ୍ରୀ କହିଥିଲେ, ଏହି ବିମାନବନ୍ଦର ଉତ୍ତର ଆନ୍ଧ୍ରରେ ପର୍ଯ୍ୟଟନ, ବ୍ୟବସାୟ, ପୁଞ୍ଜିନିବେଶ ଓ ରୋଜଗାରର ନୂଆ ସୁଯୋଗ ସୃଷ୍ଟି କରିବ।
ସେ କହିଥିଲେ, ୨୦୧୪ ମସିହାରେ ଦେଶରେ ୭୪ଟି କାର୍ଯ୍ୟକ୍ଷମ ବିମାନବନ୍ଦର ଥିବାବେଳେ ବର୍ତ୍ତମାନ ଏହାର ସଂଖ୍ୟା ୧୬୬ରେ ପହଞ୍ଚିଛି। ଉଡାନ୍ ଯୋଜନାର ଦ୍ୱିତୀୟ ପର୍ଯ୍ୟାୟ ପାଇଁ ୨୯ ହଜାର କୋଟି ଟଙ୍କାର ବ୍ୟବସ୍ଥା କରାଯାଇଛି ବୋଲି ସେ ସୂଚନା ଦେଇଥିଲେ।
ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ ଏବଂ ଉପମୁଖ୍ୟମନ୍ତ୍ରୀ ପବନ କଲ୍ୟାଣଙ୍କ ନେତୃତ୍ୱରେ ଏନ୍ଡିଏ ସରକାର ଆନ୍ଧ୍ରପ୍ରଦେଶର ବିକାଶକୁ ଦ୍ରୁତ କରୁଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ।
ସେ କହିଥିଲେ ଯେ, ରାଜ୍ୟରେ ପ୍ରାୟ ୧ ଲକ୍ଷ କୋଟି ଟଙ୍କାର ରେଳ ପ୍ରକଳ୍ପ କାର୍ଯ୍ୟକାରୀ ହେଉଛି। ସମ୍ପୂର୍ଣ୍ଣ ରେଳ ନେଟୱର୍କର ବିଦ୍ୟୁତୀକରଣ ସରିଥିବାବେଳେ ୭୦ରୁ ଅଧିକ ରେଳ ଷ୍ଟେସନର ଆଧୁନିକୀକରଣ ଚାଲିଛି।
ବିଶାଖାପାଟଣାରୁ କୃଷ୍ଣପଟ୍ଟନମ ପର୍ଯ୍ୟନ୍ତ ବନ୍ଦରର ଆଧୁନିକୀକରଣ, ମୁଲାପେଟା ଓ ରାମାୟାପଟ୍ଟନମରେ ନୂଆ ବନ୍ଦର ନିର୍ମାଣ ଏବଂ ବିଶାଖାପାଟଣା–ରାୟପୁର ଏକ୍ସପ୍ରେସୱେ ସମେତ ବିଭିନ୍ନ ସଡ଼କ ପ୍ରକଳ୍ପ ରାଜ୍ୟର ଅର୍ଥନୀତିକୁ ସୁଦୃଢ଼ କରିବ ବୋଲି ସେ କହିଥିଲେ।
ବିଶାଖାପାଟଣାରେ ଏକ ନୂଆ ସେମିକଣ୍ଡକ୍ଟର ପ୍ଲାଣ୍ଟର ଶିଳାନ୍ୟାସକୁ ସେ ଐତିହାସିକ ପଦକ୍ଷେପ ବୋଲି ବର୍ଣ୍ଣନା କରିଥିଲେ। ଏହାସହ ଗୁଗୁଲର ପ୍ରସ୍ତାବିତ ୧୫ ବିଲିୟନ୍ ଡଲାରର ଡାଟା ସେଣ୍ଟର କ୍ୟାମ୍ପସ, ନକ୍କାପଲ୍ଲୀରେ ଫାର୍ମା ପାର୍କ ଏବଂ ରାୟଲସୀମାରେ ୫ ଲକ୍ଷ କୋଟି ଟଙ୍କାରୁ ଅଧିକ ନବୀକରଣଯୋଗ୍ୟ ଶକ୍ତି କ୍ଷେତ୍ରରେ ପୁଞ୍ଜିନିବେଶର ମଧ୍ୟ ସେ ଉଲ୍ଲେଖ କରିଥିଲେ।
ପ୍ରଧାନମନ୍ତ୍ରୀ କହିଥିଲେ ଯେ, ତାଙ୍କର ଗତ ତିନିଟି ଆନ୍ଧ୍ରପ୍ରଦେଶ ଗସ୍ତ ସମୟରେ ପ୍ରାୟ ୨ ଲକ୍ଷ କୋଟି ଟଙ୍କାର ପ୍ରକଳ୍ପ ଆରମ୍ଭ ହୋଇଛି। ଏହି ପ୍ରକଳ୍ପଗୁଡ଼ିକ ବିଶାଖାପାଟଣା ଆର୍ଥିକ କ୍ଷେତ୍ରକୁ ଏସିଆର ଅଗ୍ରଣୀ ଅର୍ଥନୈତିକ ହବ୍ରେ ପରିଣତ କରିବାରେ ସହାୟକ ହେବ ବୋଲି ସେ ଆଶା ପ୍ରକାଶ କରିଥିଲେ।
ଶେଷରେ ସେ କହିଥିଲେ ଯେ, ସରକାରୀ ଓ ବେସରକାରୀ ପୁଞ୍ଜିନିବେଶ ବୃଦ୍ଧି ପାଇଲେ ଉତ୍ପାଦନ, ରପ୍ତାନି, ରୋଜଗାର ଏବଂ ଲୋକଙ୍କ ଜୀବନମାନରେ ଉନ୍ନତି ଆସିବ। ଏହା ‘ସ୍ୱର୍ଣ୍ଣ ଆନ୍ଧ୍ର’ ଏବଂ ‘ବିକଶିତ ଭାରତ’ ଲକ୍ଷ୍ୟ ପୂରଣରେ ସହାୟକ ହେବ।
