ହାଇଦ୍ରାବାଦ ପୋଲିସ ସୋସିଆଲ ମିଡିଆରେ ‘ଭାଇରାଲ ଗୋଲ୍ଡମ୍ୟାନ’ ଭାବେ ପରିଚିତ ସୂର୍ଯ୍ୟଭାଇଙ୍କୁ ଗିରଫ କରିଛି। ତାଙ୍କ ବିରୋଧରେ ଲୋକଙ୍କୁ ବିଦେଶରୁ କମ୍ ଦାମରେ ସୁନା ଆଣି ଦେବାର ପ୍ରତିଶ୍ରୁତି ଦେଇ ପ୍ରାୟ ୩୨ ଲକ୍ଷ ଟଙ୍କା ଠକେଇ କରିଥିବା ଅଭିଯୋଗ ରହିଛି।
ପୋଲିସ କହିଛି, ସୂର୍ଯ୍ୟଭାଇ ତେଲେଙ୍ଗାନା ମୁଖ୍ୟମନ୍ତ୍ରୀ ରେଭନ୍ତ ରେଡ୍ଡୀ ଏବଂ ହାଇଦ୍ରାବାଦ ପୋଲିସ କମିଶନରଙ୍କ ସହ ନିଜର ଘନିଷ୍ଠ ସମ୍ପର୍କ ଥିବାର ମିଥ୍ୟା ଦାବି କରୁଥିଲେ। ଏହି ପ୍ରଭାବଶାଳୀ ପରିଚୟକୁ ଦେଖାଇ ସେ ଲୋକଙ୍କ ବିଶ୍ୱାସ ଜିତୁଥିଲେ ଏବଂ ଶସ୍ତାରେ ସୁନା ଦେବା ନାଁରେ ଅଗ୍ରୀମ ଟଙ୍କା ନେଉଥିଲେ।
ସେଣ୍ଟ୍ରାଲ କ୍ରାଇମ ଷ୍ଟେସନର ତଦନ୍ତକାରୀ ଅଧିକାରୀ ଇନ୍ସପେକ୍ଟର ଏସ୍. ରବିନ୍ଦରଙ୍କ କହିବା ଅନୁସାରେ, ସୂର୍ଯ୍ୟଭାଇ ଲୋକଙ୍କୁ ବିଶ୍ୱାସ କରାଉଥିଲେ ଯେ, ତାଙ୍କର ବଡ଼ ବଡ଼ ରାଜନେତା ଓ ଅଧିକାରୀଙ୍କ ସହ ସମ୍ପର୍କ ରହିଛି। ଏହି କାରଣରୁ ସେ ବିଦେଶରୁ ବହୁତ କମ୍ ଦାମରେ ସୁନା ଆଣିପାରିବେ ଏବଂ ଏଥିପାଇଁ କୌଣସି ଆମଦାନୀ ଶୁଳ୍କ କିମ୍ବା ଟିକସ ଦେବାକୁ ପଡ଼ିବ ନାହିଁ। ଏହି କଥା କହି ସେ ଅନେକ ଲୋକଙ୍କଠାରୁ ଲକ୍ଷ ଲକ୍ଷ ଟଙ୍କା ଅଗ୍ରୀମ ଆଦାୟ କରିଥିଲେ।
ତଦନ୍ତ ସମୟରେ ଆଉ ଏକ ଚମକପ୍ରଦ ତଥ୍ୟ ସାମ୍ନାକୁ ଆସିଛି। ଫରେନ୍ସିକ୍ ଯାଞ୍ଚ ଏବଂ ସ୍ଥାନୀୟ ସୁନା ବ୍ୟବସାୟୀଙ୍କ ଯାଞ୍ଚରୁ ଜଣାପଡ଼ିଛି ଯେ, ସୋସିଆଲ ମିଡିଆରେ ସୂର୍ଯ୍ୟଭାଇ ପିନ୍ଧୁଥିବା ଭାରି ସୁନା ଅଳଙ୍କାର ବାସ୍ତବରେ ସୁନା ନଥିଲା। ସେଗୁଡ଼ିକ ସାଧାରଣ ଧାତୁ ଉପରେ ପତଳା ସୁନାର ପଲିସ୍ କରାଯାଇଥିବା ନକଲି ଗହଣା ଥିଲା।
ପୋଲିସ କହିଛି, ସୂର୍ଯ୍ୟଭାଇ ସୋସିଆଲ ମିଡିଆରେ ନିଜର ଲୋକପ୍ରିୟତାକୁ ବ୍ୟବହାର କରି ନିଜକୁ ବହୁତ ଧନୀ ଏବଂ ପ୍ରଭାବଶାଳୀ ବ୍ୟକ୍ତି ଭାବେ ଦେଖାଉଥିଲେ। ଏହାଦ୍ୱାରା ଲୋକଙ୍କ ସନ୍ଦେହ ଦୂର ହେଉଥିଲା। ଲୋକଙ୍କଠାରୁ ଅଗ୍ରୀମ ଟଙ୍କା ନେବା ପରେ ସେ ସୁନା ଦେବାକୁ ବାରମ୍ବାର ସମୟ ମାଗୁଥିଲେ ଏବଂ ଶେଷରେ ସମସ୍ତଙ୍କ ସହ ସମ୍ପର୍କ ବନ୍ଦ କରି ଟଙ୍କା ନେଇ ଫେରାର ହୋଇଯାଉଥିଲେ।
ପୋଲିସ ସୂଚନା ଅନୁସାରେ, ସୂର୍ଯ୍ୟଭାଇଙ୍କ ନିକଟରୁ ଅନେକ ମୋବାଇଲ ଫୋନ୍, ନକଲି ସୁନା ଗହଣା ଏବଂ ଜାଲ ସରକାରୀ ଦସ୍ତାବିଜ ଜବତ କରାଯାଇଛି। ବର୍ତ୍ତମାନ ତାଙ୍କୁ ପଚରାଉଚରା କରାଯାଉଛି। ଏହି ମାମଲାରେ ଆଉ କେତେ ଲୋକ ଠକେଇର ଶିକାର ହୋଇଛନ୍ତି ଏବଂ ଏହି ଘଟଣାରେ ଆଉ କିଏ କିଏ ସାମିଲ ଅଛନ୍ତି, ସେନେଇ ପୋଲିସ ତଦନ୍ତ ଜାରି ରଖିଛି।
