ଅଭିନେତା ରାଜପାଲ ଯାଦବଙ୍କୁ ତାଙ୍କ ପୈତୃକ ସମ୍ପତ୍ତି ବିକ୍ରି କରି ବକେୟା ଅର୍ଥ ପରିଶୋଧ କରିବାକୁ ସୁପ୍ରିମକୋର୍ଟ ଅନୁମତି ଦେଇଛନ୍ତି। ୨୦୧୨ରେ ତାଙ୍କ ଫିଲ୍ମ ‘ଆତା ପତା ଲାପତା’ ପାଇଁ ନିଆଯାଇଥିବା ଋଣ ସହ ଜଡିତ ଚେକ୍ ବାଉନ୍ସ ମାମଲାରେ ଏହି ବକେୟା ରାଶି ଦେବାକୁ ପଡ଼ିଛି।
ପ୍ରଧାନ ବିଚାରପତି ସୂର୍ଯ୍ୟକାନ୍ତଙ୍କ ନେତୃତ୍ୱରେ ଜଷ୍ଟିସ୍ ଜୟମାଲ୍ୟ ବାଗଚୀ ଓ ଜଷ୍ଟିସ୍ ଭି. ମୋହନଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରିଛନ୍ତି। ଅଦାଲତରେ ରାଜପାଲ ଯାଦବ ₹୧ କୋଟି ୧୫ ଲକ୍ଷର ଡିମାଣ୍ଡ ଡ୍ରାଫ୍ଟ ଦାଖଲ କରିଥିବା ଜଣାପଡ଼ିଛି। ମୋଟ ₹୨ କୋଟି ପରିଶୋଧ କରିବାକୁ ଥିବାବେଳେ ବାକି ₹୮୫ ଲକ୍ଷ ତାଙ୍କ ପୈତୃକ ସମ୍ପତ୍ତି ବିକ୍ରି କରି ଦେବାକୁ ସେ ଅଦାଲତକୁ ଜଣାଇଛନ୍ତି। ଏହି ଅର୍ଥ ଅକ୍ଟୋବର ୧୨ ସୁଦ୍ଧା ପରିଶୋଧ କରିବାର ଯୋଜନା ରହିଛି।
ରାଜପାଲ ଯାଦବଙ୍କ ବିରୋଧରେ ଚେକ୍ ବାଉନ୍ସ ସମ୍ପର୍କିତ ଏକାଧିକ ମାମଲା ରହିଛି। ଏପର୍ଯ୍ୟନ୍ତ ସାତଟି ମାମଲାରେ ତାଙ୍କୁ ଦୋଷୀ ସାବ୍ୟସ୍ତ କରାଯାଇଥିବା ସୂଚନା ମିଳିଛି। ପୂର୍ବରୁ ବକେୟା ରାଶି ଜମା କରିବାରେ ବିଳମ୍ବ ନେଇ ସୁପ୍ରିମକୋର୍ଟ ତାଙ୍କୁ ଭର୍ତ୍ସନା ମଧ୍ୟ କରିଥିଲେ। ଏବେ ଅଦାଲତ ତାଙ୍କୁ ବକେୟା ଟଙ୍କା ପରିଶୋଧ କରିବାର ଆଉ ଏକ ସୁଯୋଗ ଦେଇଛନ୍ତି। ଏହି ପ୍ରକ୍ରିୟାରେ ପୈତୃକ ସମ୍ପତ୍ତି ବିକ୍ରି କରି ରାଜପାଲ ଯାଦବ ବାକି ଅର୍ଥ ଶୁଝିବେ।
‘ଆତା ପତା ଲାପତା’ ଫିଲ୍ମ ପାଇଁ ନିଆଯାଇଥିବା ଋଣକୁ କେନ୍ଦ୍ର କରି ଆରମ୍ଭ ହୋଇଥିବା ଏହି ବିବାଦ ବହୁ ବର୍ଷ ଧରି ଆଇନଗତ ପ୍ରକ୍ରିୟାରେ ରହିଛି। ଏବେ ସୁପ୍ରିମକୋର୍ଟଙ୍କ ଅନୁମତି ପରେ ସମ୍ପତ୍ତି ବିକ୍ରି ମାଧ୍ୟମରେ ବକେୟା ଅର୍ଥ ପରିଶୋଧ କରିବାର ରାସ୍ତା ଖୋଲିଛି।
