ଓଡ଼ିଶାରେ ପୁଣି ଥରେ ଲାଞ୍ଚ କାରବାର ଘଟଣା ସାମ୍ନାକୁ ଆସିଛି। କୋରାପୁଟ ଜିଲ୍ଲାର ଜୟପୁରରେ କାର୍ଯ୍ୟରତ ଖଣି ବିଭାଗର ଉପନିର୍ଦ୍ଦେଶକ (ଭୂତତ୍ତ୍ୱ) ତଥା ଉପନିର୍ଦ୍ଦେଶକ ସତ୍ୟଜିତ ରାଉତଙ୍କୁ ୨ ଲକ୍ଷ ଟଙ୍କା ଲାଞ୍ଚ ନେଉଥିବା ବେଳେ ଓଡ଼ିଶା ଭିଜିଲାନ୍ସ ଟିମ୍ ହାତେନାତ ଧରିଛି।
ସୂଚନା ଅନୁସାରେ, ଏକ ବାଲିଘାଟ ଲିଜଧାରୀଙ୍କ ଲିଜ୍ ସମୟ ବଢ଼ାଇବା ଏବଂ ଆଗାମୀ ସ୍ପଟ୍ ନିଲାମରେ ସୁବିଧା କରାଇଦେବା ପାଇଁ ସତ୍ୟଜିତ ରାଉତ ୨ ଲକ୍ଷ ଟଙ୍କା ଦାବି କରିଥିବା ଅଭିଯୋଗ ହୋଇଥିଲା।
ଏହାପରେ ସମ୍ପୃକ୍ତ ଲିଜଧାରୀ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଅଭିଯୋଗକୁ ଆଧାର କରି ଭିଜିଲାନ୍ସ ଅଧିକାରୀମାନେ ଯୋଜନାବଦ୍ଧ ଭାବେ ଜାଲ ବିଛାଇଥିଲେ। ସତ୍ୟଜିତ ରାଉତ ୨ ଲକ୍ଷ ଟଙ୍କା ନେଉଥିବା ବେଳେ ତାଙ୍କୁ ହାତେନାତ ଧରାଯାଇଥିଲା। ଲାଞ୍ଚ ଭାବେ ନିଆଯାଇଥିବା ସମସ୍ତ ଟଙ୍କାକୁ ଜବତ କରାଯାଇଛି।
ଏହା ପରେ ଭିଜିଲାନ୍ସ ଟିମ୍ ଅଭିଯୁକ୍ତଙ୍କ ସହ ଜଡ଼ିତ ତିନୋଟି ସ୍ଥାନରେ ଚଢ଼ାଉ କରିଥିଲା। ରାୟଗଡ଼ାସ୍ଥିତ ତାଙ୍କ ବାସଭବନରୁ ଆଉ ୨ ଲକ୍ଷ ୯୦ ହଜାର ଟଙ୍କା ନଗଦ ଜବତ କରାଯାଇଛି। ଏହାକୁ ମିଶାଇ ମୋଟ ୪ ଲକ୍ଷ ୯୦ ହଜାର ଟଙ୍କା ଜବତ ହୋଇଛି।
ଏହି ଘଟଣାରେ କୋରାପୁଟ ଭିଜିଲାନ୍ସ ଥାନାରେ ଦୁର୍ନୀତି ନିବାରଣ (ସଂଶୋଧନ) ଆଇନ, ୨୦୧୮ର ଧାରା–୭ ଅନୁଯାୟୀ ମାମଲା ରୁଜୁ କରାଯାଇଛି।
ଭିଜିଲାନ୍ସ ପକ୍ଷରୁ ତଦନ୍ତ ଜାରି ରହିଛି। ଚଢ଼ାଉ ମଧ୍ୟ ଜାରି ଥିବାରୁ ଆଗକୁ ଆହୁରି ତଥ୍ୟ ସାମ୍ନାକୁ ଆସିପାରେ।
