କଟକର ରେଭେନ୍ସା ବିଶ୍ୱବିଦ୍ୟାଳୟରେ ଶିକ୍ଷକ ସଂଘର ଆନ୍ଦୋଳନକୁ ନେଇ ପରିସ୍ଥିତି ଉଷ୍ମ ହୋଇଛି। ରେଭେନ୍ସା ୟୁନିଭର୍ସିଟି ଟିଚର୍ସ ଆସୋସିଏସନ୍ (ରୁଟା)ର ୮୦ରୁ ଅଧିକ ଅଧ୍ୟାପକ ଓ ଅଧ୍ୟାପିକା ସମୂହ ଛୁଟି ନେଇ କଳାବ୍ୟାଜ୍ ପିନ୍ଧି କୁଳପତିଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି।ରୁଟା ପକ୍ଷରୁ କୁହାଯାଇଛି ଯେ, ବିଶ୍ୱବିଦ୍ୟାଳୟର ଆଭ୍ୟନ୍ତରୀଣ ପ୍ରସଙ୍ଗରେ ବାହ୍ୟ ହସ୍ତକ୍ଷେପ ବନ୍ଦ କରିବା, ହଷ୍ଟେଲ ପରିଚାଳନା ପାଇଁ ନୂଆ କମିଟି ବଦଳରେ ପୂର୍ବ କମିଟିକୁ ପୁନଃ ଦାୟିତ୍ୱ ଦେବା ଏବଂ ଶିକ୍ଷକଙ୍କ ମର୍ଯ୍ୟାଦା ଓ ସମ୍ମାନ ସୁରକ୍ଷିତ କରିବା ଭଳି ବିଷୟ ନେଇ ସଂଘ ଆପତ୍ତି ଉଠାଇଛି।
ସଂଘର ଦାବି ଅନୁଯାୟୀ, ଏସବୁ ପ୍ରସଙ୍ଗରେ କୁଳପତିଙ୍କ ସହ ଆଲୋଚନା କରିବାକୁ ଗତ ୧୨ ଦିନ ଧରି ସମୟ ମଗାଯାଉଥିଲେ ମଧ୍ୟ ଆଲୋଚନା ପାଇଁ ସୁଯୋଗ ମିଳିନାହିଁ। ଏହାର ପ୍ରତିବାଦରେ ସକାଳ ୧୦ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଶିକ୍ଷକମାନେ ପ୍ରତୀକାତ୍ମକ ଧାରଣା ଦେଇଥିଲେ।ରୁଟା ଅଭିଯୋଗ କରିଛି ଯେ, ହଷ୍ଟେଲ ପରିଚାଳନାକୁ ନେଇ ବାହ୍ୟ ଚାପରେ ନୂଆ କମିଟି ଗଠନ କରାଯାଇଥିବା ବେଳେ ଜଣେ ବରିଷ୍ଠ ଶିକ୍ଷକଙ୍କ ସମ୍ମାନ ଓ ମର୍ଯ୍ୟାଦା ସୁରକ୍ଷା ପ୍ରସଙ୍ଗରେ କର୍ତ୍ତୃପକ୍ଷ ଆବଶ୍ୟକ ପଦକ୍ଷେପ ନେଇନାହାନ୍ତି। ଏହି କାରଣରୁ ଶିକ୍ଷକ ସଂଘ ଅସନ୍ତୋଷ ପ୍ରକାଶ କରିଛି।
ରୁଟା ସଦସ୍ୟ ପ୍ରଫେସର ନେତାଜୀ ଅଭିନନ୍ଦନ କହିଛନ୍ତି ଯେ, ଶିକ୍ଷକ ସମାଜର ମର୍ଯ୍ୟାଦା ରକ୍ଷା କରିବା ଜରୁରୀ। ଶିକ୍ଷକଙ୍କ ପ୍ରତି ଅସମ୍ମାନକୁ ସଂଘ ଗ୍ରହଣ କରିବ ନାହିଁ ଏବଂ ସମସ୍ୟାର ସମାଧାନ ନହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି ସେ କହିଛନ୍ତି।ତେବେ ଏହି ଆନ୍ଦୋଳନ ସହ ରେଭେନ୍ସା ବିଶ୍ୱବିଦ୍ୟାଳୟ ଶିକ୍ଷକ ପରିଷଦର କୌଣସି ସମ୍ପର୍କ ନାହିଁ ବୋଲି ପରିଷଦର ସଦସ୍ୟ ପ୍ରଫେସର ବିକ୍ରମ କେଶରୀ ମିଶ୍ର ସ୍ପଷ୍ଟ କରିଛନ୍ତି। ଫଳରେ ରେଭେନ୍ସାରେ ଶିକ୍ଷକ ସଂଘ ଓ ପ୍ରଶାସନ ମଧ୍ୟରେ ଥିବା ମତଭେଦ ଏବେ ଚର୍ଚ୍ଚାର କେନ୍ଦ୍ରରେ ରହିଛି।
