ପାଟନା: ଲୋକପ୍ରିୟ ଶିକ୍ଷକ ତଥା ୟୁଟ୍ୟୁବର ଖାନ୍ ସାର (ଫୈସଲ ଖାନ)ଙ୍କୁ ବଡ଼ ଆଇନଗତ ରାହତ ମିଳିଛି। ପାଟନା ସିଭିଲ କୋର୍ଟ ସୋମବାର ତାଙ୍କ ଅଗ୍ରୀମ ଜାମିନ ଆବେଦନକୁ ମଞ୍ଜୁର କରିଛନ୍ତି। ଏହା ସହ ଗୁଳିକାଣ୍ଡ ମାମଲାରେ ଜେଲରେ ଥିବା ତାଙ୍କ ଦୁଇ ଜଣ ବଡିଗାର୍ଡଙ୍କୁ ମଧ୍ୟ ଜାମିନ ମିଳିଛି।
ସୂଚନା ଅନୁସାରେ, ଜିଲ୍ଲା ଜଜ ରୂପେଶ ଦେବଙ୍କ ଅଦାଲତ ଏହି ମାମଲାରେ ଶୁଣାଣି କରି ଖାନ୍ ସାର ଏବଂ ତାଙ୍କର ଦୁଇ ବଡିଗାର୍ଡଙ୍କୁ ଜାମିନ ପ୍ରଦାନ କରିଛନ୍ତି। ଦୀର୍ଘ ଅପେକ୍ଷା ପରେ ଆସିଥିବା ଏହି ରାୟ ଖାନ୍ ସାରଙ୍କ ପାଇଁ ବଡ଼ ସ୍ୱସ୍ତି ଆଣିଛି।
ଏହା ପୂର୍ବରୁ ଜାମିନ ଆବେଦନ ଉପରେ ଶୁଣାଣି ଶେଷ ହୋଇଥିଲା ଏବଂ କୋର୍ଟ ନିଷ୍ପତ୍ତିକୁ ସଂରକ୍ଷିତ ରଖିଥିଲେ। ଗତ ୧୦ ଜୁଲାଇରେ ରାୟ ଆସିବାର ସମ୍ଭାବନା ଥିଲେ ମଧ୍ୟ ଜଜଙ୍କ ଅନୁପସ୍ଥିତି କାରଣରୁ ଶୁଣାଣିକୁ ୧୩ ଜୁଲାଇ ପର୍ଯ୍ୟନ୍ତ ସ୍ଥଗିତ କରାଯାଇଥିଲା। ଶେଷରେ ସୋମବାର କୋର୍ଟ ଜାମିନ ଆବେଦନକୁ ମଞ୍ଜୁର କରିଛନ୍ତି।
କ’ଣ ଥିଲା କୋଚିଂ ବିବାଦ?
ଗତ ଜୁନ୍ ମାସ ଆରମ୍ଭରେ ଏହି ବିବାଦ ସାମ୍ନାକୁ ଆସିଥିଲା। ଖାନ୍ ସାରଙ୍କ କୋଚିଂ ସେଣ୍ଟର ବାହାରେ ରାତି ସମୟରେ ଆକ୍ରମଣ ହୋଇଥିବା ଅଭିଯୋଗ ହୋଇଥିଲା। ଖାନ୍ ସାରଙ୍କ ପକ୍ଷରୁ କୁହାଯାଇଥିଲା ଯେ, କିଛି ଲୋକ ତାଙ୍କ କୋଚିଂ ସଂସ୍ଥା ଉପରେ ଆକ୍ରମଣ କରିଥିଲେ। ଏହାକୁ ନେଇ ତାଙ୍କ ଟିମ୍ ପକ୍ଷରୁ ଏଫ୍ଆଇଆର୍ ଦାଖଲ କରାଯାଇଥିଲା।
ପରବର୍ତ୍ତୀ ସମୟରେ ଏହି ଘଟଣା ରୌଶନ ଆନନ୍ଦ ନାମକ ଜଣେ ବ୍ୟକ୍ତିଙ୍କ ସହ ଜଡ଼ିତ ହୋଇଥିଲା। ପୋଲିସ ତଦନ୍ତ ବେଳେ ଖାନ୍ ସାରଙ୍କ ଦୁଇ ବଡିଗାର୍ଡଙ୍କୁ ଗିରଫ କରିଥିଲା। ତଦନ୍ତରେ ସେମାନେ ଖାନ୍ ସାରଙ୍କ ନିର୍ଦ୍ଦେଶରେ ଗୁଳି ଚଳାଇଥିବା ସ୍ୱୀକାର କରିଥିବା ଦାବି କରିଥିଲା ପୋଲିସ।
ପରେ ଘଟଣା ସହ ଜଡ଼ିତ ଅନେକ ଭିଡିଓ ସାମ୍ନାକୁ ଆସିଥିଲା। ଭିଡିଓ ଓ ଅନ୍ୟାନ୍ୟ ପ୍ରମାଣ ଆଧାରରେ ତଦନ୍ତର ପରିସର ବଢ଼ାଯାଇଥିଲା। ଏହି ମାମଲାରେ ଖାନ୍ ସାରଙ୍କ ଦୁଇ ବଡିଗାର୍ଡଙ୍କୁ ଜେଲ୍ ପଠାଯାଇଥିବା ବେଳେ ରୌଶନ ଆନନ୍ଦଙ୍କୁ ମଧ୍ୟ ଗିରଫ କରାଯାଇଥିଲା।
ଏହି ଘଟଣା ପରେ ରୌଶନ ଆନନ୍ଦଙ୍କ ଭାଇଙ୍କର ନେପାଳରେ ସନ୍ଦେହଜନକ ପରିସ୍ଥିତିରେ ମୃତ୍ୟୁ ଘଟିଥିଲା, ଯାହାକୁ ନେଇ ଦେଶବ୍ୟାପୀ ଚର୍ଚ୍ଚା ହୋଇଥିଲା।
