ସିରିଆର ରାଜଧାନୀ ଦମାସ୍କସ ମଙ୍ଗଳବାର କ୍ରମାଗତ ଦୁଇଟି ବିସ୍ଫୋରଣରେ ଥରହର ହୋଇଯାଇଛି। ଏହି ବିସ୍ଫୋରଣ ସେହି ସମୟରେ ଘଟିଥିଲା, ଯେତେବେଳେ ଫ୍ରାନ୍ସର ରାଷ୍ଟ୍ରପତି ଇମାନୁଏଲ୍ ମାକ୍ରୋଁ ସିରିଆ ଗସ୍ତରେ ଥିଲେ। ସେ ସିରିଆର ରାଷ୍ଟ୍ରପତି ଆହମଦ ଅଲ-ଶରାଙ୍କ ସହ ଭେଟିବା ପାଇଁ ରାଷ୍ଟ୍ରପତି ଭବନକୁ ଯାଉଥିବା ବେଳେ ବିସ୍ଫୋରଣର ଶବ୍ଦ ଶୁଣାଯାଇଥିଲା। ଏହା ସହିତ ମାକ୍ରୋଁ ରହୁଥିବା ହୋଟେଲ ନିକଟରେ ମଧ୍ୟ ଏକ ବିସ୍ଫୋରଣ ଘଟିଥିବା ସୂଚନା ମିଳିଛି।
ସିରିଆର ସ୍ଥାନୀୟ ଗଣମାଧ୍ୟମ ଅନୁସାରେ, ଦୁଇଟି ବିସ୍ଫୋରଣ ଦମାସ୍କସ ସହରର କେନ୍ଦ୍ରସ୍ଥଳରେ ଘଟିଛି। ବିସ୍ଫୋରଣ ପରେ ଅଗ୍ନିଶିଖା ଓ ଘନ ଧୂଆଁ ଆକାଶକୁ ଉଠୁଥିବା ଦେଖାଯାଇଥିଲା। ଏହି ଘଟଣାରେ ମୋଟ ୧୮ ଜଣ ଆହତ ହୋଇଥିବା ବେଳେ ସେମାନଙ୍କ ମଧ୍ୟରେ ୪ ଜଣ ପୁଲିସ କର୍ମଚାରୀ ରହିଛନ୍ତି।
ଫ୍ରାନ୍ସ ରାଷ୍ଟ୍ରପତି କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ, ମାକ୍ରୋଁ ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି ଏବଂ ସେ ବିସ୍ଫୋରଣର ଶବ୍ଦ ମଧ୍ୟ ଶୁଣିନଥିଲେ। ଘଟଣା ପରେ ମଧ୍ୟ ସେ ସିରିଆର ରାଷ୍ଟ୍ରପତିଙ୍କ ସହ ନିର୍ଦ୍ଧାରିତ ବୈଠକ କରିଥିଲେ।
ସୂଚନା ଅନୁସାରେ, ଗୋଟିଏ ବିସ୍ଫୋରଣ ଦମାସ୍କସର ପ୍ରସିଦ୍ଧ ନ୍ୟାସନାଲ୍ ମ୍ୟୁଜିୟମ୍ ନିକଟରେ ଏବଂ ଅନ୍ୟଟି ପର୍ଯ୍ୟଟନ ମନ୍ତ୍ରଣାଳୟ ପାଖରେ ଘଟିଥିଲା। ପ୍ରଥମ ବିସ୍ଫୋରଣ ପରେ ଏକ କୁଡ଼ାଦାନରୁ ଅଗ୍ନିଶିଖା ଓ ଧୂଆଁ ବାହାରୁଥିବା ଦେଖାଯାଇଥିଲା। କିଛି ମିଟର ଦୂରରେ ଦ୍ୱିତୀୟ ବିସ୍ଫୋରଣ ଘଟିଥିଲା, ଯାହା ଏକ ଆମ୍ବୁଲାନ୍ସ ନିକଟରେ ହୋଇଥିଲା। ସେହି ସମୟରେ ସେଠାରେ ପ୍ରାୟ ଦୁଇ ଡଜନ ଲୋକ ଉପସ୍ଥିତ ଥିଲେ।
ଉଲ୍ଲେଖଯୋଗ୍ୟ ଯେ, ଗତ ୨ ଜୁଲାଇରେ ମଧ୍ୟ ଦମାସ୍କସର ଏକ କାଫେରେ ବୋମା ବିସ୍ଫୋରଣ ଘଟିଥିଲା। ସେହି ଘଟଣାରେ ୯ ଜଣଙ୍କ ମୃତ୍ୟୁ ହୋଇଥିବା ବେଳେ ୨୦ ଜଣ ଗୁରୁତର ଆହତ ହୋଇଥିଲେ। ପୁଣିଥରେ ରାଜଧାନୀରେ ବିସ୍ଫୋରଣ ଘଟିବାରୁ ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନ ଉଠିଛି।
ସୂଚନାଯୋଗ୍ୟ, ସିରିଆର ବର୍ତ୍ତମାନର ରାଷ୍ଟ୍ରପତି ଆହମଦ ଅଲ-ଶରା ୨୦୨୪ ମସିହାରେ ବଶର ଅଲ-ଅସଦଙ୍କୁ କ୍ଷମତାରୁ ହଟାଇ ଶାସନ ଭାର ଗ୍ରହଣ କରିଥିଲେ। ସେ ଦେଶରେ ସ୍ଥିରତା ଫେରାଇବା ପାଇଁ ପ୍ରୟାସ ଜାରି ରଖିଥିବା ବେଳେ ଲଗାତାର ବିସ୍ଫୋରଣ ଘଟଣା ନୂଆ ଚିନ୍ତା ସୃଷ୍ଟି କରିଛି।
