ତାମିଲନାଡୁରେ ଅଭିନେତ୍ରୀ ତ୍ରିଶାଙ୍କୁ ନେଇ କରାଯାଇଥିବା ଏକ ବିବାଦୀୟ ମନ୍ତବ୍ୟକୁ କେନ୍ଦ୍ର କରି ରାଜନୈତିକ ବିବାଦ ଦେଖାଦେଇଛି। ଏହି ମାମଲାରେ ଉଦୟନିଧି ଷ୍ଟାଲିନଙ୍କ ବିରୋଧରେ ଏଫ୍ଆଇଆର୍ ରୁଜୁ ହେବା ପରେ ପୋଲିସ ତାଙ୍କୁ ଚେନ୍ନାଇସ୍ଥିତ ବାସଭବନରୁ ହିରାସତକୁ ନେଇଛି।
ସୂଚନା ଅନୁସାରେ, କାଭେରୀ ଜଳ ବିବାଦକୁ ନେଇ ତଞ୍ଜାଭୁରରେ ଆୟୋଜିତ ଏକ ପ୍ରତିବାଦ ସଭାରେ ଉଦୟନିଧି ଷ୍ଟାଲିନ ମୁଖ୍ୟମନ୍ତ୍ରୀ ବିଜୟଙ୍କୁ କଡ଼ା ସମାଲୋଚନା କରିଥିଲେ। ସେ ଅଭିଯୋଗ କରିଥିଲେ ଯେ, ତାମିଲନାଡୁ କାଭେରୀର ଗୋଟିଏ ବୁନ୍ଦା ପାଣି ମଧ୍ୟ ପାଇନାହିଁ, କିନ୍ତୁ ମୁଖ୍ୟମନ୍ତ୍ରୀ ଏହି ପ୍ରସଙ୍ଗରେ ନିରବ ରହିଛନ୍ତି।
ଏହି ସମୟରେ ସଭାସ୍ଥଳରେ ଉପସ୍ଥିତ କିଛି ଲୋକ “ତ୍ରିଶା… ତ୍ରିଶା…” ବୋଲି ସ୍ଲୋଗାନ ଦେବା ଆରମ୍ଭ କରିଥିଲେ। ଏହା ପରେ ଉଦୟନିଧି ହସି ହସି ନିଜ ଭାଷଣ ବନ୍ଦ କରି ଏଭଳି ଏକ ମନ୍ତବ୍ୟ ଦେଇଥିଲେ, ଯାହାକୁ ଅନେକ ଲୋକ ଅଭିନେତ୍ରୀ ତ୍ରିଶାଙ୍କ ପ୍ରତି ଇଙ୍ଗିତ କରି କରାଯାଇଥିବା ଦ୍ୱିଅର୍ଥବୋଧକ ଓ ଆପତ୍ତିଜନକ ମନ୍ତବ୍ୟ ବୋଲି କହିଛନ୍ତି। ଏହା ପରେ ଘଟଣାଟି ବଡ଼ ରାଜନୈତିକ ବିବାଦର ରୂପ ନେଇଛି।
ଉଦୟନିଧିଙ୍କ ମନ୍ତବ୍ୟକୁ ବିରୋଧ କରି ବିଭିନ୍ନ ସ୍ଥାନରେ ପ୍ରଦର୍ଶନ କରାଯାଇଛି। ତାଙ୍କ ଘର ବାହାରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି। ଟିଭିକେ (TVK) କର୍ମୀମାନେ ତାଙ୍କ ଘର ସମ୍ମୁଖରେ ବିକ୍ଷୋଭ କରିଥିବା ବେଳେ ବିରୋଧୀ ଦଳ ଉଦୟନିଧିଙ୍କୁ ସାର୍ବଜନୀନ ଭାବେ କ୍ଷମା ମାଗିବାକୁ ଦାବି କରିଛି।
ତାମିଲନାଡୁର ଶାସକ ଦଳ ତାମିଲଗା ୱେତ୍ରି କଝଗମ୍ (TVK) ପକ୍ଷରୁ ଉଦୟନିଧି ଷ୍ଟାଲିନଙ୍କ ବିରୋଧରେ ସ୍ଥାନୀୟ ପୋଲିସ ଏବଂ ଜାତୀୟ ମହିଳା ଆୟୋଗ (NCW) ନିକଟରେ ଅଭିଯୋଗ ଦାଖଲ କରାଯାଇଛି।
ଏହି ଘଟଣାକୁ ନେଇ ବିଜେପି ମଧ୍ୟ କଡ଼ା ପ୍ରତିକ୍ରିୟା ଦେଇଛି। ତାମିଲନାଡୁ ବିଜେପିର ମୁଖ୍ୟ ପ୍ରବକ୍ତା ନାରାୟଣନ ତିରୁପତି ‘X’ରେ ପୋଷ୍ଟ କରି କହିଛନ୍ତି ଯେ, ଉଦୟନିଧିଙ୍କ ଦ୍ୱିଅର୍ଥବୋଧକ ମନ୍ତବ୍ୟ ଅତ୍ୟନ୍ତ ଅଶ୍ଳୀଳ, ନିନ୍ଦନୀୟ ଏବଂ ଲଜ୍ଜାଜନକ। ଏଭଳି ମନ୍ତବ୍ୟ କରିଥିବା ବ୍ୟକ୍ତିଙ୍କୁ ଗିରଫ କରାଯିବା ଉଚିତ ବୋଲି ବିଜେପି ଦାବି କରିଛି।
