ଭୁବନେଶ୍ୱର: ଓଡ଼ିଶା ରାଜନୀତିରେ ପୁଣି ଥରେ ଚର୍ଚ୍ଚା ଜୋର ଧରିଛି। ବିଜେପି ସାଂସଦ ପ୍ରଦୀପ ପୁରୋହିତ ଏକ ବଡ଼ ଦାବି କରି କହିଛନ୍ତି ଯେ, ବିଜୁ ଜନତା ଦଳ (ବିଜେଡି)ର ଏକ ବଡ଼ ଗୋଷ୍ଠୀ ଶୀଘ୍ର NDAରେ ଯୋଗ ଦେଇପାରନ୍ତି। ତାଙ୍କ କହିବା ଅନୁସାରେ, ଏହି ପ୍ରକ୍ରିୟା ଆରମ୍ଭ ହୋଇସାରିଛି ଏବଂ ଆସନ୍ତା ଦୁଇ ମାସ ମଧ୍ୟରେ ଚିତ୍ର ସ୍ପଷ୍ଟ ହୋଇଯିବ।
ପ୍ରଦୀପ ପୁରୋହିତ କହିଛନ୍ତି ଯେ, ତୃଣମୂଳ କଂଗ୍ରେସ ଓ ଶିବସେନା ଭଳି ବିଜେଡି ମଧ୍ୟ ଭାଙ୍ଗିବା ସ୍ଥିତିକୁ ଯାଇପାରେ। ଦଳ ଭିତରେ ଥିବା ଏକ ବଡ଼ ଗୋଷ୍ଠୀ ବିଜେଡିକୁ ନିଜ ନିୟନ୍ତ୍ରଣକୁ ନେଇ NDA ସହ ମିଶିପାରେ କିମ୍ବା ଅଲଗା ହୋଇ ବିଜେପି ସମର୍ଥିତ ନୂଆ ସଂଗଠନ ଗଠନ କରିପାରେ।
ତାଙ୍କ ମତରେ, ବିଜେଡି ନେତୃତ୍ୱ ନିଜ ଦଳର ଅନେକ ନେତାଙ୍କ ବିଶ୍ୱାସ ହରାଇଛି। ନିକଟରେ ବିଜେଡିର ତିନିଜଣ ପୂର୍ବତନ ରାଜ୍ୟସଭା ସାଂସଦ ବିଜେପିରେ ଯୋଗ ଦେଇଥିବା ବେଳେ ଅନେକ ତୃଣମୂଳ ସ୍ତରର ନେତା ଓ କର୍ମୀ ମଧ୍ୟ ଦଳ ଛାଡ଼ୁଥିବା ସେ ଦାବି କରିଛନ୍ତି।
ଏହି ଚର୍ଚ୍ଚା ମଧ୍ୟରେ ଓଡ଼ିଶା ବିଜେପି ସଭାପତି ମନମୋହନ ସାମଲ ମଧ୍ୟ କହିଛନ୍ତି ଯେ କେବଳ ବିଜେଡି ନୁହେଁ, କଂଗ୍ରେସର ମଧ୍ୟ ଅନେକ ନେତା ବିଜେପି ସହ ସମ୍ପର୍କରେ ଅଛନ୍ତି। ସେ କହିଛନ୍ତି ଯେ ପ୍ରତିଦିନ ଉଭୟ ଦଳର କର୍ମୀମାନେ ବିଜେପିରେ ଯୋଗ ଦେଉଛନ୍ତି ଏବଂ ଏନେଇ ଦଳର ମନ ଖୋଲା ରହିଛି। କାହାକୁ ଦଳରେ ନିଆଯିବ, ସେନେଇ ସଂସଦୀୟ ବୋର୍ଡ ନିଷ୍ପତ୍ତି ନେବ।
ତେବେ ବିଜେପିର ଏହି ଦାବିକୁ ବିଜେଡି ଓ କଂଗ୍ରେସ ଦୃଢ଼ ଭାବରେ ଖଣ୍ଡନ କରିଛନ୍ତି।
ବିଜେଡି ନେତା ଅରୁଣ ସାହୁ କହିଛନ୍ତି ଯେ, ବିଜେପି ଭିତରେ ଥିବା ଅସନ୍ତୋଷକୁ ଚାପି ଦେବା ପାଇଁ ଏଭଳି ବୟାନ ଦିଆଯାଉଛି। ସେ କହିଛନ୍ତି, ବିଜେପି କେବେ ବିଜେଡି ନେତାଙ୍କୁ ଦଳରେ ନେଉଛି, ତାହା ଅପେକ୍ଷା କରି ଦେଖିବୁ।
ଅନ୍ୟପଟେ କଂଗ୍ରେସ ନେତା ଅଶୋକ ଦାସ କହିଛନ୍ତି ଯେ, କିଛି ଲୋକ ତଦନ୍ତ ସଂସ୍ଥାର ଭୟରେ ବିଜେପି ସହ ଯୋଗାଯୋଗରେ ଥାଇପାରନ୍ତି। କିନ୍ତୁ କଂଗ୍ରେସର ନେତୃତ୍ୱ ଦୃଢ଼ ଓ ଏକତାବଦ୍ଧ ରହିଛି। ଠିକ୍ ସମୟରେ ଜନତା ଏହାର ଉତ୍ତର ଦେବେ ବୋଲି ସେ କହିଛନ୍ତି।
୨୦୨୪ ସାଧାରଣ ନିର୍ବାଚନରେ ପରାଜୟ ପରେ ବିଜେଡି ଭିତରେ ଗୋଷ୍ଠୀ କନ୍ଦଳ ବଢ଼ୁଥିବା ଚର୍ଚ୍ଚା ଚାଲିଥିବା ବେଳେ ବିଜେପିର ବରିଷ୍ଠ ନେତାଙ୍କ ଏହି ବୟାନ ରାଜନୈତିକ ମହଲରେ ନୂଆ ଚର୍ଚ୍ଚା ସୃଷ୍ଟି କରିଛି। ଆଗାମୀ ଦିନରେ ଓଡ଼ିଶା ରାଜନୀତିରେ କେଉଁ ନୂଆ ସମୀକରଣ ସୃଷ୍ଟି ହେଉଛି, ତାହା ଉପରେ ସମସ୍ତଙ୍କ ନଜର ରହିଛି।
