ଆର୍ଟିଫିସିଆଲ୍ ଇଣ୍ଟେଲିଜେନ୍ସ ବା AI ଦିନକୁ ଦିନ ଅଧିକ ସ୍ମାର୍ଟ ହେଉଛି। ଆଜିକାଲି ଲୋକମାନେ ବିଭିନ୍ନ AI ଚାଟବଟ୍ ବ୍ୟବହାର କରି ନିଜର ଅନେକ କାମ ସହଜରେ କରିପାରୁଛନ୍ତି। ଏହା ସହିତ Prompt Engineering ଶବ୍ଦଟି ମଧ୍ୟ ବେଶ ଚର୍ଚ୍ଚାରେ ରହିଛି।
Prompt Engineering ହେଉଛି ସେହି ପ୍ରକ୍ରିୟା ଯେଉଁଥିରେ AI ଠାରୁ ନିଜ ମନମୁତାବକ ଉତ୍ତର ପାଇବା ପାଇଁ ଠିକ୍ ଭାବରେ ପ୍ରଶ୍ନ କିମ୍ବା ନିର୍ଦ୍ଦେଶ ଦିଆଯାଏ। ଅର୍ଥାତ୍ AI କୁ କ’ଣ କରିବାକୁ ହେବ, ତାହା ମଣିଷଙ୍କୁ ବାରମ୍ବାର କହିବାକୁ ପଡ଼େ।
କିନ୍ତୁ ଏବେ AI ବିଶେଷଜ୍ଞମାନେ କହୁଛନ୍ତି ଯେ ଭବିଷ୍ୟତରେ Loop Engineering ଯୁଗ ଆସିପାରେ। ଏହି ନୂଆ ବ୍ୟବସ୍ଥାରେ AI କୁ ବାରମ୍ବାର ନିର୍ଦ୍ଦେଶ ଦେବାର ଆବଶ୍ୟକତା ରହିବ ନାହିଁ।
Loop Engineering ଏକ ଏଭଳି ପ୍ରଯୁକ୍ତି, ଯେଉଁଠାରେ ଥରେ ସମ୍ପୂର୍ଣ୍ଣ ସିଷ୍ଟମକୁ ସେଟ୍ କରିଦେଲେ AI ନିଜେ ସବୁ କାମ ପରିଚାଳନା କରିବ। AI ନିଜେ ଅନ୍ୟ AI ଏଜେଣ୍ଟଙ୍କୁ ନିର୍ଦ୍ଦେଶ ଦେବ, କାମ କରାଇବ ଏବଂ ଶେଷରେ ଫଳାଫଳ ଯାଞ୍ଚ ମଧ୍ୟ କରିବ।
AI କମ୍ପାନୀ Anthropicର Claude Code ଟିମ୍ ମୁଖ୍ୟ Boris Cherny ନିକଟରେ କହିଛନ୍ତି ଯେ ସେ ଏବେ ନିଜେ Prompt ଲେଖୁନାହାନ୍ତି। ଏହି କାମ ଏକ AI ଆଧାରିତ ସିଷ୍ଟମ କରୁଛି। ତାଙ୍କ କହିବା ଅନୁସାରେ, ଏବେ ଏକ AI ଏଜେଣ୍ଟ Claudeକୁ ନିର୍ଦ୍ଦେଶ ଦେଉଛି ଏବଂ ସମ୍ପୂର୍ଣ୍ଣ କାର୍ଯ୍ୟକୁ ସମନ୍ୱୟ କରୁଛି।
Loop Engineering କିଛି ଗୁରୁତ୍ୱପୂର୍ଣ୍ଣ ବ୍ୟବସ୍ଥା ଉପରେ ଆଧାରିତ। ସେଥିରୁ ଗୋଟିଏ ହେଉଛି Automation। ଏହା ମାଧ୍ୟମରେ AI ଗୋଟିଏ କାମକୁ ବାରମ୍ବାର ଏବଂ ନିରନ୍ତର ଭାବରେ କରିପାରିବ।
ଏହା ସହିତ Multiple Agents ବ୍ୟବସ୍ଥା ରହିଛି। ଏଥିରେ ଏକା ସମୟରେ ଅନେକ AI ଏଜେଣ୍ଟ ଭିନ୍ନ ଭିନ୍ନ କାମ କରିପାରିବେ। ଫଳରେ କାମ ଅଧିକ ଶୀଘ୍ର ସମ୍ପନ୍ନ ହେବ।
AIକୁ ଉନ୍ନତ ନିଷ୍ପତ୍ତି ନେବା ପାଇଁ ବିଭିନ୍ନ Skill ଓ Knowledge ମଧ୍ୟ ଦିଆଯାଇଥାଏ। ପ୍ରୋଜେକ୍ଟ ସମ୍ପର୍କିତ ତଥ୍ୟ, ନିୟମ ଏବଂ ବିଶେଷ Prompt ମାଧ୍ୟମରେ AIକୁ ତାଲିମ ଦିଆଯାଏ।
Loop Engineeringରେ Plug-ins ଓ Connectors ମଧ୍ୟ ଗୁରୁତ୍ୱପୂର୍ଣ୍ଣ। ଏହା ମାଧ୍ୟମରେ AI ବାହ୍ୟ ଡାଟାବେସ୍, ସଫ୍ଟୱେର ଏବଂ ଅନ୍ୟାନ୍ୟ ଟୁଲ୍ ସହ ଯୋଡ଼ି ହୋଇ କାମ କରିପାରେ।
ଏହା ସହିତ Sub-Agents ବ୍ୟବସ୍ଥା ମଧ୍ୟ ରହିଛି। ଗୋଟିଏ AI ଏଜେଣ୍ଟ କାମ କରୁଥିବା ବେଳେ ଅନ୍ୟ ଏକ ଏଜେଣ୍ଟ ସେହି କାମକୁ ଯାଞ୍ଚ କରିପାରେ। ଏଥିରେ ତ୍ରୁଟିର ସମ୍ଭାବନା କମିଯାଏ।
ବିଶେଷଜ୍ଞମାନଙ୍କ କହିବା ଅନୁସାରେ, Memory System ମଧ୍ୟ Loop Engineeringର ଏକ ବଡ଼ ଅଂଶ। ସାଧାରଣ AI ମଡେଲ୍ ପୂର୍ବ ଆଲୋଚନା ମନେ ରଖିନଥାଏ। ତେଣୁ ଜରୁରୀ ତଥ୍ୟ, ପ୍ରୋଜେକ୍ଟ ଇତିହାସ ଏବଂ ଅଧାରେ ରହିଥିବା କାମଗୁଡ଼ିକୁ ବାହ୍ୟ ସିଷ୍ଟମରେ ସଂରକ୍ଷଣ କରାଯାଏ।
AI କ୍ଷେତ୍ରରେ ଦ୍ରୁତ ବିକାଶ ଚାଲିଥିବା ବେଳେ Loop Engineering ଭବିଷ୍ୟତରେ ମଣିଷଙ୍କ କାର୍ଯ୍ୟଶୈଳୀକୁ ବଦଳାଇ ଦେଇପାରେ ବୋଲି ଚର୍ଚ୍ଚା ହେଉଛି।
