ସ୍ମାର୍ଟଫୋନ୍ ପରେ ଏବେ ସ୍ମାର୍ଟ ଗ୍ଲାସେସ୍ କିମ୍ବା ସ୍ମାର୍ଟ ଚଷମାକୁ ଟେକ୍ନୋଲୋଜି ଦୁନିଆର ପରବର୍ତ୍ତୀ ବଡ଼ ଉଦ୍ଭାବନ ବୋଲି ଦେଖାଯାଉଛି। ଗୁଗୁଲ, ସାମସଙ୍ଗ ଓ ଆପଲ୍ ଭଳି ବଡ଼ କମ୍ପାନୀମାନେ ଏହି ସ୍ମାର୍ଟ ଚଷମା ଉପରେ କାମ କରୁଛନ୍ତି। ଏବେ ଏହି ଚଷମାରେ ଏଆଇ (AI) ଫିଚର ଯୋଡ଼ାଯାଉଥିବାରୁ ଏହାର ବ୍ୟବହାର ଆହୁରି ବଢ଼ିଛି।
କିନ୍ତୁ ଏହି ନୂଆ ଟେକ୍ନୋଲୋଜିକୁ ନେଇ ଚିନ୍ତା ମଧ୍ୟ ବଢ଼ୁଛି। ଆମେରିକାର ଇଲିନୟସ୍ ରାଜ୍ୟରେ ଗାଡ଼ି ଚାଳକମାନଙ୍କ ପାଇଁ ଏଆଇ ସ୍ମାର୍ଟ ଚଷମା ବ୍ୟବହାର ଉପରେ ପ୍ରତିବନ୍ଧକ ଲଗାଇବାକୁ ଆଇନ ଅଣାଯାଉଛି।
ରିପୋର୍ଟ ଅନୁସାରେ, ଇଲିନୟସ୍ରେ ଏହି ସମ୍ପର୍କିତ ବିଲ୍ ପାସ୍ ହୋଇସାରିଛି। ଏବେ ରାଜ୍ୟପାଳଙ୍କ ମଞ୍ଜୁରି ମିଳିଲେ ଏହା ଆଇନର ରୂପ ନେବ। ଯଦି ଏହା ଲାଗୁ ହୁଏ, ତେବେ ଗାଡ଼ି ଚାଳକଙ୍କ ପାଇଁ ସ୍ମାର୍ଟ ଚଷମା ଉପରେ ପ୍ରତିବନ୍ଧକ ଲଗାଇବାରେ ଇଲିନୟସ୍ ଆମେରିକାର ପ୍ରଥମ ରାଜ୍ୟ ହେବ।
ଏହି ଆଇନ ଅନୁସାରେ ଡିସ୍ପ୍ଲେ ଏବଂ ଏଆଇ ସୁବିଧା ଥିବା ସମସ୍ତ ପ୍ରକାର ସ୍ମାର୍ଟ ଚଷମା ଉପରେ କଟକଣା ଲାଗିବ। ଅର୍ଥାତ୍ ଚାଳକମାନେ ସ୍ମାର୍ଟ ଚଷମା ପିନ୍ଧି ଗାଡ଼ି ଚଳାଇପାରିବେ ନାହିଁ।
ନିୟମ ଭଙ୍ଗ କଲେ ପ୍ରାୟ ୭ ହଜାରରୁ ୧୫ ହଜାର ଟଙ୍କା ପର୍ଯ୍ୟନ୍ତ ଜରିମାନା ଦେବାକୁ ପଡ଼ିପାରେ। ଯଦି ସ୍ମାର୍ଟ ଚଷମା ବ୍ୟବହାର କରିବା ଯୋଗୁଁ ଦୁର୍ଘଟଣା ଘଟେ ଏବଂ କାହାର ଆହତ କିମ୍ବା ମୃତ୍ୟୁ ହୁଏ, ତେବେ ସମ୍ପୃକ୍ତ ଚାଳକଙ୍କ ବିରୋଧରେ ଆପରାଧିକ ମାମଲା ମଧ୍ୟ ରୁଜୁ ହୋଇପାରେ।
ବିଶେଷଜ୍ଞମାନଙ୍କ କହିବା ଅନୁସାରେ, ସ୍ମାର୍ଟ ଚଷମା ବ୍ୟବହାର କରିବା ସମୟରେ ଚାଳକଙ୍କ ଆଖି ସାମ୍ନାରେ ବିଭିନ୍ନ ସୂଚନା ଦେଖାଯାଏ। ଏହା ନେଭିଗେସନ୍, ମେସେଜ୍ କିମ୍ବା ସୋସିଆଲ ମିଡିଆ ନୋଟିଫିକେସନ୍ ହୋଇପାରେ। ଏଭଳି ସୂଚନା ହଠାତ୍ ଦେଖାଗଲେ ଚାଳକଙ୍କ ଧ୍ୟାନ ରାସ୍ତାରୁ ହଟିଯାଇପାରେ ଏବଂ ଦୁର୍ଘଟଣାର ଆଶଙ୍କା ବଢ଼ିପାରେ।
ଏହି କାରଣରୁ ଅନେକ ସ୍ଥାନରେ କୋର୍ଟ, ପରୀକ୍ଷା କେନ୍ଦ୍ର ଏବଂ ସାଧାରଣ ସ୍ଥାନଗୁଡ଼ିକରେ ସ୍ମାର୍ଟ ଚଷମା ପୂର୍ବରୁ ନିଷିଦ୍ଧ କରାଯାଇଛି। ବର୍ତ୍ତମାନ ଡ୍ରାଇଭିଂ ସମୟରେ ଏହାର ବ୍ୟବହାରକୁ ନେଇ ମଧ୍ୟ କଡ଼ା ନିୟମ ଆଣିବାକୁ ପଦକ୍ଷେପ ନିଆଯାଉଛି।
ଟେକ୍ନୋଲୋଜି ଯେତେ ଆଗକୁ ବଢ଼ୁଛି, ସୁରକ୍ଷାକୁ ନେଇ ସେତେ ଅଧିକ ସତର୍କତା ଅବଲମ୍ବନ କରିବା ଆବଶ୍ୟକ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
