ନୂଆଦିଲ୍ଲୀ, ଜୁନ୍ ୨୫: ଭାରତର ସ୍ୱଦେଶୀ ଏୟାରବୋର୍ନ ଆର୍ଲି ୱାର୍ଣ୍ଣିଂ ଆଣ୍ଡ କଣ୍ଟ୍ରୋଲ (AEW&C) ସିଷ୍ଟମ ‘ନେତ୍ର’କୁ Final Operational Clearance (FOC) ମିଳିଛି। ଡିଆରଡିଓ (DRDO) ଦ୍ୱାରା ବିକଶିତ ଏହି ଅତ୍ୟାଧୁନିକ ବ୍ୟବସ୍ଥା ଭାରତୀୟ ବାୟୁସେନାର ନଜରଦାରି ଓ ଯୁଦ୍ଧ କ୍ଷମତାକୁ ଆହୁରି ଶକ୍ତିଶାଳୀ କରିବ।
ସୂଚନା ଅନୁସାରେ, ଅପରେସନ୍ ସିନ୍ଦୂର ସମୟରେ ‘ନେତ୍ର’ ସଫଳ ଭାବେ ନିଜର କାର୍ଯ୍ୟକ୍ଷମତା ପ୍ରମାଣ କରିଥିଲା। ଏହା ପରେ ଏହାକୁ ଅନ୍ତିମ ଅପରେସନାଲ୍ କ୍ଲିୟରାନ୍ସ ମିଳିବାର ରାସ୍ତା ସ୍ପଷ୍ଟ ହୋଇଥିଲା।
‘ନେତ୍ର’ ହେଉଛି ଏପରି ଏକ ବ୍ୟବସ୍ଥା, ଯାହା ଦୀର୍ଘ ଦୂରତା ପର୍ଯ୍ୟନ୍ତ ଆକାଶପଥରେ ହେଉଥିବା କାର୍ଯ୍ୟକଳାପ ଉପରେ ନଜର ରଖିପାରେ। ଏହା ଶତ୍ରୁପକ୍ଷର ବିମାନ ଓ ମିସାଇଲକୁ ସମୟ ପୂର୍ବରୁ ଚିହ୍ନଟ କରିବା ସହ ଯୁଦ୍ଧ ବିମାନଗୁଡ଼ିକୁ ରିଅଲ୍ ଟାଇମରେ ଆବଶ୍ୟକ ଦିଗନିର୍ଦ୍ଦେଶ ମଧ୍ୟ ଦେଇପାରିବ।
ଡିଆରଡିଓର ସେଣ୍ଟର ଫର୍ ଏୟାରବୋର୍ନ ସିଷ୍ଟମ୍ସ (CABS)ର ବୈଜ୍ଞାନିକ ଏବଂ ନିର୍ଦ୍ଦେଶିକା କେ. ରାଜଲକ୍ଷ୍ମୀ ମେନନ୍ ଏହି ସଫଳତାକୁ ଦେଶ, ଭାରତୀୟ ବାୟୁସେନା ଓ ପ୍ରତ୍ୟେକ ଭାରତୀୟଙ୍କ ସ୍ୱପ୍ନ ସହ ଯୋଡ଼ିଛନ୍ତି। ସେ କହିଛନ୍ତି, ଏହା ଭାରତର ଗର୍ବ ଏବଂ ବାୟୁସେନା ପାଇଁ ଏକ ମୂଲ୍ୟବାନ ସଫଳତା।
ସେ କହିଛନ୍ତି, ଭାରତୀୟ ବାୟୁସେନା ପାଇଁ ସ୍ୱଦେଶୀ AEW&C ସିଷ୍ଟମ୍ ବିକଶିତ କରିବାର ପ୍ରୟାସ ୧୯୮୩ ମସିହାରେ ଆରମ୍ଭ ହୋଇଥିଲା। ସେତେବେଳେ ଡିଆରଡିଓ ଅଧୀନରେ ‘ଏରୋସ୍ପେସ୍ ସର୍ଭିଲାନ୍ସ ମନିଟରିଂ ଆଣ୍ଡ କଣ୍ଟ୍ରୋଲ’ ପ୍ରକଳ୍ପକୁ ଅନୁମୋଦନ ମିଳିଥିଲା। ଏହାର କାର୍ଯ୍ୟାଳୟ ବେଙ୍ଗାଲୁରୁରେ ଏବଂ ମୁଖ୍ୟାଳୟ ଦିଲ୍ଲୀରେ ସ୍ଥାପନ କରାଯାଇଥିଲା। ‘ପ୍ରୋଜେକ୍ଟ ଗାର୍ଜିଆନ୍’ ଅଧୀନରେ ପ୍ରାରମ୍ଭିକ ଗବେଷଣା କରାଯାଇଥିଲା ଏବଂ ବୈଜ୍ଞାନିକ ଓ ବାୟୁସେନା ଅଧିକାରୀଙ୍କ ଏକ ଛୋଟ ଦଳ HS-748 Avro ବିମାନ ଉପରେ ଏହି ବ୍ୟବସ୍ଥାର ବିକାଶ କରିଥିଲେ।
‘ନେତ୍ର’କୁ ଭାରତୀୟ ବାୟୁସେନାର ଆକାଶରେ ଉଡ଼ୁଥିବା ‘ଆଖି’ ବୋଲି ମଧ୍ୟ କୁହାଯାଉଛି। କାରଣ ଏହା ଦୂରରୁ ଶତ୍ରୁର କାର୍ଯ୍ୟକଳାପ ଉପରେ ନଜର ରଖିବା, ବିପଦକୁ ପୂର୍ବରୁ ଚିହ୍ନଟ କରିବା ଏବଂ ଯୁଦ୍ଧ ସମୟରେ କମାଣ୍ଡ ଓ କଣ୍ଟ୍ରୋଲ ବ୍ୟବସ୍ଥାକୁ ମଜବୁତ କରିବାରେ ବଡ଼ ଭୂମିକା ନେବ।
ଏହି ବ୍ୟବସ୍ଥା ଲମ୍ବା ଦୂରତା ପର୍ଯ୍ୟନ୍ତ ରାଡାର କଭରେଜ୍ ବଢ଼ାଇବା, ଆକାଶପଥର ନଜରଦାରି କରିବା, ଶତ୍ରୁର ଗତିବିଧିକୁ ଠିକ୍ ସମୟରେ ଚିହ୍ନଟ କରିବା ଏବଂ ଯୁଦ୍ଧ ବିମାନକୁ ରିଅଲ୍ ଟାଇମରେ ଦିଗନିର୍ଦ୍ଦେଶ ଦେବାର କ୍ଷମତା ରଖିଛି। ଆଧୁନିକ ଯୁଦ୍ଧରେ ଏପରି ବ୍ୟବସ୍ଥାକୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମନାଯାଏ, କାରଣ ଏହା ଆକାଶରେ ଉଡ଼ୁଥିବା କମାଣ୍ଡ ଓ କଣ୍ଟ୍ରୋଲ ସେଣ୍ଟର ଭଳି କାମ କରେ।
ପ୍ରତିରକ୍ଷା ବିଶେଷଜ୍ଞଙ୍କ ମତରେ, ଅପରେସନ୍ ସିନ୍ଦୂରରେ ସଫଳ ପ୍ରଦର୍ଶନ ଏବଂ ବର୍ତ୍ତମାନ Final Operational Clearance ମିଳିବା ପରେ ‘ନେତ୍ର’ ଭାରତର ସ୍ୱଦେଶୀ ପ୍ରତିରକ୍ଷା ପ୍ରଯୁକ୍ତିର ଏକ ବଡ଼ ସଫଳତା ଭାବେ ପରିଗଣିତ ହେବ। ଏହା କେବଳ ଭାରତୀୟ ବାୟୁସେନାର ଯୁଦ୍ଧ କ୍ଷମତାକୁ ବଢ଼ାଇବ ନୁହେଁ, ବରଂ ପ୍ରତିରକ୍ଷା କ୍ଷେତ୍ରରେ ‘ଆତ୍ମନିର୍ଭର ଭାରତ’ ଲକ୍ଷ୍ୟକୁ ମଧ୍ୟ ଆହୁରି ଶକ୍ତି ଦେବ।
