ଲଗାଣ ବର୍ଷା ଯୋଗୁଁ ହୀରାକୁଦ ଜଳଭଣ୍ଡାରକୁ ବିପୁଳ ପରିମାଣର ପାଣି ପ୍ରବେଶ କରୁଥିବାରୁ ଶୁକ୍ରବାର ସକାଳେ ହୀରାକୁଦ ବନ୍ଧର ଆଉ ୧୦ଟି ଗେଟ୍ ଖୋଲାଯାଇଛି। ଏହା ପୂର୍ବରୁ ବନ୍ଧର ୨ଟି ଗେଟ୍ ଦେଇ ଅତିରିକ୍ତ ବନ୍ୟାଜଳ ନିଷ୍କାସନ କରାଯାଉଥିଲା।
ଶୁକ୍ରବାର ସକାଳ ୬ଟା ସୁଦ୍ଧା ହୀରାକୁଦ ଜଳଭଣ୍ଡାରର ଜଳସ୍ତର ୬୨୩.୫୨ ଫୁଟ୍ ରେକର୍ଡ କରାଯାଇଛି। ବନ୍ଧର ସର୍ବାଧିକ ଜଳଧାରଣ କ୍ଷମତା ୬୩୦ ଫୁଟ୍ ଥିବାବେଳେ ଲଗାତାର ବର୍ଷା ହେତୁ ଜଳଭଣ୍ଡାରକୁ ବହୁ ପରିମାଣର ପାଣି ପ୍ରବେଶ କରୁଛି।
ସୂଚନା ଅନୁସାରେ, ବର୍ତ୍ତମାନ ପ୍ରତି ସେକେଣ୍ଡରେ ପ୍ରାୟ ୩,୬୯,୩୨୨ କ୍ୟୁସେକ୍ ପାଣି ଜଳଭଣ୍ଡାରକୁ ପ୍ରବେଶ କରୁଥିବା ବେଳେ ୬୫,୫୪୩ କ୍ୟୁସେକ୍ ପାଣି ବନ୍ଧରୁ ନିଷ୍କାସନ କରାଯାଉଛି।
ହୀରାକୁଦ ବନ୍ଧର ମୁଖ୍ୟ ଯନ୍ତ୍ରୀ ସଞ୍ଜୟ କୁମାର ଚୌଧୁରୀ କହିଛନ୍ତି ଯେ, ତଳିଆ ଅଞ୍ଚଳର ପରିସ୍ଥିତିକୁ ଦୃଷ୍ଟିରେ ରଖି ଗେଟ୍ ପରିଚାଳନା କରାଯାଉଛି। ବର୍ତ୍ତମାନ ମୁଣ୍ଡଳି ଦେଇ ପ୍ରାୟ ୮ ଲକ୍ଷ କ୍ୟୁସେକ୍ ପାଣି ପ୍ରବାହିତ ହେଉଛି ଏବଂ ଆଗାମୀ ସମୟରେ ଏହି ପ୍ରବାହ ଧୀରେ ଧୀରେ କମିବ ବୋଲି ଆଶା କରାଯାଉଛି।
ସେ କହିଛନ୍ତି, ମୁଣ୍ଡଳି ଦେଇ ୧୦ ଲକ୍ଷ କ୍ୟୁସେକ୍ ପାଣି ପ୍ରବାହିତ ହେଲେ ତାହାକୁ ବନ୍ୟା ପରିସ୍ଥିତି ବୋଲି ବିବେଚନା କରାଯାଏ। ଭାରତୀୟ ପାଣିପାଗ ବିଭାଗ (ଆଇଏମ୍ଡି)ର ପୂର୍ବାନୁମାନ ଅନୁଯାୟୀ, ଅଗଷ୍ଟ ୪ ପର୍ଯ୍ୟନ୍ତ ବଡ଼ ଧରଣର ବର୍ଷାର ସମ୍ଭାବନା ନାହିଁ।
ଅପରାହ୍ନ ୨ଟା ପରେ ଜଳସ୍ଥିତିର ସମୀକ୍ଷା କରାଯାଇ ଆବଶ୍ୟକ ପଡ଼ିଲେ ବନ୍ଧର ଆଉ କିଛି ଗେଟ୍ ଖୋଲାଯିବ କି ନାହିଁ ସେନେଇ ନିଷ୍ପତ୍ତି ନିଆଯିବ।
