ଓଡ଼ିଶାର ପାରାଦୀପକୁ ଦେଶର ଏକ ପ୍ରମୁଖ ଶକ୍ତି ଓ ପେଟ୍ରୋକେମିକାଲ ହବ୍ରେ ପରିଣତ କରିବା ଦିଗରେ ବଡ଼ ପଦକ୍ଷେପ ନେଇଛି ଇଣ୍ଡିଆନ୍ ଅଏଲ୍ କର୍ପୋରେସନ୍ । କମ୍ପାନୀ ପାରାଦୀପରେ ଏପର୍ଯ୍ୟନ୍ତ ମୋଟ ୪୩,୩୫୯ କୋଟି ଟଙ୍କା ବିନିଯୋଗ କରିଥିବା ଘୋଷଣା କରିଛି। ଏହି ବିନିଯୋଗ ଦ୍ୱାରା ପାରାଦୀପ ଓ ଆଖପାଖ ଅଞ୍ଚଳର ୧୨,୫୦୦ରୁ ଅଧିକ ଲୋକଙ୍କୁ ପ୍ରତ୍ୟକ୍ଷ ଓ ପରୋକ୍ଷ ଭାବେ ରୋଜଗାର ଓ ଜୀବିକାର ସୁଯୋଗ ମିଳୁଛି।
କମ୍ପାନୀ ପକ୍ଷରୁ ଦିଆଯାଇଥିବା ସୂଚନା ଅନୁସାରେ, ପାରାଦୀପ ରିଫାଇନେରୀର ବିଭିନ୍ନ ୟୁନିଟ୍ରେ ୩୪,୫୫୫ କୋଟି ଟଙ୍କା, ପଲିପ୍ରୋପିଲିନ୍ ପ୍ଲାଣ୍ଟରେ ୩,୧୫୦ କୋଟି ଟଙ୍କା ଏବଂ ମୋନୋ ଇଥିଲିନ୍ ଗ୍ଲାଇକଲ୍ ପ୍ଲାଣ୍ଟରେ ୫,୬୫୪ କୋଟି ଟଙ୍କା ବିନିଯୋଗ କରାଯାଇଛି।
ଏହା ସହିତ ପାରାଦୀପରେ ନିର୍ମାଣାଧୀନ ପାରାଜାଇଲିନ୍-ପ୍ୟୁରିଫାଇଡ୍ ଟେରେଫ୍ଥାଲିକ୍ ଆସିଡ୍ ପ୍ରକଳ୍ପ ପାଇଁ ଆଉ ୧୩,୮୦୫ କୋଟି ଟଙ୍କା ବିନିଯୋଗ କରାଯାଉଛି। ଏହି ପ୍ରକଳ୍ପ ସମ୍ପୂର୍ଣ୍ଣ ହେଲେ ପାରାଦୀପର ପେଟ୍ରୋକେମିକାଲ ଶିଳ୍ପ ଆହୁରି ଶକ୍ତିଶାଳୀ ହେବ ବୋଲି କମ୍ପାନୀ କହିଛି।
କେବଳ ପାରାଦୀପ ନୁହେଁ, ଓଡ଼ିଶାର ଅନ୍ୟାନ୍ୟ ଅଞ୍ଚଳରେ ମଧ୍ୟ ନୂଆ ବିନିଯୋଗର ଯୋଜନା ରହିଛି। ଭଦ୍ରକ ଟେକ୍ସଟାଇଲ୍ ପାର୍କ ପାଇଁ MCPI ପ୍ରାଇଭେଟ୍ ଲିମିଟେଡ୍ ସହ ମିଳିତ ଭାବେ ୪,୩୮୨ କୋଟି ଟଙ୍କା ବିନିଯୋଗ କରାଯିବ। ସେହିପରି ପରିବେଶ ଅନୁକୂଳ ସସ୍ଟେନେବଲ୍ ଏଭିଏସନ୍ ଫ୍ୟୁଏଲ୍ ଉତ୍ପାଦନ ପାଇଁ HEFA ପ୍ରଯୁକ୍ତି ଆଧାରିତ ପ୍ରକଳ୍ପରେ ୧,୦୬୪ କୋଟି ଟଙ୍କା ବିନିଯୋଗ ହେବ।
୨୦୨୫-୨୬ ଆର୍ଥିକ ବର୍ଷରେ ପାରାଦୀପ ରିଫାଇନେରୀ ରେକର୍ଡ ୧୬.୩୫ ମିଲିୟନ୍ ମେଟ୍ରିକ୍ ଟନ୍ ଅଶୋଧିତ ତୈଳ ପ୍ରକ୍ରିୟାକରଣ କରିଛି। ଏହା ସହ ନୂଆ ହାଇଡ୍ରୋଜେନ୍ ଜେନେରେସନ୍ ୟୁନିଟ୍ ଏବଂ ସଲଫର୍ ରିକଭରି ୟୁନିଟ୍ ମଧ୍ୟ କାର୍ଯ୍ୟକ୍ଷମ ହୋଇଛି। PX-PTA ପ୍ରକଳ୍ପ ଅଧୀନରେ ୧.୨ ମିଲିୟନ୍ ଟନ୍ କ୍ଷମତା ବିଶିଷ୍ଟ PTA ୟୁନିଟ୍ର କାମ ଶେଷ ପର୍ଯ୍ୟାୟରେ ପହଞ୍ଚିଛି।
IOCL କହିଛି, ପାରାଦୀପ ରିଫାଇନେରୀରେ କାର୍ଯ୍ୟରତ କର୍ମଚାରୀ, ଠିକା ସଂସ୍ଥା ଓ ସପ୍ଲାଇ ଚେନ୍ ସହ ଜଡ଼ିତ ଲୋକଙ୍କୁ ମିଶାଇ ୧୨,୫୦୦ରୁ ଅଧିକ ଲୋକଙ୍କ ଜୀବିକା ନିର୍ଭର କରୁଛି। ସ୍ଥାନୀୟ ଯୁବକ-ଯୁବତୀଙ୍କ ପାଇଁ ଦକ୍ଷତା ବିକାଶ ଓ ପ୍ରଶିକ୍ଷଣ କାର୍ଯ୍ୟକ୍ରମ ମଧ୍ୟ ଚାଲିଛି।
ଗତ ଆର୍ଥିକ ବର୍ଷରେ ପାରାଦୀପ ରିଫାଇନେରୀ କେନ୍ଦ୍ର ଓ ରାଜ୍ୟ ସରକାରଙ୍କୁ କର ଓ ଶୁଳ୍କ ବାବଦରେ ୩୦,୩୯୨ କୋଟି ଟଙ୍କାରୁ ଅଧିକ ଅବଦାନ ଦେଇଛି।
ପାରାଦୀପ ରିଫାଇନେରୀର ନିର୍ବାହୀ ନିର୍ଦ୍ଦେଶକ କୌଶିକ ବସୁ କହିଛନ୍ତି, ପାରାଦୀପକୁ ବିଶ୍ୱସ୍ତରୀୟ ଶକ୍ତି ଓ ପେଟ୍ରୋକେମିକାଲ କେନ୍ଦ୍ରରେ ପରିଣତ କରିବା ସହ ଦେଶର ଶକ୍ତି ସୁରକ୍ଷା ଏବଂ ସ୍ଥାୟୀ ବିକାଶକୁ ଆହୁରି ମଜବୁତ କରିବା ପାଇଁ IOCL ପ୍ରତିବଦ୍ଧ ରହିଛି।
