ଭୁବନେଶ୍ୱର: ପ୍ରାୟ ୨୩ ବର୍ଷ ଧରି ନିର୍ମାଣାଧୀନ ତାଳଚେର–ବିମଳାଗଡ଼ ନୂତନ ରେଳପଥ ପ୍ରକଳ୍ପ କେବେ ସମ୍ପୂର୍ଣ୍ଣ ହେବ, ତାହା ଏବେ ବି ଅସ୍ପଷ୍ଟ। ରାଜ୍ୟସଭାରେ ପ୍ରଶ୍ନର ଉତ୍ତର ଦେଇ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ଜମି ଅଧିଗ୍ରହଣ, ବନ ଅନୁମୋଦନ ଓ ବିଭିନ୍ନ ଆଇନଗତ ବାଧା ଯୋଗୁଁ ପ୍ରକଳ୍ପ କାମରେ ବିଳମ୍ବ ହେଉଛି। ତେଣୁ ପ୍ରକଳ୍ପ ଶେଷ ହେବା ପାଇଁ କୌଣସି ନିର୍ଦ୍ଦିଷ୍ଟ ସମୟସୀମା ସରକାର ପକ୍ଷରୁ ଦିଆଯାଇନାହିଁ।
୨୦୦୩–୦୪ ରେଳ ବଜେଟରେ ୧୫୦ କିଲୋମିଟର ଲମ୍ବ ବିଶିଷ୍ଟ ଏହି ରେଳପଥ ପ୍ରକଳ୍ପକୁ ₹୭୨୭ କୋଟି ବ୍ୟୟରେ ଅନୁମୋଦନ କରାଯାଇଥିଲା। ବର୍ତ୍ତମାନ ପ୍ରକଳ୍ପର ଆନୁମାନିକ ବ୍ୟୟ ବୃଦ୍ଧି ପାଇ ₹୩,୩୯୦ କୋଟିରେ ପହଞ୍ଚିଛି। ୨୦୨୬ ମାର୍ଚ୍ଚ ସୁଦ୍ଧା ₹୧,୯୦୧ କୋଟି ଖର୍ଚ୍ଚ ହୋଇଥିବା ବେଳେ, ୨୦୨୬–୨୭ ଆର୍ଥିକ ବର୍ଷ ପାଇଁ ₹୯୫୦ କୋଟି ବଜେଟ ବ୍ୟବସ୍ଥା କରାଯାଇଛି।
ପ୍ରକଳ୍ପ ପାଇଁ ଆବଶ୍ୟକ ୮୬୩ ହେକ୍ଟର ଜମି ମଧ୍ୟରୁ ୭୫୬ ହେକ୍ଟର ଅଧିଗ୍ରହଣ ସରିଥିବା ବେଳେ, ଏବେ ବି ୧୦୭ ହେକ୍ଟର ଜମି ଅଧିଗ୍ରହଣ ବାକି ରହିଛି। ଏଥିରେ ୭୭ ହେକ୍ଟର ବେସରକାରୀ, ୫ ହେକ୍ଟର ବନ ଏବଂ ୨୪ ହେକ୍ଟର ସରକାରୀ ଜମି ରହିଛି।
ତାଳଚେରରୁ ଖମାର ପର୍ଯ୍ୟନ୍ତ ୪୮ କିଲୋମିଟର ରେଳପଥରେ ଟ୍ରେନ୍ ଚଳାଚଳ ଆରମ୍ଭ ହୋଇସାରିଛି। ଅନ୍ୟ ସେକ୍ସନଗୁଡ଼ିକରେ ଜମି ଅଧିଗ୍ରହଣ, ସେତୁ ଓ ରେଳ ଓଭରବ୍ରିଜ୍ ନିର୍ମାଣ କାର୍ଯ୍ୟ ଚାଲିଥିବାବେଳେ, ମହୁଲଡିହା–ବିମଳାଗଡ଼ ସେକ୍ସନରେ ବନ ଓ ବନ୍ୟଜନ୍ତୁ ସମ୍ବନ୍ଧୀୟ ଅନୁମୋଦନ ମିଳିବା ପରେ ଉପଲବ୍ଧ ଜମିରେ କାମ ଜାରି ରହିଛି।
ରେଳମନ୍ତ୍ରୀଙ୍କ କହିବା ଅନୁସାରେ, ଜମି ଅଧିଗ୍ରହଣ, ବନ ଅନୁମୋଦନ, ୟୁଟିଲିଟି ସ୍ଥାନାନ୍ତର, ଆଇନଗତ ଅନୁମତି, ଭୌଗୋଳିକ ପରିସ୍ଥିତି ଓ ଆଇନ-ଶୃଙ୍ଖଳା ସମ୍ବନ୍ଧୀୟ ସମସ୍ୟା ପ୍ରକଳ୍ପର ଅଗ୍ରଗତିକୁ ପ୍ରଭାବିତ କରୁଛି। ଫଳରେ, ଦୀର୍ଘ ଦୁଇ ଦଶକ ଧରି ଅପେକ୍ଷାରେ ଥିବା ଏହି ଗୁରୁତ୍ୱପୂର୍ଣ୍ଣ ରେଳ ପ୍ରକଳ୍ପ କେବେ ବାସ୍ତବ ରୂପ ନେବ, ସେ ନେଇ ଏବେ ବି ଅନିଶ୍ଚିତତା ଜାରି ରହିଛି।
