ଲୋକସଭା ନିର୍ବାଚନମଣ୍ଡଳୀର ସୀମା ନିର୍ଦ୍ଧାରଣ ପ୍ରକ୍ରିୟାକୁ ନେଇ ତାମିଲନାଡୁ ବିଧାନସଭାରେ ଏକ ପ୍ରସ୍ତାବ ଆଗତ ହୋଇଛି। ମହିଳା ସଂରକ୍ଷଣକୁ ସମର୍ଥନ କରିବା ସହିତ ବର୍ତ୍ତମାନର ୫୪୩ ଲୋକସଭା ଆସନ ସଂଖ୍ୟାକୁ ଅପରିବର୍ତ୍ତିତ ରଖିବାକୁ ପ୍ରସ୍ତାବରେ ଦାବି କରାଯାଇଛି।ପ୍ରସ୍ତାବର ମୁଖ୍ୟ ଯୁକ୍ତି ହେଉଛି, ଜନସଂଖ୍ୟା ଆଧାରରେ ଭବିଷ୍ୟତରେ ଆସନ ପୁନଃବଣ୍ଟନ ହେଲେ ଦକ୍ଷିଣ ଭାରତୀୟ ରାଜ୍ୟଗୁଡ଼ିକର ସଂସଦୀୟ ପ୍ରତିନିଧିତ୍ୱ କମିପାରେ। ଜନସଂଖ୍ୟା ନିୟନ୍ତ୍ରଣରେ ଆଗରେ ଥିବା ରାଜ୍ୟଗୁଡ଼ିକ ଏପରି ପରିବର୍ତ୍ତନରେ ଅସୁବିଧାରେ ପଡ଼ିପାରନ୍ତି ବୋଲି ଯୁକ୍ତି ରହିଛି।
ପ୍ରସ୍ତାବରେ ତିନୋଟି ପ୍ରମୁଖ ବିଷୟ ଉପରେ ଜୋର ଦିଆଯାଇଛି। ବର୍ତ୍ତମାନର ୫୪୩ ଲୋକସଭା ଆସନକୁ ବଜାୟ ରଖିବା, ପ୍ରତ୍ୟେକ ରାଜ୍ୟକୁ ମିଳିଥିବା ଲୋକସଭା ଆସନ ସଂଖ୍ୟାକୁ ସୁରକ୍ଷିତ ରଖିବା ଏବଂ ରାଜ୍ୟ ବିଧାନସଭାରେ ମହିଳାଙ୍କ ପାଇଁ ୩୩ ପ୍ରତିଶତ ସଂରକ୍ଷଣ ଲାଗୁ କରିବା ଏଥିରେ ସାମିଲ ଅଛି।ଦକ୍ଷିଣ ରାଜ୍ୟଗୁଡ଼ିକର ମତ ହେଉଛି, କେବଳ ଜନସଂଖ୍ୟାକୁ ଆଧାର କରି ସୀମା ନିର୍ଦ୍ଧାରଣ କଲେ ଅଧିକ ଜନସଂଖ୍ୟା ଥିବା ରାଜ୍ୟଗୁଡ଼ିକ ଅଧିକ ଆସନ ପାଇପାରନ୍ତି। ଏହା ରାଜ୍ୟଗୁଡ଼ିକ ମଧ୍ୟରେ ପ୍ରତିନିଧିତ୍ୱର ସନ୍ତୁଳନକୁ ପ୍ରଭାବିତ କରିପାରେ ବୋଲି ଆଶଙ୍କା ପ୍ରକାଶ ପାଇଛି।
