ଗଞ୍ଜେଇ ଚୋରାଚାଲାଣ ପାଇଁ ମାଫିଆମାନେ ନୂଆ ଉପାୟ ଆପଣାଉଥିବା ବେଳେ ମାଲକାନଗିରିରେ ଏଭଳି ଏକ ଘଟଣା ସାମ୍ନାକୁ ଆସିଛି। ଆମ୍ବୁଲାନ୍ସରେ ଲୁଚାଇ ଗଞ୍ଜେଇ ମହାରାଷ୍ଟ୍ରକୁ ନେବା ଉଦ୍ୟମକୁ କାଲିମେଳା ପୁଲିସ ବିଫଳ କରିଛି।
ସୂଚନା ଅନୁଯାୟୀ, ସୁଧାକୋଣ୍ଡା ଜଙ୍ଗଲ ଅଞ୍ଚଳରୁ ଏକ ଆମ୍ବୁଲାନ୍ସକୁ ପୁଲିସ ଜବତ କରିଛି। ଯାଞ୍ଚ ସମୟରେ ଆମ୍ବୁଲାନ୍ସ ଭିତରେ ଥିବା ଏକ ଗୁପ୍ତ ଚାମ୍ବରରୁ ୨୦୦ କିଲୋରୁ ଅଧିକ ଗଞ୍ଜେଇ ମିଳିଥିବା ଜଣାପଡ଼ିଛି।
ଏହି ଘଟଣାରେ ମହାରାଷ୍ଟ୍ରର ଦୁଇ ଜଣଙ୍କୁ ପୁଲିସ ଗିରଫ କରିଛି। ସେମାନେ ଏହି ଅନ୍ତଃରାଜ୍ୟ ଗଞ୍ଜେଇ ଚାଲାଣ ସହ ଜଡ଼ିତ ଥିବା ପୁଲିସ ସନ୍ଦେହ କରୁଛି। ଜବତ ଗଞ୍ଜେଇର ଆନୁମାନିକ ବଜାର ମୂଲ୍ୟ ୨୦ରୁ ୩୦ ଲକ୍ଷ ଟଙ୍କା ମଧ୍ୟରେ ହେବ ବୋଲି ଜଣାପଡ଼ିଛି।
ମାଲକାନଗିରିର ଦୁର୍ଗମ ଅଞ୍ଚଳରୁ ରାଜ୍ୟ ତଥା ଅନ୍ୟ ରାଜ୍ୟକୁ ଗଞ୍ଜେଇ ଚାଲାଣ ନେଇ ପୂର୍ବରୁ ମଧ୍ୟ ଅନେକ ଘଟଣା ସାମ୍ନାକୁ ଆସିଛି। ପୁଲିସ ଓ ଅବକାରୀ ବିଭାଗ ପକ୍ଷରୁ ନିୟମିତ ଚଢ଼ାଉ ଜାରି ରହିଥିଲେ ମଧ୍ୟ ଚୋରାଚାଲାଣକାରୀମାନେ ବିଭିନ୍ନ ଉପାୟରେ ଏହି କାରବାର ଚଳାଇଥିବା ଦେଖାଯାଉଛି।
ନିକଟ ଅତୀତରେ ମଧ୍ୟ କାଲିମେଳା ପୁଲିସ ବିଭିନ୍ନ ସ୍ଥାନରେ ଚଢ଼ାଉ କରି ବିପୁଳ ପରିମାଣର ଗଞ୍ଜେଇ ଜବତ କରିଛି। ବଦଳିଗୁଡ଼ା ଘାଟି ଅଞ୍ଚଳରୁ ଏକ ପିକ୍ଅପ୍ ଗାଡ଼ିରେ ଚାଲାଣ ହେଉଥିବା ୩୨୦ କିଲୋ ଗଞ୍ଜେଇ ମଧ୍ୟ ଜବତ ହୋଇଥିଲା। ଏହା ପଛରେ ଅନ୍ତଃରାଜ୍ୟ ଚୋରାଚାଲାଣ ନେଟୱର୍କ ଥିବା ସନ୍ଦେହରେ ପୁଲିସ ତଦନ୍ତ ଜାରି ରଖିଛି।
ଆମ୍ବୁଲାନ୍ସ ମାଧ୍ୟମରେ ଗଞ୍ଜେଇ ଚାଲାଣ ଘଟଣାରେ ଗିରଫ ଦୁଇ ଅଭିଯୁକ୍ତଙ୍କୁ ପଚରାଉଚରା କରି ଚାଲାଣର ଉତ୍ସ ଓ ଗନ୍ତବ୍ୟସ୍ଥଳ ସମ୍ପର୍କରେ ଅଧିକ ତଥ୍ୟ ହାସଲ କରିବାକୁ ପୁଲିସ ତଦନ୍ତ ଜାରି ରଖିଛି।
