ଝାରସୁଗୁଡ଼ା ଜିଲ୍ଲାର ବେଲପାହାଡ଼ ଥାନା ଅଧୀନ ମୁଚବାହାଲ ଅଞ୍ଚଳରେ ଗୁରୁବାର ଏକ ୪୨ ବର୍ଷୀୟ ବ୍ୟକ୍ତିଙ୍କ ମୃତଦେହ ରାସ୍ତା ଉପରୁ ଉଦ୍ଧାର ହୋଇଛି। ଅଜଣା ଦୁର୍ବୃତ୍ତମାନେ ତାଙ୍କୁ ହତ୍ୟା କରିବା ପରେ ମୃତଦେହକୁ ସର୍ବସାଧାରଣ ରାସ୍ତା ଉପରେ ଫିଙ୍ଗି ଫେରାର ହୋଇଯାଇଥିବା ସନ୍ଦେହ କରାଯାଉଛି।
ମୃତକଙ୍କ ପରିଚୟ ସୃଜନ କୁମାର ଭାବେ ହୋଇଛି। ସେ ମୂଳତଃ ଝାଡ଼ଖଣ୍ଡର ବାସିନ୍ଦା ହୋଇଥିଲେ ମଧ୍ୟ ଗତ ପ୍ରାୟ ୨୦ ବର୍ଷ ଧରି ମୁଚବାହାଲ ଅଞ୍ଚଳରେ ରହୁଥିଲେ। ସ୍ଥାନୀୟ ଖଣି ଅଞ୍ଚଳରେ ସେ ଜଣେ ବ୍ୟବସାୟିକ ଗାଡ଼ି ଚାଳକ ଭାବେ କାମ କରୁଥିଲେ।
ଗୁରୁବାର ସକାଳେ ରାସ୍ତା ଦେଇ ଯାଉଥିବା କିଛି ଲୋକ ରାସ୍ତା ଉପରେ ତାଙ୍କ ମୃତଦେହ ପଡ଼ିଥିବା ଦେଖିଥିଲେ। ପରେ ସେମାନେ ତୁରନ୍ତ ବେଲପାହାଡ଼ ପୋଲିସକୁ ଖବର ଦେଇଥିଲେ।
ଖବର ପାଇ ବେଲପାହାଡ଼ ଥାନା ପୋଲିସ ଏବଂ ବ୍ରଜରାଜନଗର ଏସଡିପିଓ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି।
ବର୍ତ୍ତମାନ ପୋଲିସ ମୃତ୍ୟୁର ପ୍ରକୃତ କାରଣ ଜାଣିବା ସହ ଏହା ପଛରେ କିଏ ଜଡ଼ିତ ଅଛି ସେନେଇ ତଦନ୍ତ ଚଳାଇଛି। ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ସୃଷ୍ଟି ହୋଇଛି।
