କ୍ରିକେଟ୍ ମଇଦାନରେ ନିଜ ବ୍ୟାଟିଂ ପାଇଁ ଚର୍ଚ୍ଚାରେ ଥିବା ରିଙ୍କୁ ସିଂହ ଏବେ ଜୀବନର ନୂଆ ଇନିଂସ୍ ଆରମ୍ଭ କରିବାକୁ ଯାଉଛନ୍ତି। ସମାଜବାଦୀ ପାର୍ଟିର ଲୋକସଭା ସାଂସଦ ପ୍ରିୟା ସରୋଜଙ୍କ ସହ ରିଙ୍କୁଙ୍କ ବିବାହ ତାରିଖ ଚୂଡ଼ାନ୍ତ ହୋଇଛି। ଡିସେମ୍ବର ୪, ୨୦୨୬ରେ ଲକ୍ଷ୍ନୌର ରାମାଡା ହୋଟେଲରେ ଉଭୟଙ୍କ ବିବାହ ଅନୁଷ୍ଠିତ ହେବ। ବିବାହ ତାରିଖ ଓ ସ୍ଥାନ ନିଶ୍ଚିତ ହେବା ପରେ ଉଭୟ ପରିବାରରେ ପ୍ରସ୍ତୁତି ଆରମ୍ଭ ହୋଇଛି।
ରିଙ୍କୁ ଓ ପ୍ରିୟାଙ୍କ ବିବାହରେ କ୍ରିକେଟ୍ ଓ ରାଜନୈତିକ ଜଗତର ଅନେକ ବିଶିଷ୍ଟ ବ୍ୟକ୍ତି ଯୋଗ ଦେବାର ଆଶା ରହିଛି। ରିପୋର୍ଟ ଅନୁସାରେ, ବିବାହ ପୂର୍ବରୁ ମଧ୍ୟ କିଛି କାର୍ଯ୍ୟକ୍ରମ ରହିବ।
୨୦୨୫ରେ ହୋଇଥିଲା ନିର୍ବନ୍ଧ
ରିଙ୍କୁ ସିଂହ ଓ ପ୍ରିୟା ସରୋଜଙ୍କ ନିର୍ବନ୍ଧ ୨୦୨୫ ଜୁନ୍ ୮ ତାରିଖରେ ଲକ୍ଷ୍ନୌର ଦ ସେଣ୍ଟ୍ରମ୍ ହୋଟେଲରେ ହୋଇଥିଲା। ଏହି ଅବସରରେ କ୍ରିକେଟ୍ ଓ ରାଜନୀତି ଜଗତର କିଛି ପ୍ରମୁଖ ବ୍ୟକ୍ତି ମଧ୍ୟ ଉପସ୍ଥିତ ଥିଲେ। ନିର୍ବନ୍ଧ ପରେ ଉଭୟଙ୍କ ସମ୍ପର୍କକୁ ନେଇ ଚର୍ଚ୍ଚା ଆହୁରି ବଢ଼ିଥିଲା।
ଏମିତି ଆରମ୍ଭ ହୋଇଥିଲା ସମ୍ପର୍କ
ରିଙ୍କୁଙ୍କ କହିବା ଅନୁସାରେ, ପ୍ରିୟାଙ୍କ ସହ ତାଙ୍କ ପରିଚୟ ସୋସିଆଲ୍ ମିଡିଆର ଏକ ଫ୍ୟାନ୍ ପେଜ୍ ମାଧ୍ୟମରେ ହୋଇଥିଲା। କ୍ରିକେଟ୍ ସମ୍ପର୍କିତ ଏକ ଫ୍ୟାନ୍ ପେଜ୍ରେ ପ୍ରିୟାଙ୍କ ଫଟୋ ଦେଖିବା ପରେ ରିଙ୍କୁ ତାଙ୍କ ପ୍ରତି ଆଗ୍ରହୀ ହୋଇଥିଲେ। ପରେ ସୋସିଆଲ୍ ମିଡିଆରେ ଉଭୟଙ୍କ ମଧ୍ୟରେ କଥାବାର୍ତ୍ତା ଆରମ୍ଭ ହୋଇଥିଲା।
ଧୀରେ ଧୀରେ ଏହି ପରିଚୟ ଘନିଷ୍ଠ ସମ୍ପର୍କରେ ପରିଣତ ହୋଇଥିଲା। ରିଙ୍କୁଙ୍କ ପୂର୍ବତନ ସାକ୍ଷାତକାରକୁ ଆଧାର କରି ପ୍ରକାଶିତ ରିପୋର୍ଟରେ କୁହାଯାଇଛି ଯେ, ମ୍ୟାଚ୍ ପୂର୍ବରୁ ମଧ୍ୟ ଉଭୟ ନିୟମିତ ଭାବେ କଥା ହେଉଥିଲେ। ସମୟ ସହ ଏହି ସମ୍ପର୍କ ଆହୁରି ମଜବୁତ ହୋଇଥିଲା।
ଏବେ ନିର୍ବନ୍ଧର ପ୍ରାୟ ଦେଢ଼ ବର୍ଷ ପରେ ଉଭୟ ବିବାହ ବନ୍ଧନରେ ବାନ୍ଧିହେବାକୁ ଯାଉଛନ୍ତି। ଡିସେମ୍ବର ୪ରେ ଲକ୍ଷ୍ନୌରେ ହେବାକୁ ଥିବା ଏହି ବିବାହକୁ ନେଇ ଉଭୟଙ୍କ ପରିବାର, ବନ୍ଧୁ ଓ ପ୍ରଶଂସକଙ୍କ ମଧ୍ୟରେ ଉତ୍ସାହ ବଢ଼ିଛି।
