ଦୀର୍ଘ ସମୟର ବିରତି ପରେ ପୁଣିଥରେ ଅଭିନୟ ଜଗତରେ ସକ୍ରିୟ ହେବାକୁ ଯାଉଛନ୍ତି ବଲିଉଡ୍ ଅଭିନେତ୍ରୀ ବିପାଶା ବସୁ। ପ୍ରସିଦ୍ଧ ନିର୍ଦ୍ଦେଶକ ହଂସଲ ମେହତାଙ୍କ ଆଗାମୀ କ୍ରାଇମ୍ ଥ୍ରିଲର୍ ସିରିଜ୍ ‘ବାରାବାଙ୍କି’ରେ ତାଙ୍କୁ ଦେଖିବାକୁ ମିଳିବ। ଏହି ପ୍ରୋଜେକ୍ଟରେ ବିପାଶାଙ୍କ ସହ ସନ୍ନି କୌଶଲ ଓ ବିଶାଲ ଜେଠୱା ମଧ୍ୟ ଅଭିନୟ କରୁଛନ୍ତି। ୧୯୮୪ ମସିହାର ଘଟଣାକ୍ରମକୁ ଆଧାର କରି ସିରିଜ୍ଟିର କାହାଣୀ ପ୍ରସ୍ତୁତ ହୋଇଛି। ଅବସରପ୍ରାପ୍ତ ଆଇପିଏସ୍ ଅଧିକାରୀ ଆଲୋକ ଲାଲଙ୍କ ଲେଖା ‘ଦ ବାରାବାଙ୍କି ନାର୍କୋସ୍’ ପୁସ୍ତକରୁ ଏହାର କାହାଣୀ ପ୍ରେରଣା ପାଇଛି। ଉତ୍ତରପ୍ରଦେଶର ବାରାବାଙ୍କି ଅଞ୍ଚଳରେ ସକ୍ରିୟ ଥିବା ଏକ ବଡ଼ ଅଫିମ ଚୋରାଚାଲାଣ ନେଟୱର୍କ ବିରୋଧରେ ହୋଇଥିବା ପୁଲିସ ଅଭିଯାନକୁ କାହାଣୀର କେନ୍ଦ୍ରରେ ରଖାଯାଇଛି।
ସିରିଜ୍ରେ ବିପାଶାଙ୍କ ଭୂମିକା କ’ଣ ରହିବ, ସେନେଇ ନିର୍ମାତାଙ୍କ ପକ୍ଷରୁ ଏପର୍ଯ୍ୟନ୍ତ ବିସ୍ତୃତ ସୂଚନା ମିଳିନାହିଁ। ତେବେ ତାଙ୍କ ଚରିତ୍ର କାହାଣୀର ମୁଖ୍ୟ ଚରିତ୍ର ସହ ଗଭୀର ଭାବେ ଜଡ଼ିତ ଥିବା ଚର୍ଚ୍ଚା ହେଉଛି। ସନ୍ନି କୌଶଲ ଓ ବିଶାଲ ଜେଠୱାଙ୍କ ଭୂମିକାକୁ ମଧ୍ୟ ଗୋପନ ରଖାଯାଇଛି। ବିପାଶା ଗତ ମାସରୁ ମୁମ୍ବାଇରେ ସିରିଜ୍ର ସୁଟିଂ ଆରମ୍ଭ କରିଥିବା ଜଣାପଡ଼ିଛି। ‘ବାରାବାଙ୍କି’ ଜରିଆରେ ପ୍ରଥମଥର ପାଇଁ ହଂସଲ ମେହତାଙ୍କ ସହ କାମ କରୁଛନ୍ତି ସେ। ବାସ୍ତବ ଘଟଣାରୁ ପ୍ରେରିତ ଏହି କ୍ରାଇମ୍ ଥ୍ରିଲର୍ରେ ପୁଲିସ ଟିମ୍ର ଚ୍ୟାଲେଞ୍ଜ, ଡ୍ରଗ୍ କାର୍ଟେଲ୍ ବିରୋଧୀ ଅଭିଯାନ ଏବଂ ଅପରାଧୀଙ୍କ ନେଟୱର୍କ ଭାଙ୍ଗିବାର ପ୍ରୟାସକୁ ଗୁରୁତ୍ୱ ଦିଆଯାଇଛି।
‘ମେଡ୍ ଇନ୍ ଇଣ୍ଡିଆ: ଦ ଟାଇଟନ୍ ଷ୍ଟୋରି’ ସହ ଜଡ଼ିତ ପ୍ରଭଲୀନ କୌର ଏହି ପ୍ରୋଜେକ୍ଟର ସହ-ପ୍ରଯୋଜକ ଅଛନ୍ତି। ହଂସଲ ମେହତାଙ୍କ ପ୍ରସ୍ତାବ ପାଇବା ପରେ ବିପାଶା ଏହି ସିରିଜ୍ରେ ଅଭିନୟ ପାଇଁ ସମ୍ମତି ଦେଇଥିବା ଜଣାପଡ଼ିଛି। ଦୀର୍ଘ ବିରତି ପରେ ଏକ ଗମ୍ଭୀର କ୍ରାଇମ୍ ଥ୍ରିଲର୍ ଜରିଆରେ ତାଙ୍କ ପରଦାକୁ ଫେରିବା ନିଶ୍ଚିତ ଭାବେ ପ୍ରଶଂସକଙ୍କ ମଧ୍ୟରେ ଉତ୍ସାହ ବଢ଼ାଇଛି।
