ସେପ୍ଟେମ୍ବର ୯-୧୦ UGC-NET ପୁନଃପରୀକ୍ଷା; ପରୀକ୍ଷା କେନ୍ଦ୍ରକୁ ଆଗୁଆ ଯାତ୍ରା ପାଇଁ ପରାମର୍ଶ, ରାଜଧାନୀ ନୂଆଦିଲ୍ଲୀରେ ହେବାକୁ ଥିବା BRICS ଶିଖର ସମ୍ମିଳନୀକୁ ନେଇ ବ୍ୟାପକ ସୁରକ୍ଷା ବ୍ୟବସ୍ଥା ଓ ଟ୍ରାଫିକ କଟକଣା ଲାଗୁ ହେବାକୁ ଥିବାରୁ UGC-NET ପୁନଃପରୀକ୍ଷାର୍ଥୀଙ୍କ ପାଇଁ ସତର୍କତା ଜାରି କରିଛି ଜାତୀୟ ପରୀକ୍ଷା ଏଜେନ୍ସି (NTA)। ସେପ୍ଟେମ୍ବର ୯ ଓ ୧୦ରେ ଦିଲ୍ଲୀରେ UGC-NET ପରୀକ୍ଷା ଦେବାକୁ ଥିବା ପ୍ରାର୍ଥୀମାନଙ୍କୁ ଯାତ୍ରା ପୂର୍ବରୁ ଯଥେଷ୍ଟ ଯୋଜନା କରିବାକୁ NTA ପରାମର୍ଶ ଦେଇଛି।
ଭାରତ ଆସନ୍ତା ସେପ୍ଟେମ୍ବର ୧୨ ଓ ୧୩ରେ ନୂଆଦିଲ୍ଲୀର ଭାରତ ମଣ୍ଡପମ୍ରେ ୧୮ତମ BRICS ନେତା ସମ୍ମିଳନୀ ଆୟୋଜନ କରିବ। ଏଥିପାଇଁ ବିଭିନ୍ନ ଅଞ୍ଚଳରେ ସୁରକ୍ଷା ବ୍ୟବସ୍ଥା ସହ ଟ୍ରାଫିକ ଡାଇଭର୍ସନ୍ ଓ କଟକଣା ଲାଗୁ ହେବାର ସମ୍ଭାବନା ରହିଛି।
NTAର ଆଡଭାଇଜରି ଅନୁସାରେ, UGC-NET ପରୀକ୍ଷା କେନ୍ଦ୍ରଗୁଡ଼ିକ ସିଧାସଳଖ ପ୍ରମୁଖ କଟକଣା ଅଞ୍ଚଳରେ ନଥିଲେ ମଧ୍ୟ ଦିଲ୍ଲୀର ବିଭିନ୍ନ ରାସ୍ତାରେ ଟ୍ରାଫିକ ଜାମ୍, ରୁଟ୍ ଡାଇଭର୍ସନ୍ ଓ ଯାତାୟାତରେ ବିଳମ୍ବ ହୋଇପାରେ। ତେଣୁ ପରୀକ୍ଷାର୍ଥୀମାନେ ପରୀକ୍ଷା କେନ୍ଦ୍ରକୁ ପହଞ୍ଚିବା ପାଇଁ ଆଗୁଆ ବାହାରିବା ସହ ନିଜ ଯାତ୍ରା ଯୋଜନା ପ୍ରସ୍ତୁତ କରିବାକୁ NTA କହିଛି।
ଏପଟେ ଦିଲ୍ଲୀ ପୋଲିସ ମଧ୍ୟ ଟ୍ରାଫିକ ଆଡଭାଇଜରି ଜାରି କରିଛି। ଅନ୍ତର୍ଜାତୀୟ ଅତିଥି ଓ ବିଶିଷ୍ଟ ବ୍ୟକ୍ତିଙ୍କ ଯାତାୟାତକୁ ଦୃଷ୍ଟିରେ ରଖି ସେପ୍ଟେମ୍ବର ୧୧ରୁ ୧୩ ପର୍ଯ୍ୟନ୍ତ ଦିଲ୍ଲୀର ବିଭିନ୍ନ ରାସ୍ତାରେ ସାମୟିକ ଟ୍ରାଫିକ କଟକଣା ଓ ରୁଟ୍ ପରିବର୍ତ୍ତନ ହୋଇପାରେ ବୋଲି ସୂଚନା ଦିଆଯାଇଛି।
ଏଥର UGC-NET ପୁନଃପରୀକ୍ଷାରେ ତିନୋଟି ବିଷୟର ପେପର୍ ରହିଛି। ପ୍ରଶ୍ନପତ୍ରରେ ତ୍ରୁଟି ନେଇ ଅଭିଯୋଗ ପରେ NTA ଇଂରାଜୀ, କମର୍ସ ଓ ସୋସିଓଲୋଜି ବିଷୟର ପୁନଃପରୀକ୍ଷା ଘୋଷଣା କରିଥିଲା।
ସେପ୍ଟେମ୍ବର ୯:
- ଇଂରାଜୀ — ସକାଳ ୯ଟାରୁ ଦ୍ୱିପ୍ରହର ୧୨ଟା
- କମର୍ସ — ଅପରାହ୍ନ ୩ଟାରୁ ସନ୍ଧ୍ୟା ୬ଟା
ସେପ୍ଟେମ୍ବର ୧୦:
- ସୋସିଓଲୋଜି — ସକାଳ ୯ଟାରୁ ଦ୍ୱିପ୍ରହର ୧୨ଟା
UGC-NET ଜୁନ୍ ୨୦୨୬ ପରୀକ୍ଷା ଜୁନ୍ ୨୨ରୁ ୩୦ ମଧ୍ୟରେ ୮୭ଟି ବିଷୟରେ ଆୟୋଜିତ ହୋଇଥିଲା। ଜୁନିୟର ରିସର୍ଚ୍ଚ ଫେଲୋଶିପ୍ (JRF), ଆସିଷ୍ଟାଣ୍ଟ ପ୍ରଫେସର୍ ପଦ ପାଇଁ ଯୋଗ୍ୟତା ଏବଂ PhD ପ୍ରୋଗ୍ରାମରେ ନାମଲେଖା ପାଇଁ ଏହି ପରୀକ୍ଷା ହୋଇଥାଏ।
BRICS ସମ୍ମିଳନୀ ଓ UGC-NET ପୁନଃପରୀକ୍ଷା ଏକା ସମୟରେ ଥିବାରୁ ଦିଲ୍ଲୀରେ ଯାତାୟାତ ଉପରେ ଚାପ ବଢ଼ିପାରେ। ତେଣୁ ପରୀକ୍ଷାର୍ଥୀମାନଙ୍କୁ ଆଡମିଟ୍ କାର୍ଡ, ପରୀକ୍ଷା କେନ୍ଦ୍ରର ଠିକଣା ଯାଞ୍ଚ କରି ଆବଶ୍ୟକ ସମୟରୁ ଯଥେଷ୍ଟ ଆଗରୁ ଘରୁ ବାହାରିବାକୁ NTA ପରାମର୍ଶ ଦେଇଛି।
