ଓଡ଼ିଶାର ରାଜଧାନୀ ଭୁବନେଶ୍ୱର ଦେଶର ସବୁଠାରୁ ଦ୍ରୁତ ଗତିରେ ବଢ଼ୁଥିବା ଇଲେକ୍ଟ୍ରିକ୍ ଭେହିକଲ୍ (ଇଭି) ବଜାର ଭାବେ ଉଭା ହୋଇଛି। ଗୁରୁଗ୍ରାମ ସ୍ଥିତ ଏକ ଅଟୋ-ଟେକ୍ କମ୍ପାନୀ ପକ୍ଷରୁ କରାଯାଇଥିବା ଦେଶବ୍ୟାପୀ ସର୍ଭେ ଅନୁଯାୟୀ, ମେ’ ୨୦୨୫ରୁ ମେ’ ୨୦୨୬ ମଧ୍ୟରେ ଭୁବନେଶ୍ୱରରେ ଇଭି ପଞ୍ଜିକରଣ ୮୪ ପ୍ରତିଶତ ବୃଦ୍ଧି ପାଇଛି।
ସମ୍ପ୍ରତି ପ୍ରକାଶିତ ଏହି ସର୍ଭେ ରିପୋର୍ଟ ଅନୁସାରେ, ଭୁବନେଶ୍ୱର ଦେଶର ଅନେକ ବଡ଼ ସହରକୁ ପଛରେ ପକାଇଛି। ଗୁରୁଗ୍ରାମରେ ୭୫ ପ୍ରତିଶତ ଏବଂ ଜୟପୁରରେ ୭୨ ପ୍ରତିଶତ ବୃଦ୍ଧି ରେକର୍ଡ କରାଯାଇଛି। ସେହିପରି ଆଗ୍ରା, ପାଟନା ଏବଂ ଲୁଧିଆନାରେ ମଧ୍ୟ ବର୍ଷକ ମଧ୍ୟରେ ୫୦ ପ୍ରତିଶତରୁ ଅଧିକ ଅଭିବୃଦ୍ଧି ଦେଖାଯାଇଛି।
ରିପୋର୍ଟରେ କୁହାଯାଇଛି ଯେ, ଦେଶର ଇଭି ବଜାରରେ ବଡ଼ ପରିବର୍ତ୍ତନ ଆସୁଛି। ବର୍ତ୍ତମାନ ଟିୟର-୨ ଏବଂ ଛୋଟ ସହରଗୁଡ଼ିକ ଇଭି ବ୍ୟବହାରକୁ ଆଗକୁ ନେବାରେ ପ୍ରମୁଖ ଭୂମିକା ନେଉଛନ୍ତି। ଏହି ସହରଗୁଡ଼ିକରେ ଇଭି ସମ୍ପର୍କରେ ଲୋକଙ୍କ ଆଗ୍ରହ ଟିୟର-୧ ସହର ତୁଳନାରେ ପ୍ରାୟ ତିନି ଗୁଣ ଦ୍ରୁତ ହାରରେ ବଢ଼ୁଛି। ଶିଳ୍ପ ବିଶେଷଜ୍ଞଙ୍କ ମତରେ, ଏହା ଇଲେକ୍ଟ୍ରିକ୍ ଗାଡ଼ି ପ୍ରତି ଲୋକଙ୍କ ବିଶ୍ୱାସ ବଢ଼ୁଥିବାର ସଙ୍କେତ।
ଅଧ୍ୟୟନରେ ଆହୁରି କୁହାଯାଇଛି ଯେ, ଗତ ଏକ ବର୍ଷ ମଧ୍ୟରେ କେବଳ ଇଭି କିଣିବା ଉଦ୍ଦେଶ୍ୟରେ ସୂଚନା ଖୋଜୁଥିବା ଗ୍ରାହକଙ୍କ ସଂଖ୍ୟା ୬୦ ପ୍ରତିଶତ ବଢ଼ିଛି। ଏହାର ଅର୍ଥ ହେଉଛି, ଅନେକ ଗ୍ରାହକ ବର୍ତ୍ତମାନ ସିଧାସଳଖ ଇଲେକ୍ଟ୍ରିକ୍ ଗାଡ଼ି କିଣିବାକୁ ଆଗ୍ରହ ଦେଖାଉଛନ୍ତି।
ଭୁବନେଶ୍ୱରର ଏହି ସଫଳତାକୁ ଆହୁରି ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି, କାରଣ ଅନେକ ନୂଆ ଇଭି ବଜାରରେ ଚାର୍ଜିଂ ବ୍ୟବସ୍ଥା ଏବେ ବି ପୂର୍ଣ୍ଣ ଭାବେ ବିକଶିତ ହୋଇନାହିଁ। ତଥାପି ରାଜ୍ୟ ସରକାରଙ୍କ ସମ୍ପ୍ରତି ଘୋଷିତ EV Policy 2.0 ଭଳି ପଦକ୍ଷେପ ଭୁବନେଶ୍ୱରରେ ଇଭି ବ୍ୟବସ୍ଥାକୁ ଆଗକୁ ବଢ଼ାଇବାରେ ସହାୟକ ହୋଇଛି ବୋଲି ରିପୋର୍ଟରେ ଉଲ୍ଲେଖ କରାଯାଇଛି।
ସର୍ଭେରେ ଏହା ମଧ୍ୟ ସାମ୍ନାକୁ ଆସିଛି ଯେ, ଗ୍ରାହକଙ୍କ ପସନ୍ଦରେ ପରିବର୍ତ୍ତନ ହେଉଛି। ବର୍ତ୍ତମାନ ବଡ଼ ଆକାରର ଏବଂ ଅଧିକ ସୁବିଧା ଥିବା ଇଲେକ୍ଟ୍ରିକ୍ ଏସୟୁଭି ପ୍ରତି ଲୋକଙ୍କ ଆଗ୍ରହ ବଢ଼ିଛି। ମୋଟ ଇଭି ଚାହିଦାର ୮୨.୫ ପ୍ରତିଶତ ଏସୟୁଭି ରହିଥିବା ବେଳେ ଏହାର ବାର୍ଷିକ ଅଭିବୃଦ୍ଧି ୩୦.୮ ପ୍ରତିଶତ ରହିଛି। ଅନ୍ୟପଟେ ହ୍ୟାଚବ୍ୟାକ୍ ଗାଡ଼ିର ଚାହିଦା ପ୍ରାୟ ୧୧ ପ୍ରତିଶତ ରହିଛି।
ରିପୋର୍ଟରେ ଆହୁରି କୁହାଯାଇଛି ଯେ, ଗାଡ଼ି କିଣିବା ପୂର୍ବରୁ ଗ୍ରାହକମାନେ ବର୍ତ୍ତମାନ ଚଳାଚଳ ଖର୍ଚ୍ଚ ଓ ଗାଡ଼ିର ରେଞ୍ଜ ଉପରେ ଅଧିକ ଧ୍ୟାନ ଦେଉଛନ୍ତି। ମେ’ ୨୦୨୬ରେ ଇଭି ମାଇଲେଜ୍ ଗଣନା ସମ୍ବନ୍ଧୀୟ ସର୍ଚ୍ଚ ୨୪୨ ପ୍ରତିଶତ ବୃଦ୍ଧି ପାଇଥିବା ବେଳେ, ଏହା ଦର୍ଶାଉଛି ଯେ ଗ୍ରାହକମାନେ ଗାଡ଼ି କିଣିବା ପୂର୍ବରୁ ଖର୍ଚ୍ଚ ଓ ବ୍ୟବହାର ସମ୍ପର୍କରେ ଅଧିକ ସଚେତନ ହେଉଛନ୍ତି।
