କନକ ବ୍ୟୁରୋ: ପ୍ରାୟ ଏକ ସପ୍ତାହର ପ୍ରତିବନ୍ଧକ ପରେ ଟେଲିଗ୍ରାମ ପୁଣିଥରେ ବ୍ୟବହାରକାରୀଙ୍କ ପାଇଁ ଉପଲବ୍ଧ ହୋଇଛି। ସରକାରଙ୍କ ଦ୍ୱାରା ନିର୍ଦ୍ଧାରିତ ସମୟସୀମା ଶେଷ ହେବା ପରେ ଜୁନ୍ ୨୨ ମଧ୍ୟରାତ୍ରିରେ ଗୁଗୁଲ୍ ପ୍ଲେ ଷ୍ଟୋରରୁ ଟେଲିଗ୍ରାମ ଉପରେ ଲାଗିଥିବା ପ୍ରତିବନ୍ଧକ ହଟାଯାଇଛି। ତେବେ ଆପଲ୍ ଆପ୍ ଷ୍ଟୋରରେ ସକାଳ ୧୦ଟା ପର୍ଯ୍ୟନ୍ତ ଆପ୍ଟି ଡିଲିଷ୍ଟ ଅବସ୍ଥାରେ ରହିଥିଲା।
ଯଦିଓ ଟେଲିଗ୍ରାମ ଉପରୁ ମୁଖ୍ୟ ପ୍ରତିବନ୍ଧକ ହଟାଯାଇଛି, ତଥାପି ଏହାର ସମସ୍ତ ସୁବିଧା ଏପର୍ଯ୍ୟନ୍ତ ପୂର୍ଣ୍ଣ ଭାବେ ପୁନଃସ୍ଥାପିତ ହୋଇନାହିଁ। ବିଶେଷକରି ମେସେଜ୍ ଏଡିଟିଂ ଫିଚର୍ ଉପରେ ଏବେ ମଧ୍ୟ କଟକଣା ଜାରି ରହିଛି। ସରକାରଙ୍କ ନିର୍ଦ୍ଦେଶ ଅନୁଯାୟୀ, ଜୁନ୍ ୩୦ ପର୍ଯ୍ୟନ୍ତ ଏହି ସୁବିଧା ବନ୍ଦ ରହିବ।
ଏହି ପଦକ୍ଷେପକୁ ନେଇ ଟେଲିଗ୍ରାମର ସିଇଓ ପାଭେଲ ଡୁରୋଭ ଅସନ୍ତୋଷ ପ୍ରକାଶ କରିଛନ୍ତି। ତାଙ୍କ ମତରେ, କେତେକ ବ୍ୟକ୍ତିଙ୍କ ଅନୁଚିତ କାର୍ଯ୍ୟ ପାଇଁ ସମଗ୍ର ପ୍ଲାଟଫର୍ମ ଉପରେ ପ୍ରତିବନ୍ଧକ ଲାଗୁ କରିବା ଉଚିତ୍ ନୁହେଁ।
ଏହି ଘଟଣା ଡିଜିଟାଲ୍ ପ୍ଲାଟଫର୍ମଗୁଡ଼ିକର ଜବାବଦେହିତା ଏବଂ ବିଷୟବସ୍ତୁ ନିୟନ୍ତ୍ରଣକୁ ନେଇ ସରକାର ଓ ପ୍ରଯୁକ୍ତି କମ୍ପାନୀମାନଙ୍କ ମଧ୍ୟରେ ବଢ଼ୁଥିବା ମତଭେଦକୁ ସାମ୍ନାକୁ ଆଣିଛି। ବିଶେଷଜ୍ଞମାନଙ୍କ ମତରେ, ଭବିଷ୍ୟତରେ ଭୁଲ ସୂଚନା ପ୍ରଚାର, ପରୀକ୍ଷା ସମ୍ବନ୍ଧୀୟ ଠକେଇ ଏବଂ ଅବୈଧ ବିଷୟବସ୍ତୁ ପ୍ରସାରଣକୁ ରୋକିବା ପାଇଁ ସରକାର ଟେଲିଗ୍ରାମ ସମେତ ଅନ୍ୟାନ୍ୟ ମେସେଜିଂ ପ୍ଲାଟଫର୍ମ ଉପରେ ଅଧିକ କଠୋର ନିୟମ ଲାଗୁ କରିପାରନ୍ତି।
