ବିହାରର ବାଙ୍କିପୁର ବିଧାନସଭା ଉପନିର୍ବାଚନକୁ ନେଇ ରାଜନୈତିକ ତାତି ବଢ଼ିଛି। ଜନ ସୁରାଜ ପାର୍ଟିର ସୂତ୍ରଧାର ପ୍ରଶାନ୍ତ କିଶୋର ଏହି ନିର୍ବାଚନ ଲଢ଼ିବେ ବୋଲି ଘୋଷଣା ହେବା ପରେ ବିଜେପି ତାଙ୍କୁ କଡ଼ା ସମାଲୋଚନା କରିଛି।
ବିଜେପି ସାଂସଦ ମନନ ମିଶ୍ର କହିଛନ୍ତି, ଗତ ବିଧାନସଭା ନିର୍ବାଚନରେ ପ୍ରଶାନ୍ତ କିଶୋର ୨୦୦ରୁ ଅଧିକ ପ୍ରାର୍ଥୀ ଦେଇଥିଲେ। ସେହି ନିର୍ବାଚନର ଫଳାଫଳ ସମସ୍ତଙ୍କ ସାମ୍ନାରେ ଅଛି। ଏଥର ସେ ନିଜର ଜାମିନ ବଞ୍ଚାଇ ପାରିଲେ ସେହିଟା ହିଁ ବଡ଼ କଥା ବୋଲି ସେ କହିଛନ୍ତି।
ସୂଚନାଯୋଗ୍ୟ ଯେ, ବିଜେପି ନେତା ନିତିନ ନବୀନ ରାଜ୍ୟସଭାକୁ ନିର୍ବାଚିତ ହେବା ପରେ ବିହାର ବିଧାନସଭା ସଦସ୍ୟ ପଦରୁ ଇସ୍ତଫା ଦେଇଥିଲେ। ଏହାପରେ ବାଙ୍କିପୁର ବିଧାନସଭା ଆସନ ଖାଲି ପଡ଼ିଥିଲା। ଗତ ସପ୍ତାହରେ ଉପନିର୍ବାଚନ କାର୍ଯ୍ୟସୂଚୀ ଘୋଷଣା ପରେ ଜନ ସୁରାଜ ପାର୍ଟିର କୋର କମିଟି ବୈଠକରେ ପ୍ରଶାନ୍ତ କିଶୋରଙ୍କୁ ପ୍ରାର୍ଥୀ କରିବାକୁ ଔପଚାରିକ ଭାବେ ନିଷ୍ପତ୍ତି ନିଆଯାଇଥିଲା।
ଏହା ପୂର୍ବରୁ ପ୍ରଶାନ୍ତ କିଶୋର କହିଥିଲେ ଯେ, ବାଙ୍କିପୁରର ଲୋକମାନେ ବିହାରର ସବୁଠାରୁ ଶିକ୍ଷିତ ଓ ସଚେତନ ଭୋଟର। ଯଦି ସେମାନେ ତାଙ୍କ ଉପରେ ବିଶ୍ୱାସ କରନ୍ତି, ତେବେ ସେ ଭୋଟ ଦେବାକୁ ଅନୁରୋଧ କରିବେ। ସେ ଆହୁରି କହିଥିଲେ ଯେ, ବିଧାନସଭାରେ ତାଙ୍କ ଦଳର ଜଣେ ମାତ୍ର ବିଧାୟକ ଥିଲେ ମଧ୍ୟ ସେ ଅନ୍ୟ ୨୪୨ ଜଣ ବିଧାୟକଙ୍କଠାରୁ ଅଧିକ ପ୍ରଭାବଶାଳୀ ସାବ୍ୟସ୍ତ ହେବେ। ଏହି ଉପନିର୍ବାଚନ ସମ୍ରାଟ ଚୌଧୁରୀଙ୍କ ଦୁଇ ମାସର ସରକାରର କାର୍ଯ୍ୟଦକ୍ଷତା ଉପରେ ଜନମତ ସଂଗ୍ରହ ହେବ ବୋଲି ମଧ୍ୟ ସେ କହିଥିଲେ।
ବାଙ୍କିପୁର ବିଧାନସଭା ଉପନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ ପ୍ରକ୍ରିୟା ସୋମବାରଠାରୁ ଆରମ୍ଭ ହୋଇଛି ଏବଂ ଏହା ଜୁଲାଇ ୧୩ ପର୍ଯ୍ୟନ୍ତ ଚାଲିବ। ଜୁଲାଇ ୩୦ରେ ଭୋଟ ଗ୍ରହଣ ହେବ ଏବଂ ଅଗଷ୍ଟ ୩ରେ ଭୋଟ ଗଣତି କରାଯିବ।
