ଭଦୋଦରାରେ ₹୩୫ ହଜାର କୋଟିରୁ ଅଧିକ ପ୍ରକଳ୍ପର ଉଦ୍ଘାଟନ, ଶିଳାନ୍ୟାସ ଓ ଲୋକାର୍ପଣ, ୨୦୪୭ ସୁଦ୍ଧା ଭାରତକୁ ବିକଶିତ ରାଷ୍ଟ୍ରରେ ପରିଣତ କରିବା ଲକ୍ଷ୍ୟରେ ଭିତ୍ତିଭୂମି ବିକାଶକୁ ଆହୁରି ଗତି ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ମଙ୍ଗଳବାର ଗୁଜରାଟର ଭଦୋଦରାରେ ₹୩୫ ହଜାର କୋଟିରୁ ଅଧିକ ମୂଲ୍ୟର ବିକାଶ ପ୍ରକଳ୍ପର ଉଦ୍ଘାଟନ, ଶିଳାନ୍ୟାସ ଏବଂ ଦେଶ ଉଦ୍ଦେଶ୍ୟରେ ଲୋକାର୍ପଣ କରିଛନ୍ତି।
ମହାରାଜା ସୟାଜୀରାଓ ବିଶ୍ୱବିଦ୍ୟାଳୟ ପଡ଼ିଆରେ ଆୟୋଜିତ ‘ନମୋ ଫର୍ ବିକଶିତ ଭାରତ’ କାର୍ଯ୍ୟକ୍ରମରେ ଯୋଗଦେଇ ପ୍ରଧାନମନ୍ତ୍ରୀ କହିଛନ୍ତି, ଦେଶର ଦ୍ରୁତ ଭିତ୍ତିଭୂମି ବିକାଶ ଭାରତର ବିକଶିତ ରାଷ୍ଟ୍ର ହେବାର ଯାତ୍ରାକୁ ଆହୁରି ତ୍ୱରାନ୍ୱିତ କରିବ।
ଏହି ଅବସରରେ ୨,୮୦୦ କିଲୋମିଟର ଦୀର୍ଘ ଇଷ୍ଟର୍ଣ୍ଣ ଓ ୱେଷ୍ଟର୍ଣ୍ଣ ଡେଡିକେଟେଡ୍ ଫ୍ରେଟ୍ କରିଡର୍ର ସମ୍ପୂର୍ଣ୍ଣତାକୁ ପ୍ରଧାନମନ୍ତ୍ରୀ ଏକ ବଡ଼ ଉପଲବ୍ଧି ବୋଲି ବର୍ଣ୍ଣନା କରିଛନ୍ତି। ଏହି ଫ୍ରେଟ୍ କରିଡର୍କୁ ଦେଶର ପରିବହନ ଓ ବାଣିଜ୍ୟିକ ନେଟୱର୍କର ନୂଆ ଜୀବନରେଖା ବୋଲି କହିଛନ୍ତି ମୋଦୀ।
ମାଲବାହୀ ଓ ଯାତ୍ରୀବାହୀ ଟ୍ରେନ୍ର ଚଳାଚଳକୁ ଅଲଗା କରାଯିବା ଫଳରେ ରେଳ ପରିଚାଳନାରେ ଦକ୍ଷତା ବଢ଼ିଛି। ବର୍ତ୍ତମାନ ଇଷ୍ଟର୍ଣ୍ଣ ଓ ୱେଷ୍ଟର୍ଣ୍ଣ କରିଡର୍ରେ ପ୍ରତିଦିନ ୪୩୦ରୁ ଅଧିକ ମାଲବାହୀ ଟ୍ରେନ୍ ଚଳାଚଳ କରୁଛି। ଟ୍ରକ୍ରେ ଯେଉଁ ସାମଗ୍ରୀ ପହଞ୍ଚିବାକୁ ପ୍ରାୟ ୩୦ ଘଣ୍ଟା ଲାଗୁଥିଲା, ଡେଡିକେଟେଡ୍ ଫ୍ରେଟ୍ କରିଡର୍ରେ ତାହା ୧୦ରୁ ୧୨ ଘଣ୍ଟାରେ ପହଞ୍ଚାଇବା ସମ୍ଭବ ହେଉଛି।
ଏହାର ସିଧାସଳଖ ଲାଭ ଚାଷୀମାନଙ୍କୁ ମଧ୍ୟ ମିଳିବ ବୋଲି ମୋଦୀ କହିଛନ୍ତି। ଫୁଲ, ଫଳ ଓ ପନିପରିବା ଭଳି ଶୀଘ୍ର ନଷ୍ଟ ହେଉଥିବା କୃଷିଜାତ ସାମଗ୍ରୀ କମ୍ ସମୟରେ ବଜାର ଓ ମଣ୍ଡିରେ ପହଞ୍ଚିପାରିବ।
ମୁମ୍ବାଇର ଜବାହରଲାଲ ନେହରୁ ବନ୍ଦରରୁ ଭଦୋଦରା ପର୍ଯ୍ୟନ୍ତ ଚାଲୁଥିବା ଡବଲ୍-ଷ୍ଟାକ୍ କଣ୍ଟେନର୍ ମାଲବାହୀ ଟ୍ରେନ୍କୁ ଭାରତର ବଢ଼ୁଥିବା ମାଲ ପରିବହନ କ୍ଷମତାର ଉଦାହରଣ ଭାବେ ଦର୍ଶାଇଛନ୍ତି ପ୍ରଧାନମନ୍ତ୍ରୀ। ଗୋଟିଏ ଟ୍ରେନ୍ରେ ୨୫୦ରୁ ଅଧିକ ଟ୍ରକ୍ ସମାନ ସାମଗ୍ରୀ ପରିବହନ କରାଯାଇପାରୁଛି।
ଗୁଜରାଟ, ମଧ୍ୟପ୍ରଦେଶ ଓ ମହାରାଷ୍ଟ୍ରର ଦୁର୍ଗମ ଏବଂ ଆଦିବାସୀ ଅଞ୍ଚଳକୁ ମଧ୍ୟ ରେଳ ସଂଯୋଗ ବଢ଼ୁଥିବା କଥା ମୋଦୀ ଉଲ୍ଲେଖ କରିଛନ୍ତି।
ରେଳ, ସଡ଼କ, ବନ୍ଦର ଓ ବିମାନବନ୍ଦର ଭଳି କ୍ଷେତ୍ରରେ ବିନିଯୋଗ କେବଳ ଭିତ୍ତିଭୂମି ନିର୍ମାଣ କରୁନାହିଁ, ଏହା ସହ ଶିଳ୍ପ ଓ ବ୍ୟବସାୟ ବଢ଼ିବା ସହ ନୂଆ ନିଯୁକ୍ତି ସୁଯୋଗ ମଧ୍ୟ ସୃଷ୍ଟି କରୁଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ରେଳ ଆଧୁନିକୀକରଣ ପାଇଁ ₹୨.୭୫ ଲକ୍ଷ କୋଟିରୁ ଅଧିକ ରେଳ ବଜେଟ୍କୁ ସେ ଗୁରୁତ୍ୱପୂର୍ଣ୍ଣ ବୋଲି କହିଛନ୍ତି।
ଭଦୋଦରାର ଶିଳ୍ପ ବିକାଶକୁ ଉଲ୍ଲେଖ କରି ସେ କହିଛନ୍ତି, ଭାରତର ପ୍ରଥମ ଦେଶୀୟ ଭାବେ ନିର୍ମିତ C-295 ସାମରିକ ପରିବହନ ବିମାନ ଉତ୍ପାଦନରେ ମଧ୍ୟ ଭଦୋଦରା ଏକ ଗୁରୁତ୍ୱପୂର୍ଣ୍ଣ ସ୍ଥାନ ପାଲଟିଛି।
ପ୍ରଧାନମନ୍ତ୍ରୀ ଦେଶର ସୌର ଶକ୍ତି ଓ ଅକ୍ଷୟ ଶକ୍ତି କ୍ଷମତା ବୃଦ୍ଧି ଉପରେ ମଧ୍ୟ ଆଲୋକପାତ କରିଛନ୍ତି। ‘ପିଏମ୍ ସୂର୍ଯ୍ୟ ଘର ମୁଫ୍ତ ବିଜୁଳି ଯୋଜନା’ ଅଧୀନରେ ଦେଶର ୫୫ ଲକ୍ଷ ପରିବାର, ଯେଉଁଥିରେ ଗୁଜରାଟର ୧୧ ଲକ୍ଷ ପରିବାର ସାମିଲ, ବିଦ୍ୟୁତ୍ ଉତ୍ପାଦକ ହୋଇଥିବା ସେ କହିଛନ୍ତି।
ଡାଟା ସେଣ୍ଟର ଓ କୃତ୍ରିମ ବୁଦ୍ଧିମତ୍ତା ଭଳି ଉଦୀୟମାନ କ୍ଷେତ୍ର ପାଇଁ ଶକ୍ତି ବ୍ୟବସ୍ଥାକୁ ମଜବୁତ କରିବା ଆବଶ୍ୟକ ବୋଲି ମୋଦୀ କହିଛନ୍ତି। ଏଥିସହ ୟୁରାନିୟମ୍, ଗୁରୁତ୍ୱପୂର୍ଣ୍ଣ ଖଣିଜ ଓ ରେୟାର ଆର୍ଥ ଉପାଦାନର ଉପଲବ୍ଧତା ସୁନିଶ୍ଚିତ କରିବା ଉପରେ ସରକାର କାମ କରୁଛି।
ଯୁବପିଢ଼ି ପାଇଁ କେବଳ ଡିଗ୍ରୀ ଯଥେଷ୍ଟ ନୁହେଁ, ବଦଳୁଥିବା ଅର୍ଥନୀତି ସହ ତାଳ ମିଳାଇବାକୁ ନିରନ୍ତର ଦକ୍ଷତା ବିକାଶ ଆବଶ୍ୟକ ବୋଲି ସେ କହିଛନ୍ତି। ଗରିବ ଓ ମଧ୍ୟବିତ୍ତ ପରିବାର ଉପରୁ ଆର୍ଥିକ ବୋଝ କମାଇବା ପାଇଁ ପ୍ରତିଯୋଗିତାମୂଳକ ପରୀକ୍ଷା ପାଇଁ ମାଗଣା କୋଚିଂ ବ୍ୟବସ୍ଥା ଆଣିବା ନେଇ ମଧ୍ୟ ସେ ଘୋଷଣା କରିଛନ୍ତି।
ଏଥିସହ ଦେଶର ଯୁବପିଢ଼ିଙ୍କୁ କୃତ୍ରିମ ବୁଦ୍ଧିମତ୍ତା (AI) ଦକ୍ଷତାରେ ସଜ୍ଜିତ କରିବା ପାଇଁ ଜାତୀୟ ଅଭିଯାନ ଆରମ୍ଭ କରାଯିବ। କୃଷି, ସ୍ୱାସ୍ଥ୍ୟସେବା, ରୋବୋଟିକ୍ସ, ଉତ୍ପାଦନ ଓ ଷ୍ଟାର୍ଟଅପ୍ କ୍ଷେତ୍ରରେ ଏହି ଦକ୍ଷତାର ବ୍ୟାପକ ବ୍ୟବହାର ହେବ ବୋଲି ପ୍ରଧାନମନ୍ତ୍ରୀ କହିଛନ୍ତି।
