ଅଷ୍ଟ୍ରେଲିଆର ଲୋକପ୍ରିୟ ଟ୍ବେଣ୍ଟି-୨୦ ପ୍ରତିଯୋଗିତା ବିଗ୍ ବାସ୍ ଲିଗ୍ (ବିବିଏଲ୍)ରେ ଆଗାମୀ ଦିନରେ ବଡ଼ ପରିବର୍ତ୍ତନ ଦେଖିବାକୁ ମିଳିବ। ଲିଗ୍ର ଆର୍ଥିକ ଭିତ୍ତିକୁ ମଜବୁତ କରିବା ଏବଂ ଅଧିକ ନିବେଶ ଆକୃଷ୍ଟ କରିବା ଲକ୍ଷ୍ୟରେ ଫ୍ରାଞ୍ଚାଇଜ୍ଗୁଡ଼ିକରେ ଘରୋଇ ପୁଞ୍ଜି ନିବେଶକୁ ସୁଯୋଗ ଦେବାକୁ କ୍ରିକେଟ୍ ଅଷ୍ଟ୍ରେଲିଆ ନିଷ୍ପତ୍ତି ନେଇଛି। ନୂଆ ବ୍ୟବସ୍ଥା ୨୦୨୭-୨୮ ସିଜନ୍ରୁ ଲାଗୁ ହେବାକୁ ଯାଉଛି। ଏହା ମାଧ୍ୟମରେ ବିବିଏଲ୍ରେ ବ୍ୟବସାୟିକ ନିବେଶ ବଢ଼ିବା ସହ ଲିଗ୍କୁ ବିଶ୍ୱର ଅନ୍ୟ ଟ୍ବେଣ୍ଟି-୨୦ ପ୍ରତିଯୋଗିତା ସହ ଅଧିକ ପ୍ରତିଦ୍ୱନ୍ଦ୍ୱିତାମୂଳକ କରିବା ଉଦ୍ଦେଶ୍ୟ ରହିଛି।
ଏହି ପରିବର୍ତ୍ତନର ପ୍ରଥମ ପ୍ରଭାବ ମେଲବର୍ଣ୍ଣ ରେନେଗେଡ୍ସ ଉପରେ ପଡ଼ିବ। ଫ୍ରାଞ୍ଚାଇଜ୍ର ଅଂଶଧନ ବିକ୍ରି କରି ଘରୋଇ ନିବେଶ ଆଣିବା ପାଇଁ ପ୍ରକ୍ରିୟା ଆଗକୁ ବଢ଼ିବ। ୨୦୧୮-୧୯ ସିଜନ୍ରେ ବିବିଏଲ୍ ଚାମ୍ପିଅନ୍ ହୋଇଥିବା ରେନେଗେଡ୍ସ ଏହି ନୂଆ ବ୍ୟବସ୍ଥାରେ ପ୍ରଥମ ଫ୍ରାଞ୍ଚାଇଜ୍ ଭାବେ ଘରୋଇ ମାଲିକାନା ଦିଗରେ ଆଗକୁ ବଢ଼ିବ।
ପୂର୍ବରୁ କ୍ରିକେଟ୍ ଅଷ୍ଟ୍ରେଲିଆ ବିବିଏଲ୍ ଫ୍ରାଞ୍ଚାଇଜ୍ର ୪୯ ପ୍ରତିଶତ ଅଂଶଧନ ଘରୋଇ ନିବେଶକଙ୍କୁ ଦେବାର ଯୋଜନା କରିଥିଲା। ଯେଉଁ ରାଜ୍ୟରେ ଏକାଧିକ ଦଳ ରହିଛି, ସେଠାରେ ଅଧିକ ମାଲିକାନା ଅଂଶ ଦେବାର ବିକଳ୍ପ ମଧ୍ୟ ରହିଥିଲା। ଏହି ପ୍ରସ୍ତାବକୁ ନେଇ କିଛି ରାଜ୍ୟ କ୍ରିକେଟ୍ ସଂସ୍ଥା ପ୍ରାରମ୍ଭରେ ଆପତ୍ତି ଉଠାଇଥିଲେ। ନୂଆ ଯୋଜନାରେ ସେମାନଙ୍କ ଚିନ୍ତାକୁ ଦୂର କରିବା ପାଇଁ ବିକଳ୍ପ ବ୍ୟବସ୍ଥା ରଖାଯାଇଛି। ଏହି ଘରୋଇ ନିବେଶ ନୀତି ଯୋଗୁଁ ଭାରତୀୟ ଟ୍ବେଣ୍ଟି-୨୦ ଲିଗ୍ ସହ ଜଡ଼ିତ କିଛି ଫ୍ରାଞ୍ଚାଇଜ୍ ବିବିଏଲ୍ରେ ନିବେଶ କରିବାର ସୁଯୋଗ ପାଇପାରନ୍ତି। ଫଳରେ ବିବିଏଲ୍ର ଆର୍ଥିକ ପରିସର ବଢ଼ିବା ସହ ଆନ୍ତର୍ଜାତିକ କ୍ରିକେଟ୍ ବଜାରରେ ଏହାର ଗୁରୁତ୍ୱ ଆହୁରି ବଢ଼ିପାରେ।
ତେବେ କ୍ରିକେଟ୍ ଅଷ୍ଟ୍ରେଲିଆର ମୁଖ୍ୟ ଉଦ୍ଦେଶ୍ୟ କେବଳ ବିଦେଶୀ ନିବେଶ ଆଣିବା ନୁହେଁ। ଅଷ୍ଟ୍ରେଲିଆରେ ଟ୍ବେଣ୍ଟି-୨୦ କ୍ରିକେଟ୍ର ବଜାରକୁ ଆହୁରି ମଜବୁତ କରିବା ଏବଂ ଦୀର୍ଘମିଆଦରେ ବିବିଏଲ୍କୁ ଏକ ସଫଳ ବ୍ୟବସାୟିକ ଲିଗ୍ ଭାବେ ବିକଶିତ କରିବା ଏହାର ପ୍ରମୁଖ ଲକ୍ଷ୍ୟ।
