ଭାରତୀୟ କ୍ରିକେଟ୍ ତାରକା ବିରାଟ କୋହଲି ନିଜ ପସନ୍ଦର ଗୀତ ଏବଂ ଏହା ସହ ଜଡ଼ିତ ଭାବନାକୁ ନେଇ ଏକ ବଡ଼ ଖୁଲାସା କରିଛନ୍ତି। ସେ କହିଛନ୍ତି ଯେ ପଞ୍ଜାବୀ ଗାୟକ କରଣ ଔଜଲାଙ୍କ “Winning Speech” ଗୀତ ତାଙ୍କ ପାଇଁ ଅତ୍ୟନ୍ତ ସ୍ୱତନ୍ତ୍ର।
ଏକ କାର୍ଯ୍ୟକ୍ରମରେ କୋହଲି କରଣ ଔଜଲାଙ୍କ ସଙ୍ଗୀତର ପ୍ରଶଂସା କରିବା ସହ କହିଥିଲେ ଯେ, “Winning Speech” ଗୀତ ସହ ସେ ନିଜକୁ ସବୁଠାରୁ ଅଧିକ ଯୋଡ଼ି ପାରନ୍ତି। ଏହି ଗୀତରେ ଥିବା ସଂଘର୍ଷ ଓ ସଫଳତାର କାହାଣୀ ତାଙ୍କ ନିଜ ଜୀବନ ଯାତ୍ରା ସହ ମେଳ ଖାଉଥିବା ସେ କହିଛନ୍ତି।
କୋହଲି କହିଛନ୍ତି ଯେ ସେ ଛୋଟ ବୟସରେ ନିଜ ବାପାଙ୍କୁ ହରାଇଥିଲେ। ସେହି କାରଣରୁ ଏହି ଗୀତ ତାଙ୍କ ପାଇଁ ଆହୁରି ଭାବପ୍ରବଣ ହୋଇଯାଇଛି। ଅନେକ ଥର ସେ ମ୍ୟାଚ୍ ଖେଳିବାକୁ ପଡ଼ିଆକୁ ଯିବା ପୂର୍ବରୁ ଏହି ଗୀତ ଶୁଣିଥାନ୍ତି ବୋଲି ମଧ୍ୟ କହିଛନ୍ତି।
ନିଜ କ୍ରିକେଟ୍ ଜୀବନର ସଫଳତା ପଛରେ ଥିବା ମାନସିକତା ବିଷୟରେ ମଧ୍ୟ କୋହଲି ମତ ରଖିଥିଲେ। ସେ କହିଥିଲେ ଯେ, ପରିସ୍ଥିତି ଯେତେ କଠିନ ହେଉନା କାହିଁକି, ସେ କେବେ ବି ଆଶା ଛାଡ଼ନ୍ତି ନାହିଁ। ଶେଷ ମୁହୂର୍ତ୍ତ ପର୍ଯ୍ୟନ୍ତ ମ୍ୟାଚ୍ ଜିତିବାର ବିଶ୍ୱାସ ରଖନ୍ତି।
ଏହି ଅବସରରେ ସେ ୨୦୨୨ ଟି-୨୦ ବିଶ୍ୱକପରେ ମେଲବୋର୍ଣ୍ଣରେ ପାକିସ୍ତାନ ବିରୋଧରେ ଭାରତର ସ୍ମରଣୀୟ ବିଜୟକୁ ମଧ୍ୟ ମନେ ପକାଇଥିଲେ। କୋହଲି କହିଥିଲେ ଯେ ସେତେବେଳେ ଅନେକ ଲୋକ ଭାବିଥିଲେ ଭାରତର ଜିତିବା ସମ୍ଭାବନା ବହୁତ କମ୍ ଥିଲା। କିନ୍ତୁ ସେ କେବେ ହାର ମାନିନଥିଲେ। ତାଙ୍କ ବିଶ୍ୱାସ ଥିଲା ଯେ ଯେପର୍ଯ୍ୟନ୍ତ ସୁଯୋଗ ରହିଛି, ସେପର୍ଯ୍ୟନ୍ତ ଜିତିବାର ସମ୍ଭାବନା ମଧ୍ୟ ରହିଛି।
ଏପଟେ କରଣ ଔଜଲା ଦିଲ୍ଲୀର ଜବାହରଲାଲ ନେହେରୁ ଷ୍ଟାଡିୟମରେ ଏକ ବଡ଼ ସଙ୍ଗୀତ କାର୍ଯ୍ୟକ୍ରମ ସହ ନିଜ ଟୁର୍ ଶେଷ କରିଛନ୍ତି। ଏହି କାର୍ଯ୍ୟକ୍ରମରେ ୭୦ ହଜାରରୁ ଅଧିକ ପ୍ରଶଂସକ ଯୋଗ ଦେଇଥିଲେ। “Tauba Tauba”, “Gangster”, “Bachke Bachke”, “Boyfriend” ଏବଂ “For A Reason” ଭଳି ଲୋକପ୍ରିୟ ଗୀତରେ ଦର୍ଶକମାନେ ଝୁମି ଉଠିଥିଲେ।
ବିରାଟ କୋହଲିଙ୍କ ଏହି ମନ୍ତବ୍ୟ ତାଙ୍କ ଜୀବନର ସଂଘର୍ଷ, ଦୃଢ଼ ବିଶ୍ୱାସ ଏବଂ ସଙ୍ଗୀତ ସହ ଥିବା ଭାବନାତ୍ମକ ସମ୍ପର୍କକୁ ପୁଣି ଥରେ ସାମ୍ନାକୁ ଆଣିଛି।
