ଏକତା ନଗର: ଲୋକପ୍ରିୟ ସିନେ ତାରକା ଓ ସେଲିବ୍ରିଟିମାନଙ୍କୁ ଅସ୍ୱାସ୍ଥ୍ୟକର ଉତ୍ପାଦର ବିଜ୍ଞାପନ ଏବଂ ପ୍ରଚାରରୁ ଦୂରେଇ ରହିବାକୁ ଅପିଲ୍ କରିଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ। ଗୁଜରାଟର ଏକତା ନଗରରେ ଆୟୋଜିତ ୭୨ତମ ଜାତୀୟ ଚଳଚ୍ଚିତ୍ର ପୁରସ୍କାର ସମାରୋହରେ ଯୋଗଦେଇ ସେ ଏହି ଅନୁରୋଧ କରିଛନ୍ତି।
ରାଷ୍ଟ୍ରପତି କହିଛନ୍ତି, ଜଣେ କଳାକାରଙ୍କ ପ୍ରଭାବ କେବଳ ତାଙ୍କ ଅଭିନୟ କିମ୍ବା ପରଦାରେ ଥିବା ଭୂମିକା ମଧ୍ୟରେ ସୀମିତ ନୁହେଁ। ଲୋକପ୍ରିୟ କଳାକାରମାନଙ୍କ କଥାବାର୍ତ୍ତା, ଜୀବନଶୈଳୀ ଓ ସାର୍ବଜନୀନ ଆଚରଣ ବିଶେଷକରି ଶିଶୁ ଓ ଯୁବପିଢ଼ି ଉପରେ ପ୍ରଭାବ ପକାଇଥାଏ।
ସେ କହିଛନ୍ତି ଯେ, ଯେତେବେଳେ କୌଣସି ଲୋକପ୍ରିୟ କଳାକାର ସୁସ୍ଥ ଜୀବନଶୈଳୀର ଗୁରୁତ୍ୱ ବିଷୟରେ କହନ୍ତି, ତାହାର ପ୍ରଭାବ ବହୁ ସଂଖ୍ୟକ ପ୍ରଶଂସକଙ୍କ ଉପରେ ପଡ଼ିଥାଏ। ତେଣୁ ସେଲିବ୍ରିଟିମାନେ ନିଜର ଲୋକପ୍ରିୟତା ସହିତ ଜଡ଼ିତ ସାମାଜିକ ଦାୟିତ୍ୱକୁ ମଧ୍ୟ ବିଚାର କରିବା ଆବଶ୍ୟକ ବୋଲି ରାଷ୍ଟ୍ରପତି ଉଲ୍ଲେଖ କରିଛନ୍ତି।
ରାଷ୍ଟ୍ରପତିଙ୍କ ଅନୁରୋଧ ଥିଲା, ସ୍ୱାସ୍ଥ୍ୟ ପାଇଁ କ୍ଷତିକାରକ କିମ୍ବା ଅସ୍ୱାସ୍ଥ୍ୟକର ଉତ୍ପାଦର ପୃଷ୍ଠପୋଷକତା କରିବା ପୂର୍ବରୁ କଳାକାରମାନେ ଏହାର ସମ୍ଭାବ୍ୟ ପ୍ରଭାବ ନେଇ ଚିନ୍ତା କରନ୍ତୁ। କାରଣ ସେମାନଙ୍କର ପ୍ରଚାରକୁ ଅନେକ ଯୁବକ ଓ ପ୍ରଶଂସକ ଅନୁସରଣ କରିପାରନ୍ତି।
ଏହି ପରିପ୍ରେକ୍ଷୀରେ ରାଷ୍ଟ୍ରପତି ଏକ ସନ୍ଦେଶ ଦେଇ କହିଛନ୍ତି ଯେ, ପ୍ରକୃତ ତାରକା ସେହି ବ୍ୟକ୍ତି, ଯିଏ ଅନ୍ୟମାନଙ୍କ ଜୀବନରେ ଆଲୋକ ଆଣିଥାଏ, ଅନ୍ଧକାର ନୁହେଁ।
ଚଳଚ୍ଚିତ୍ର ଜଗତର ପ୍ରଭାବକୁ ଦୃଷ୍ଟିରେ ରଖି ରାଷ୍ଟ୍ରପତି କହିଛନ୍ତି, ପରଦା ବାହାରେ ମଧ୍ୟ ଲୋକପ୍ରିୟ କଳାକାରଙ୍କ ଏକ ବଡ଼ ସାମାଜିକ ଭୂମିକା ରହିଛି। ତେଣୁ ତାଙ୍କ ଲୋକପ୍ରିୟତାକୁ ସମାଜ ଓ ବିଶେଷକରି ଯୁବପିଢ଼ି ପାଇଁ ସକାରାତ୍ମକ ବାର୍ତ୍ତା ଦେବାରେ ବ୍ୟବହାର କରିବାକୁ ସେ ଆହ୍ୱାନ ଜଣାଇଛନ୍ତି।
