ରାଜ୍ୟରେ ସ୍କୁଲ ପାଠ୍ୟପୁସ୍ତକରେ ତ୍ରୁଟିକୁ ନେଇ ଦେଖାଦେଇଥିବା ବିବାଦ ପରେ ଓଡ଼ିଶା ସରକାର ଏକ ବଡ଼ ପଦକ୍ଷେପ ନେଇଛନ୍ତି। ପ୍ରଥମରୁ ଚତୁର୍ଥ ଶ୍ରେଣୀ ପର୍ଯ୍ୟନ୍ତ ସଂଶୋଧିତ ପାଠ୍ୟପୁସ୍ତକକୁ ସର୍ବସାଧାରଣଙ୍କ ପାଇଁ ଉପଲବ୍ଧ କରାଯାଇଛି। ଏହା ସହ ଶିକ୍ଷକ, ଅଭିଭାବକ, ଶିକ୍ଷାବିତ୍ ଏବଂ ସାଧାରଣ ଲୋକଙ୍କଠାରୁ ସାତ ଦିନ ମଧ୍ୟରେ ମତାମତ ଓ ପରାମର୍ଶ ମଗାଯାଇଛି।
ସରକାରଙ୍କ ପକ୍ଷରୁ ସୋସିଆଲ ମିଡିଆ ‘ଏକ୍ସ’ରେ ଦିଆଯାଇଥିବା ସୂଚନା ଅନୁସାରେ, ସଂଶୋଧିତ ପାଠ୍ୟପୁସ୍ତକଗୁଡ଼ିକୁ ସ୍କୁଲ ଓ ଗଣଶିକ୍ଷା ବିଭାଗ, ଶିକ୍ଷକ ଶିକ୍ଷା ନିର୍ଦ୍ଦେଶାଳୟ, ରାଜ୍ୟ ଶୈକ୍ଷିକ ଗବେଷଣା ଓ ପ୍ରଶିକ୍ଷଣ ପରିଷଦ (SCERT) ଏବଂ ଓଡ଼ିଶା ସ୍କୁଲ ଏଜୁକେସନ ପ୍ରୋଗ୍ରାମ ଅଥରିଟି (OSEPA)ର ୱେବସାଇଟରେ ଅପଲୋଡ୍ କରାଯାଇଛି।
ସରକାର କହିଛନ୍ତି ଯେ, ଆଗ୍ରହୀ ବ୍ୟକ୍ତିମାନେ ପୁସ୍ତକଗୁଡ଼ିକୁ ଭଲଭାବେ ପଢ଼ି ସେଥିରେ ଥିବା ବିଷୟବସ୍ତୁ ସମ୍ପର୍କରେ ନିଜର ମତାମତ ଓ ପରାମର୍ଶ ସାତ ଦିନ ମଧ୍ୟରେ ପଠାଇପାରିବେ। ଏହା ଦ୍ୱାରା ପାଠ୍ୟପୁସ୍ତକର ଗୁଣବତ୍ତା ଓ ସଠିକତାକୁ ଆହୁରି ଉନ୍ନତ କରାଯିବ।
ମତାମତ textbookscertodisha@gmail.com ଇ-ମେଲ୍ ମାଧ୍ୟମରେ ପଠାଯାଇପାରିବ। ଏହାଛଡ଼ା ବିଦ୍ୟା ସମୀକ୍ଷା କେନ୍ଦ୍ରର ହେଲ୍ପଲାଇନ୍ 18003456722 ନମ୍ବରରେ ଯୋଗାଯୋଗ କରି ମଧ୍ୟ ମତାମତ ଜଣାଇପାରିବେ।
ନୂଆ ପାଠ୍ୟପୁସ୍ତକରେ ବିଭିନ୍ନ ପ୍ରକାରର ତ୍ରୁଟି ସାମ୍ନାକୁ ଆସିବା ପରେ ରାଜ୍ୟ ସରକାର ଏହି ପଦକ୍ଷେପ ନେଇଛନ୍ତି। ଛାତ୍ରଛାତ୍ରୀଙ୍କୁ ତ୍ରୁଟିମୁକ୍ତ ଏବଂ ଉନ୍ନତମାନର ପାଠ୍ୟପୁସ୍ତକ ଯୋଗାଇବା ପାଇଁ ଜନସାଧାରଣଙ୍କ ସହଯୋଗ ନିଆଯାଉଛି।
ଏହାପୂର୍ବରୁ ଶୁକ୍ରବାର ଭୁବନେଶ୍ୱରସ୍ଥିତ SCERT ମୁଖ୍ୟାଳୟରେ ନୂତନ ପାଠ୍ୟପୁସ୍ତକ ପ୍ରସ୍ତୁତି ଓ ମୁଦ୍ରଣକୁ ନେଇ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା।
ଏହି ବୈଠକରେ ସ୍କୁଲ ଓ ଗଣଶିକ୍ଷା ମନ୍ତ୍ରୀ, ବିଭାଗର ସଚିବ, OSEPAର ନିର୍ଦ୍ଦେଶକ ଏବଂ SCERTର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ। ବର୍ତ୍ତମାନର ପାଠ୍ୟପୁସ୍ତକରେ ଥିବା ତ୍ରୁଟିକୁ ସଂଶୋଧନ କରି ନୂଆ ପୁସ୍ତକ ପ୍ରସ୍ତୁତ କରିବା ଏବଂ ଶୀଘ୍ର ଛାତ୍ରଛାତ୍ରୀଙ୍କ ହାତରେ ପହଞ୍ଚାଇବା ଉପରେ ବୈଠକରେ ଆଲୋଚନା ହୋଇଥିଲା। ସରକାର କହିଛନ୍ତି ଯେ, ଲୋକଙ୍କଠାରୁ ମିଳୁଥିବା ପରାମର୍ଶକୁ ବିଚାରକୁ ନେଇ ପାଠ୍ୟପୁସ୍ତକକୁ ଚୂଡ଼ାନ୍ତ ରୂପ ଦିଆଯିବ।
