ଉତ୍ତର ପ୍ରଦେଶ ବିଧାନସଭାର ବର୍ଷାକାଳୀନ ଅଧିବେଶନରେ ବାଚସ୍ପତି ସତୀଶ ମହାନା ବିଧାୟକମାନଙ୍କୁ ସମ୍ବୋଧନ କରୁଥିବା ବେଳେ ଭାବୁକ ହୋଇପଡ଼ିଥିଲେ। ଅଗଷ୍ଟ ୪ରେ ସଦନରେ ହୋଇଥିବା ହଙ୍ଗାମାକୁ ନେଇ ସେ କହିଥିଲେ, ସେ ଆତ୍ମସମୀକ୍ଷା କରିବେ ଏବଂ ଭାବିବେ ଯେ ସେ ଏହି ପଦ ପାଇଁ ଯୋଗ୍ୟ କି ନୁହେଁ।
ସେ କହିଥିଲେ, ତାଙ୍କର ଦୀର୍ଘ ରାଜନୈତିକ ଜୀବନ ଏବେ ଶେଷ ପର୍ଯ୍ୟାୟରେ ପହଞ୍ଚିଛି। ବିଧାନସଭା ତାଙ୍କୁ ଯାହା ଦେଇଛି, ତାହାର କିଛି ଋଣ ବାଚସ୍ପତି ଭାବେ ସୁଝାଇବାକୁ ସେ ସଦା ଚେଷ୍ଟା କରିଛନ୍ତି। ସମସ୍ତ ବିଧାୟକ ଦଳୀୟ ରାଜନୀତିରୁ ଊର୍ଦ୍ଧ୍ୱକୁ ଉଠି ସଦନର ଗରିମା ରକ୍ଷା କରନ୍ତୁ ବୋଲି ସେ ଆହ୍ୱାନ କରିଥିଲେ।
ସତୀଶ ମହାନା କହିଥିଲେ, ଅଖିଲେଶ ଯାଦବ ମୁଖ୍ୟମନ୍ତ୍ରୀ ଥିବା ସମୟରେ ଦୁଇଜଣ ବିଧାୟକ ସଦନ ଭିତରେ ନିଜ ଶର୍ଟ ଖୋଲିଦେଇଥିଲେ। ସେତେବେଳେ ସେ କହିଥିଲେ, କେବଳ ସେହି ଦୁଇଜଣ ନୁହେଁ, ବରଂ ସମସ୍ତ ୪୦୩ ଜଣ ବିଧାୟକଙ୍କର ସମ୍ମାନକୁ ଆଘାତ ଲାଗିଥିଲା।
ସେ ଆହୁରି କହିଥିଲେ, ବିରୋଧୀ ଦଳର ପୂର୍ବତନ ନେତା ସ୍ୱାମୀ ପ୍ରସାଦ ମୌର୍ୟ ଯେତେବେଳେ ସେତେବେଳର ସଦନ ନେତା ଅଖିଲେଶ ଯାଦବଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେଇଥିଲେ, ସେତେବେଳେ ମଧ୍ୟ ସେ ଏହାର ବିରୋଧ କରିଥିଲେ। ଏହା ସଦନର ରେକର୍ଡରେ ରହିଛି।
ବାଚସ୍ପତି କହିଥିଲେ, ବିଧାୟକମାନେ ନେଉଥିବା ଶପଥରେ ସଦନର ନେତାଙ୍କୁ ସମ୍ମାନ କରିବାର କଥା ମଧ୍ୟ ରହିଛି। ମତଭେଦ ଗଣତନ୍ତ୍ରର ଏକ ଅଂଶ ହୋଇଥିଲେ ମଧ୍ୟ ଭାଷାର ମର୍ଯ୍ୟାଦା ରହିବା ଉଚିତ। ଗତକାଲି ସଦନରେ ଯାହା ଘଟିଲା, ତାହା ତାଙ୍କୁ ବହୁତ ଦୁଃଖିତ ଓ ନିରାଶ କରିଛି। ପ୍ରଥମ ଥର ପାଇଁ ତାଙ୍କୁ ଲାଗିଲା ଯେ, ତାଙ୍କ ଉଦ୍ୟମରେ କେଉଁଠି ନା କେଉଁଠି ଅଭାବ ରହିଯାଇଛି, କିମ୍ବା ବାବା ସାହେବ ଭୀମରାଓ ଆମ୍ବେଦକର କହିଥିବା କଥା ସତ—ସମସ୍ୟା ସମ୍ବିଧାନରେ ନୁହେଁ, ବରଂ ଏହାକୁ ପାଳନ କରୁଥିବା ବ୍ୟକ୍ତିଙ୍କ ମଧ୍ୟରେ ରହିଛି।
ସମାଜବାଦୀ ପାର୍ଟିର ଜସରାନା ବିଧାୟକ ସଚିନ ଯାଦବଙ୍କ ନାମ ନନେଇ ସେ କହିଥିଲେ, ଯେଉଁ ସଦସ୍ୟଙ୍କୁ ସେ ସଦନର ରୋଲ୍ ମଡେଲ୍ ବୋଲି ଭାବୁଥିଲେ, ତାଙ୍କ ଆଚରଣ ତାଙ୍କୁ ବହୁତ ଦୁଃଖ ଦେଇଛି। ବାରଣ କରିବା ସତ୍ତ୍ୱେ ସଦନ ବାହାରେ ସେ ବ୍ୟବହାର କରିଥିବା ଭାଷା ଅତ୍ୟନ୍ତ ନିରାଶାଜନକ ବୋଲି ବାଚସ୍ପତି କହିଛନ୍ତି।
