ଅଷ୍ଟ୍ରେଲିଆରେ ଐତିହାସିକ ସିରିଜ୍ ବିଜୟର ନାୟକ କହିଲେ ବିଦାୟ, ଭାବପ୍ରବଣ ବାର୍ତ୍ତାରେ ଜଣାଇଲେ କୃତଜ୍ଞତା
ଭାରତୀୟ କ୍ରିକେଟର ଅଭିଜ୍ଞ ବ୍ୟାଟର ତଥା ପୂର୍ବତନ ଉପଅଧିନାୟକ ଅଜିଙ୍କ୍ୟ ରାହାଣେ ଗୁରୁବାର ସବୁ ପ୍ରକାର କ୍ରିକେଟରୁ ଅବସର ଘୋଷଣା କରିଛନ୍ତି। ପ୍ରାୟ ଦୁଇ ଦଶନ୍ଧି ଧରି ଚାଲିଥିବା ତାଙ୍କର କ୍ରିକେଟ ଯାତ୍ରାରେ ସେ ଭାରତୀୟ ଦଳ ପାଇଁ ଅନେକ ସ୍ମରଣୀୟ ମୁହୂର୍ତ୍ତ ଉପହାର ଦେଇଥିଲେ। ବିଶେଷକରି ୨୦୨୦-୨୧ ମସିହାରେ ଅଷ୍ଟ୍ରେଲିଆ ମାଟିରେ ଭାରତକୁ ଐତିହାସିକ ଟେଷ୍ଟ ସିରିଜ୍ ବିଜୟ ଦେବାରେ ତାଙ୍କ ନେତୃତ୍ୱ ସବୁବେଳେ ସ୍ମରଣୀୟ ହୋଇ ରହିବ।
୩୮ ବର୍ଷୀୟ ରାହାଣେ ସୋସିଆଲ ମିଡିଆରେ ଏକ ଭିଡିଓ ପୋଷ୍ଟ କରି ଅବସର ଘୋଷଣା କରିଥିଲେ। ସେଥିରେ ସେ ଲେଖିଥିଲେ, “କ୍ୟାପ୍ ନମ୍ବର ୨୭୮ର ଯାତ୍ରା ଏଠାରେ ଶେଷ। ଏତେ ବର୍ଷ ଧରି ମୋତେ ଭଲପାଇବା ଓ ସମର୍ଥନ କରିଥିବା ସମସ୍ତଙ୍କୁ ହୃଦୟରୁ ଧନ୍ୟବାଦ।”
ଅବସର ଘୋଷଣା କରି ରାହାଣେ କହିଛନ୍ତି, ଜୀବନର ପ୍ରତ୍ୟେକ ଯାତ୍ରାର ଆରମ୍ଭ ଥାଏ ଓ ଶେଷ ମଧ୍ୟ ଥାଏ। ସଠିକ୍ ସମୟ ଆସିଲେ ତାହାକୁ ସମ୍ମାନ ଦେଇ ଆଗକୁ ବଢ଼ିବା ଉଚିତ। ବ୍ୟାଟିଂ କରିବା ସମୟରେ ସେ ସବୁବେଳେ ସଠିକ୍ ସମୟକୁ ଗୁରୁତ୍ୱ ଦେଇଆସିଛନ୍ତି ଏବଂ ବର୍ତ୍ତମାନ ଅବସର ନେବା ପାଇଁ ମଧ୍ୟ ଏହି ସମୟ ଉପଯୁକ୍ତ ବୋଲି ସେ ଅନୁଭବ କରୁଛନ୍ତି।
ରାହାଣେ କହିଛନ୍ତି, ଭାରତୀୟ ଦଳର ଜର୍ସି ପିନ୍ଧିବା ତାଙ୍କ ଜୀବନର ସବୁଠାରୁ ବଡ଼ ସ୍ୱପ୍ନ ଥିଲା। ପ୍ରତ୍ୟେକ ଇନିଂସ୍, ପ୍ରତ୍ୟେକ ସୁଯୋଗ ଓ ପ୍ରତ୍ୟେକ ଦିନ ସେ ଦେଶ ପାଇଁ ଖେଳିବାକୁ ପ୍ରାଥମିକତା ଦେଇଥିଲେ। ବ୍ୟକ୍ତିଗତ ସଫଳତାଠାରୁ ଦଳ ଓ ଦେଶର ସ୍ୱାର୍ଥକୁ ସେ ସବୁବେଳେ ଆଗରେ ରଖିଥିଲେ।
୨୦୧୧ ମସିହାରେ ଇଂଲଣ୍ଡ ବିପକ୍ଷ ଦିନିକିଆ ମ୍ୟାଚ୍ରେ ଭାରତ ପାଇଁ ଡେବ୍ୟୁ କରିଥିବା ରାହାଣେ ୨୦୧୩ରେ ଅଷ୍ଟ୍ରେଲିଆ ବିପକ୍ଷରେ ଟେଷ୍ଟ କ୍ୟାପ୍ ହାସଲ କରିଥିଲେ। ସେ ଭାରତ ପାଇଁ ୮୫ଟି ଟେଷ୍ଟ ଖେଳି ୫,୦୭୭ ରନ୍ ସଂଗ୍ରହ କରିଥିଲେ। ତାଙ୍କ ନାମରେ ୧୨ଟି ଶତକ ଓ ୨୬ଟି ଅର୍ଦ୍ଧଶତକ ରହିଛି। ଏହାଛଡ଼ା ୯୦ଟି ଦିନିକିଆରେ ୨,୯୬୨ ରନ୍ ଏବଂ ୨୦ଟି ଟି-୨୦ ଆନ୍ତର୍ଜାତୀୟ ମ୍ୟାଚ୍ରେ ମଧ୍ୟ ସେ ଭାରତର ପ୍ରତିନିଧିତ୍ୱ କରିଥିଲେ।
ରାହାଣେଙ୍କ କ୍ୟାରିୟରର ସବୁଠାରୁ ସ୍ମରଣୀୟ ଅଧ୍ୟାୟ ଥିଲା ୨୦୨୦-୨୧ ବର୍ଡର-ଗାଭାସ୍କର ଟ୍ରଫି। ପ୍ରଥମ ଟେଷ୍ଟ ପରେ ବିରାଟ କୋହଲି ସ୍ୱଦେଶ ଫେରିବା ପରେ ରାହାଣେ ଭାରତୀୟ ଦଳର ନେତୃତ୍ୱ ନେଇଥିଲେ। ଅନେକ ପ୍ରମୁଖ ଖେଳାଳି ଆହତ ହୋଇଥିବା ସତ୍ତ୍ୱେ ତାଙ୍କ ଅଧିନାୟକତ୍ୱରେ ଭାରତ ୨-୧ରେ ସିରିଜ୍ ଜିତି ଇତିହାସ ସୃଷ୍ଟି କରିଥିଲା। ବ୍ରିସବେନ୍ର ଗାବା ମାଇଦାନରେ ୩୨ ବର୍ଷ ପରେ ଅଷ୍ଟ୍ରେଲିଆକୁ ପରାସ୍ତ କରିବା ଭାରତୀୟ କ୍ରିକେଟର ଏକ ସୁବର୍ଣ୍ଣ ଅଧ୍ୟାୟ ହୋଇ ରହିଛି।
ଇଣ୍ଡିଆନ୍ ପ୍ରିମିୟର ଲିଗ୍ରେ ମଧ୍ୟ ରାହାଣେଙ୍କ ଯାତ୍ରା ଅତ୍ୟନ୍ତ ସଫଳ ଥିଲା। ୨୦୦୮ରୁ ଆରମ୍ଭ ହୋଇଥିବା ଆଇପିଏଲ୍ର ପ୍ରତ୍ୟେକ ସଂସ୍କରଣରେ ସେ ଅଂଶଗ୍ରହଣ କରିଥିଲେ। ରାଜସ୍ଥାନ ରୟାଲ୍ସ, ରାଇଜିଂ ପୁଣେ ସୁପରଜାଏଣ୍ଟ, ଦିଲ୍ଲୀ କ୍ୟାପିଟାଲ୍ସ, କୋଲକାତା ନାଇଟ୍ ରାଇଡର୍ସ ଏବଂ ଚେନ୍ନାଇ ସୁପର କିଙ୍ଗ୍ସ ପକ୍ଷରୁ ସେ ଖେଳିଥିଲେ। ୨୦୨୩ରେ ଚେନ୍ନାଇ ସହ ଆଇପିଏଲ୍ ଟ୍ରଫି ଜିତିଥିଲେ। ପରେ ୨୦୨୫ରେ ସେ ପୁଣି କୋଲକାତା ନାଇଟ୍ ରାଇଡର୍ସକୁ ଫେରି ଅଧିନାୟକ ଭାବେ ଦାୟିତ୍ୱ ନେଇଥିଲେ।
ଅବସର ପରେ ମଧ୍ୟ କ୍ରିକେଟ ସହ ସମ୍ପର୍କ ଜାରି ରଖିବେ ବୋଲି ରାହାଣେ କହିଛନ୍ତି। ନୂଆ ପିଢ଼ିର ଖେଳାଳିଙ୍କୁ ମାର୍ଗଦର୍ଶନ କରିବା, ନିଜ ଅନୁଭବ ବାଣ୍ଟିବା ଏବଂ କ୍ରିକେଟ ତାଙ୍କୁ ଯାହା ଦେଇଛି ତାହାର ଋଣ ସୁଝାଇବା ତାଙ୍କର ପରବର୍ତ୍ତୀ ଲକ୍ଷ୍ୟ ବୋଲି ସେ କହିଛନ୍ତି।
