ଦେଶର ମେଡିକାଲ୍ ଡିଭାଇସ୍ କ୍ଷେତ୍ରକୁ ଆହୁରି ସରଳ ଓ ବ୍ୟବସାୟ ଅନୁକୂଳ କରିବା ପାଇଁ ବଡ଼ ପଦକ୍ଷେପ ନେଇଛି କେନ୍ଦ୍ର ସରକାର। ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ Medical Devices Rules, 2017ରେ ସଂଶୋଧନ ପାଇଁ ପ୍ରସ୍ତାବ ରଖିଛି। ଏହି ପ୍ରସ୍ତାବ ଲାଗୁ ହେଲେ ନିୟାମକ ପ୍ରକ୍ରିୟା ସରଳ ହେବା ସହ ଯୋଗ୍ୟ ମେଡିକାଲ୍ ଡିଭାଇସ୍ ଭାରତୀୟ ବଜାରରେ ଶୀଘ୍ର ପହଞ୍ଚିପାରିବ।
ପ୍ରସ୍ତାବିତ ସଂଶୋଧନରେ ତିନିଟି ପ୍ରମୁଖ କ୍ଷେତ୍ରକୁ ଗୁରୁତ୍ୱ ଦିଆଯାଇଛି—ଆଉଟ୍ସୋର୍ସଡ୍ ସ୍ଟେରିଲାଇଜେସନ୍, ମେଡିକାଲ୍ ଡିଭାଇସ୍ ଟେଷ୍ଟିଂ ଫି’ର ମାନକୀକରଣ ଏବଂ କିଛି ଡିଭାଇସ୍ ପାଇଁ କ୍ଲିନିକାଲ୍ ଇନ୍ଭେଷ୍ଟିଗେସନ୍ ଆବଶ୍ୟକତାରେ ରିହାତି।
Rule 44ରେ ପ୍ରସ୍ତାବିତ ସଂଶୋଧନ ଅନୁସାରେ, ନିର୍ମାତାମାନେ ଯଦି ବୈଧ ଲାଇସେନ୍ସ ଥିବା ଆଉଟ୍ସୋର୍ସଡ୍ ସ୍ଟେରିଲାଇଜେସନ୍ ସୁବିଧା ବ୍ୟବହାର କରନ୍ତି, ତେବେ ଏଥିପାଇଁ ଅଲଗା ଲୋନ୍ ଲାଇସେନ୍ସ ନେବାକୁ ପଡ଼ିବ ନାହିଁ। ଏହାଦ୍ୱାରା କାଗଜପତ୍ର, ଅନୁମୋଦନ ସମୟ ଓ ଅତିରିକ୍ତ ଖର୍ଚ୍ଚ କମିବା ଆଶା କରାଯାଉଛି।
ମେଡିକାଲ୍ ଡିଭାଇସ୍ ଟେଷ୍ଟିଂ ଲାବରେଟୋରୀ ପାଇଁ ନବମ ସିଡ୍ୟୁଲ୍ରେ ଏକ ସମାନ ଟେଷ୍ଟିଂ ଫି’ ନିର୍ଦ୍ଧାରଣ କରିବାକୁ ପ୍ରସ୍ତାବ ରହିଛି। ଏହାଦ୍ୱାରା ଭିନ୍ନ ଲାବରେଟୋରୀରେ ଟେଷ୍ଟିଂ ଚାର୍ଜକୁ ନେଇ ଅସ୍ପଷ୍ଟତା ଓ ବିବାଦ କମିବ। ନିର୍ମାତା ଓ ଆମଦାନୀକାରୀମାନେ ମଧ୍ୟ ଖର୍ଚ୍ଚ ସମ୍ପର୍କରେ ଅଧିକ ସ୍ପଷ୍ଟତା ପାଇପାରିବେ।
Rule 63ରେ ପ୍ରସ୍ତାବିତ ସଂଶୋଧନ ଅନୁସାରେ ୟୁରୋପୀୟ ସଂଘ (EU)କୁ କଠୋର ନିୟାମକ ବ୍ୟବସ୍ଥା ଥିବା ଅଞ୍ଚଳ ଭାବେ ସ୍ୱୀକୃତି ଦିଆଯିବ। ବର୍ତ୍ତମାନ ଏହି ତାଲିକାରେ ଆମେରିକା, ବ୍ରିଟେନ୍, ଅଷ୍ଟ୍ରେଲିଆ, କାନାଡା ଓ ଜାପାନ ରହିଛନ୍ତି।
EUରେ ପୂର୍ବରୁ ଅନୁମୋଦିତ କିଛି ଯୋଗ୍ୟ ମେଡିକାଲ୍ ଡିଭାଇସ୍ ପାଇଁ ଭାରତରେ କ୍ଲିନିକାଲ୍ ଇନ୍ଭେଷ୍ଟିଗେସନ୍ ଆବଶ୍ୟକତାରୁ ରିହାତି ମିଳିପାରିବ। ଫଳରେ ଏହି ଡିଭାଇସ୍ଗୁଡ଼ିକ ଭାରତୀୟ ବଜାରରେ ଅପେକ୍ଷାକୃତ ଶୀଘ୍ର ପ୍ରବେଶ କରିପାରିବେ।
ସରକାରଙ୍କ ଅନୁସାରେ, ପ୍ରସ୍ତାବିତ ସଂଶୋଧନ ଦ୍ୱାରା ନିୟମ ସରଳ ହେବ, ଅନୁପାଳନ ଖର୍ଚ୍ଚ କମିବ ଏବଂ ମେଡିକାଲ୍ ଡିଭାଇସ୍ କ୍ଷେତ୍ରରେ ସ୍ୱଚ୍ଛତା ଓ ପୂର୍ବାନୁମାନଯୋଗ୍ୟତା ବଢ଼ିବ।
ଏହି ପଦକ୍ଷେପକୁ ସରକାରଙ୍କ ‘Ease of Doing Business’ ଅଭିଯାନର ଅଂଶ ଭାବେ ଦେଖାଯାଉଛି। ଏହା ସହିତ ଉନ୍ନତ ଓ ନୂଆ ଚିକିତ୍ସା ପ୍ରଯୁକ୍ତି ଭାରତରେ ଶୀଘ୍ର ଉପଲବ୍ଧ କରାଇବା ସରକାରଙ୍କ ମୁଖ୍ୟ ଲକ୍ଷ୍ୟ ରହିଛି।
