ପୁରୀ: ରଥଯାତ୍ରା-୨୦୨୬କୁ ସୁରକ୍ଷିତ, ଶୃଙ୍ଖଳିତ ଓ ଯାତ୍ରୀବନ୍ଧବ କରିବା ପାଇଁ ଓଡ଼ିଶା ପୋଲିସ ପକ୍ଷରୁ ବ୍ୟାପକ ଟ୍ରାଫିକ୍ ପରିଚାଳନା ଯୋଜନା ପ୍ରସ୍ତୁତ କରାଯାଇଛି। ଆଧୁନିକ ପ୍ରଯୁକ୍ତିର ବ୍ୟବହାର ସହ ଏଥର ଟ୍ରାଫିକ୍ ଉପରେ AI, CCTV କ୍ୟାମେରା ଓ ଡ୍ରୋନ୍ ମାଧ୍ୟମରେ ସତର୍କ ନଜର ରଖାଯିବ। ଏଥିସହ ଯାତ୍ରୀଙ୍କ ସୁବିଧା ପାଇଁ ୩୦ଟି ପାର୍କିଂ ସ୍ଥଳୀ, ବହୁ ସଂଖ୍ୟକ ସାଇନେଜ୍ ଏବଂ ରିଅଲ୍-ଟାଇମ୍ ଟ୍ରାଫିକ୍ ସୂଚନା ବ୍ୟବସ୍ଥା କରାଯାଇଛି।
୩୦ଟି ପାର୍କିଂ ସ୍ଥଳୀର ବ୍ୟବସ୍ଥା
ଏବର୍ଷ ଭକ୍ତଙ୍କ ସୁବିଧା ପାଇଁ ପୁରୀରେ ମୋଟ ୩୦ଟି ପାର୍କିଂ ସ୍ଥାନ ଚିହ୍ନଟ କରାଯାଇଛି।
- ୪ ଚକିଆ ଯାନ ପାଇଁ: ୨୨ଟି ପାର୍କିଂ (୧୮ଟି ସାଧାରଣ ଓ ୪ଟି ପାସ୍ଧାରୀଙ୍କ ପାଇଁ)
- କ୍ଷମତା: ପ୍ରାୟ ୭,୭୩୦ଟି ଗାଡ଼ି
- ୨ ଚକିଆ ଯାନ ପାଇଁ: ୪ଟି ପାର୍କିଂ (ପ୍ରାୟ ୧୫,୦୦୦ ଯାନ)
- ବସ୍ ପାଇଁ: ୪ଟି ପାର୍କିଂ (ପ୍ରାୟ ୭୫୦ଟି ବସ୍)
ଗତ ବର୍ଷ ତୁଳନାରେ ଏଥର ୬ଟି ନୂଆ ପାର୍କିଂ ସ୍ଥଳୀ ଯୋଡ଼ାଯାଇଥିବା ବେଳେ ମୋଟ ପାର୍କିଂ କ୍ଷମତା ମଧ୍ୟ ବୃଦ୍ଧି ପାଇଛି।
ପାସ୍ ଓ ସାଧାରଣ ଯାନ ପାଇଁ ଅଲଗା ବ୍ୟବସ୍ଥା
ପାସ୍ଧାରୀ ଯାନବାହନ ପାଇଁ ସ୍ୱତନ୍ତ୍ର ୪ଟି ପାର୍କିଂ ସ୍ଥାନ ରହିଥିବା ବେଳେ ସାଧାରଣ ଯାନବାହନ ପାଇଁ ୧୮ଟି ପାର୍କିଂ ସ୍ଥଳୀ ରଖାଯାଇଛି। ସମଙ୍ଗ, ସେଣ୍ଟ୍ରାଲ ସ୍କୁଲ, ଶ୍ରୀସେତୁ, ଭୂଦାନ, ITI କଲେଜ, ହେଲିପ୍ୟାଡ୍, ଇଣ୍ଡୋର ଷ୍ଟାଡିୟମ, ତାଳବଣିଆ, ଷ୍ଟର୍ଲିଂ ଛକ ଓ ସରଧାବାଲି ଅଞ୍ଚଳରେ ଏହି ବ୍ୟବସ୍ଥା କରାଯାଇଛି।
AI ଦ୍ୱାରା ଟ୍ରାଫିକ୍ ମନିଟରିଂ
ଏଥର AI ଆଧାରିତ ପ୍ରଣାଳୀ ସହ ମାନୁଆଲ୍ ମନିଟରିଂ ମାଧ୍ୟମରେ ଯାନବାହନର ଆଗମନ ଓ ପ୍ରସ୍ଥାନ ଉପରେ ନଜର ରଖାଯିବ, ଯାହା ଟ୍ରାଫିକ୍ ପରିଚାଳନାକୁ ଅଧିକ ପ୍ରଭାବଶାଳୀ କରିବ।
୧,୬୪୫ଟି ସାଇନେଜ୍ ଓ ରିଅଲ୍-ଟାଇମ୍ ସୂଚନା
ଯାତ୍ରୀଙ୍କୁ ସଠିକ୍ ମାର୍ଗଦର୍ଶନ ପାଇଁ ୫୯୫ଟି ସ୍ଥାୟୀ ଏବଂ ୧,୦୫୦ଟି ଅସ୍ଥାୟୀ ସାଇନେଜ୍ ସ୍ଥାପନ କରାଯାଇଛି। ଜାତୀୟ ରାଜପଥରେ LED ଡିସ୍ପ୍ଲେ ମାଧ୍ୟମରେ ଟ୍ରାଫିକ୍ ସମ୍ପର୍କିତ ସୂଚନା ନିରନ୍ତର ପ୍ରଦାନ କରାଯିବ।
ମୋବାଇଲ୍ LED ଓ SMS ଆଲର୍ଟ
ଉତ୍ତରା-ଲିଙ୍ଗିପୁର ଏବଂ ଭୁବନେଶ୍ୱର ଅଞ୍ଚଳରେ ମୋବାଇଲ୍ LED ୟୁନିଟ୍ ମୁତୟନ କରାଯାଇଛି। ଟ୍ରାଫିକ୍ ଜାମ୍, ରାସ୍ତା ପରିସ୍ଥିତି ଓ ବିକଳ୍ପ ମାର୍ଗ ସମ୍ପର୍କିତ ସୂଚନା Bulk SMS ମାଧ୍ୟମରେ ମଧ୍ୟ ପ୍ରଦାନ କରାଯିବ।
୭୩ଟି ଟ୍ରାଫିକ୍ ସହାୟତା କେନ୍ଦ୍ର
ପୁରୀର ବିଭିନ୍ନ ସ୍ଥାନରେ ୭୩ଟି ଟ୍ରାଫିକ୍ ସହାୟତା କେନ୍ଦ୍ର ଖୋଲାଯାଇଛି। ତାଳବଣିଆ ଓ ମାଳତୀପାଟପୁରରେ ବୃଦ୍ଧ ଏବଂ ଦିବ୍ୟାଙ୍ଗଙ୍କ ପାଇଁ ସ୍ୱତନ୍ତ୍ର ସହାୟତା କେନ୍ଦ୍ରରେ ପିଇବା ପାଣି, ବିଶ୍ରାମ ଓ ଅନ୍ୟାନ୍ୟ ଆବଶ୍ୟକ ସୁବିଧା ଉପଲବ୍ଧ ରହିବ।
CCTV ଓ ଡ୍ରୋନ୍ର କଡ଼ା ନଜର
ରଥଯାତ୍ରା ସମୟରେ ଟ୍ରାଫିକ୍ ଏବଂ ସୁରକ୍ଷା ବ୍ୟବସ୍ଥା ଉପରେ ୨୪୪ଟି CCTV କ୍ୟାମେରା ଓ ୩ଟି ଡ୍ରୋନ୍ ମାଧ୍ୟମରେ ନିରନ୍ତର ନଜର ରଖାଯିବ।
୧୬ ଜୁଲାଇରୁ ନୋ-ଭେହିକଲ୍ ଜୋନ୍
୧୬ ଜୁଲାଇ ରାତି ୧୨ଟାରୁ ୧୭ ଜୁଲାଇ ରାତି ୧୨ଟା ପର୍ଯ୍ୟନ୍ତ ଗ୍ରାଣ୍ଡ ରୋଡ୍ ସମେତ ପୁରୀର ଅନେକ ପ୍ରମୁଖ ରାସ୍ତାକୁ ନୋ-ଭେହିକଲ୍ ଜୋନ୍ ଘୋଷଣା କରାଯାଇଛି। ଏହି ସମୟରେ ନିର୍ଦ୍ଦିଷ୍ଟ ଅଞ୍ଚଳରେ ସାଧାରଣ ଯାନ ଚଳାଚଳ ଉପରେ କଟକଣା ଲାଗୁ ରହିବ।
ରଥଯାତ୍ରାରେ ଲକ୍ଷାଧିକ ଭକ୍ତଙ୍କ ସୁରକ୍ଷା ଏବଂ ସୁଚାରୁ ଯାତାୟାତକୁ ଲକ୍ଷ୍ୟରେ ରଖି ଏହି ସମନ୍ୱିତ ଟ୍ରାଫିକ୍ ବ୍ୟବସ୍ଥା କରାଯାଇଛି। ପୋଲିସ ପ୍ରଶାସନ ସମସ୍ତଙ୍କୁ ଟ୍ରାଫିକ୍ ନିୟମ ପାଳନ କରି ସହଯୋଗ କରିବାକୁ ଅନୁରୋଧ କରିଛି।
