ତାମିଳନାଡୁରେ ମୁଖ୍ୟମନ୍ତ୍ରୀ ବିଜୟ ଥଳପତିଙ୍କ ସରକାର ଗଠନ ହୋଇ ଦୁଇ ମାସ ମଧ୍ୟ ପୂରଣ ହୋଇନଥିବା ବେଳେ ରାଜ୍ୟରେ ରାଜନୈତିକ ଉତ୍ତେଜନା ବଢ଼ିଛି। ବିଧାୟକଙ୍କୁ ଟଙ୍କା ଲୋଭ ଦେଇ ଦଳ ବଦଳ କରାଇବାକୁ ଚେଷ୍ଟା ହୋଇଥିବା ଅଭିଯୋଗକୁ ନେଇ TVK ଓ ଡିଏମକେ ପରସ୍ପର ବିରୋଧରେ ସାମ୍ନାସାମ୍ନି ହୋଇଛନ୍ତି।
ଏହି ମାମଲାରେ ଚେନ୍ନାଇ ପୋଲିସ ଜଣେ ୟୁଟ୍ୟୁବର ଏବଂ ଡିଏମକେର ଦୁଇଜଣ କର୍ମୀଙ୍କୁ ଗିରଫ କରିଛି। TVK ବିଧାୟକ ଏନ୍. ଇଲାୟାରାଜା ଅଭିଯୋଗ କରିଛନ୍ତି ଯେ, ତାଙ୍କୁ ସରକାରୀ ଦଳ ଛାଡ଼ିବା ପାଇଁ ବାରମ୍ବାର ଚାପ ଦିଆଯାଉଥିଲା। ସେ କହିଛନ୍ତି, ୟୁଟ୍ୟୁବର ଆଇ.ପି.ଡି.ଏସ୍. ଥିରୁନାଭୁକ୍କରସୁ ତାଙ୍କ ସହ ଯୋଗାଯୋଗ କରି ଧମକ ଦେଇଥିଲେ ଏବଂ ସମର୍ଥନ ଦେବାକୁ ଚାପ ପକାଇଥିଲେ।
ଏହି ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରି ଥିରୁନାଭୁକ୍କରସୁଙ୍କୁ ଗିରଫ କରିଛି। ପରେ ଡିଏମକେର ଦୁଇଜଣ ପଦାଧିକାରୀଙ୍କୁ ମଧ୍ୟ ଗିରଫ କରାଯାଇଛି। ପୋଲିସ କହିଛି ଯେ, ଏହି ଘଟଣାରେ ଆଉ କେହି ଜଡ଼ିତ ଅଛନ୍ତି କି ନାହିଁ, ସେନେଇ ତଦନ୍ତ ଚାଲିଛି।
ତାମିଳନାଡୁ ସରକାରଙ୍କ ମନ୍ତ୍ରୀ ନିର୍ମଳ କୁମାର କହିଛନ୍ତି ଯେ, ସରକାରକୁ ଅସ୍ଥିର କରିବା ପାଇଁ TVKର ତିନିଜଣ ବିଧାୟକଙ୍କୁ ଦଳ ବଦଳ କରିବାକୁ ୧୫ କୋଟି ଟଙ୍କା ଯାଏଁ ପ୍ରସ୍ତାବ ଦିଆଯାଇଥିବା ଅଭିଯୋଗ ମିଳିଛି। ପୋଲିସ ଏହି ଦାବିର ତଦନ୍ତ କରୁଛି।
ଅନ୍ୟପଟେ ଡିଏମକେ ରାଜ୍ୟପାଳ ଆର.ଭି. ଆର୍ଲେକରଙ୍କୁ ଚିଠି ଲେଖି ମୁଖ୍ୟମନ୍ତ୍ରୀ ବିଜୟ ଥଳପତିଙ୍କ ବିରୋଧରେ ତଦନ୍ତ ଦାବି କରିଛି। ଦଳର ଅଭିଯୋଗ ଅନୁସାରେ, ମୁଖ୍ୟମନ୍ତ୍ରୀ ଦୁଇଜଣ ବିଧାୟକଙ୍କୁ ନିଜ ପକ୍ଷକୁ ଆଣିବାକୁ ଚେଷ୍ଟା କରିଥିଲେ।
ଏହି ବିବାଦକୁ ନେଇ ବିଜେପି ମଧ୍ୟ TVKକୁ କଡ଼ା ସମାଲୋଚନା କରିଛି। ତାମିଳନାଡୁ ବିଜେପି ପ୍ରବକ୍ତା ନାରାୟଣନ ତିରୁପତି କହିଛନ୍ତି ଯେ, TVKର ମେଣ୍ଟ ଏକ ସୁଯୋଗବାଦୀ ମେଣ୍ଟ ଏବଂ ବିଧାୟକ କିଣାବିକ୍ରି ଭଳି ଘଟଣାରେ ଏହାର ଭୂମିକା ରହିଛି।
ଏହି ଘଟଣା ପରେ ତାମିଳନାଡୁର ରାଜନୀତି ଆହୁରି ସରଗରମ ହୋଇପଡ଼ିଛି। ବିଧାୟକ କିଣାବିକ୍ରି ଅଭିଯୋଗର ସତ୍ୟତା କଣ, ତାହା ତଦନ୍ତ ପରେ ସ୍ପଷ୍ଟ ହେବ।
