କର୍ଣ୍ଣାଟକର ବେଙ୍ଗାଲୁରୁର ଚର୍ଚ୍ଚିତ କେଆର୍ ପୁରମ ଟ୍ରିପଲ ମର୍ଡର ମାମଲାରେ ପୋଲିସକୁ ଆଉ ଏକ ବଡ଼ ସଫଳତା ମିଳିଛି। ମୁଖ୍ୟ ଅଭିଯୁକ୍ତ ଶ୍ୱେତାଙ୍କ ବୟଫ୍ରେଣ୍ଡ କେନେଥଙ୍କୁ ମଧ୍ୟ ପୋଲିସ ଗିରଫ କରିଛି। ଏହାପୂର୍ବରୁ ଏହି ମାମଲାରେ ଶ୍ୱେତାଙ୍କୁ ପୁଡୁଚେରୀରୁ ଗିରଫ କରାଯାଇଥିଲା।
ପୋଲିସ ପାଖରେ ସୂଚନା ଥିଲା ଯେ କେନେଥ ମଧ୍ୟ ପୁଡୁଚେରୀରେ ଲୁଚି ରହିଛନ୍ତି। ଏହାପରେ ବେଙ୍ଗାଲୁରୁ ପୋଲିସ ପୁଡୁଚେରୀ ପୋଲିସର ସହଯୋଗରେ ତାଙ୍କୁ ଗିରଫ କରିଛି। ବର୍ତ୍ତମାନ ତାଙ୍କୁ ବେଙ୍ଗାଲୁରୁ ଅଣାଯାଉଛି। ସେଠାରେ ପହଞ୍ଚିବା ପରେ ତାଙ୍କୁ ଅଦାଲତରେ ହାଜର କରାଯିବ।
ତଦନ୍ତରେ ଜଣାପଡ଼ିଛି ଯେ, ଟ୍ରିପଲ ମର୍ଡର ଘଟାଇବା ପରେ ଶ୍ୱେତା ଓ କେନେଥ ନିଜ ମୋବାଇଲ ଫୋନ ବନ୍ଦ କରି ଏକ ଦୁଇଚକିଆ ଯାନରେ ଫେରାର ହୋଇଥିଲେ। ପ୍ରାୟ ୨୦୦ କିଲୋମିଟର ଯିବା ପରେ ସେମାନଙ୍କ ବାଇକ ଖରାପ ହୋଇଯାଇଥିଲା। ଏହାପରେ ଦୁହେଁ ବସରେ ପୁଡୁଚେରୀ ପହଞ୍ଚିଥିଲେ ଏବଂ ସେଠାରେ ଅଲଗା ହୋଇଯାଇଥିଲେ।
ପୋଲିସ କହିଛି, ଶ୍ୱେତା ଅନ୍ୟ ଏକ ସ୍ଥାନକୁ ଫେରାର ହେବାକୁ ପ୍ରସ୍ତୁତି କରୁଥିବା ବେଳେ ତାଙ୍କୁ ଗିରଫ କରାଯାଇଥିଲା। ବର୍ତ୍ତମାନ ଶ୍ୱେତାଙ୍କୁ ୭ ଦିନିଆ ପୋଲିସ ହେପାଜତରେ ରଖାଯାଇଛି।
ପୋଲିସର ସୂଚନା ଅନୁସାରେ, ସିସିଟିଭି ଫୁଟେଜ ଓ ସ୍ଥାନୀୟ ଗୁଇନ୍ଦା ସୂଚନାକୁ ଆଧାର କରି ଦୁଇ ଅଭିଯୁକ୍ତଙ୍କୁ ଠାବ କରିବାରେ ସଫଳତା ମିଳିଛି।
ଆରମ୍ଭରୁ ହିଁ ପୋଲିସର ସନ୍ଦେହ ପରିବାରର ବଡ଼ ଝିଅ ଶ୍ୱେତା ଓ ତାଙ୍କ ଲିଭ୍-ଇନ୍ ପାର୍ଟନର କେନେଥଙ୍କ ଉପରେ ଥିଲା। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଶ୍ୱେତାଙ୍କ ବାପା-ମାଆ ତାଙ୍କ ସମ୍ପର୍କକୁ ବିରୋଧ କରୁଥିଲେ। ଏହି ବିରୋଧ ହିଁ ଟ୍ରିପଲ ମର୍ଡର ଘଟଣାର ପ୍ରମୁଖ କାରଣ ହୋଇଥାଇପାରେ ବୋଲି ପୋଲିସ ସନ୍ଦେହ କରୁଛି। ଘଟଣାର ଅଧିକ ତଦନ୍ତ ଜାରି ରହିଛି।
