ଉତ୍ତରପ୍ରଦେଶ ବିଧାନସଭା ନିର୍ବାଚନକୁ ନେଇ ରାଜନୈତିକ ତତ୍ପରତା ବଢ଼ିବା ସହ ବିରୋଧୀ ଦଳମାନଙ୍କ ମଧ୍ୟରେ ମତଭେଦ ମଧ୍ୟ ସାମ୍ନାକୁ ଆସୁଛି। ୨୦୨୪ ଲୋକସଭା ନିର୍ବାଚନରେ ଏକାଠି ଲଢ଼ିଥିବା ସମାଜବାଦୀ ପାର୍ଟି ଓ କଂଗ୍ରେସ ଆଗାମୀ ବିଧାନସଭା ନିର୍ବାଚନରେ ମଧ୍ୟ ମେଣ୍ଟ କରିପାରନ୍ତି ବୋଲି ଚର୍ଚ୍ଚା ଚାଲିଛି। କିନ୍ତୁ ଏହାରି ଭିତରେ ଉଭୟ ଦଳର ନେତାଙ୍କ ମଧ୍ୟରେ ବାକ୍ଯୁଦ୍ଧ ଆରମ୍ଭ ହୋଇଛି।
କଂଗ୍ରେସ ସାଂସଦ ଇମ୍ରାନ ମସୁଦ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କ ଏକ ବୟାନକୁ ନେଇ କଡ଼ା ପ୍ରତିକ୍ରିୟା ଦେଇଛନ୍ତି। ଅଖିଳେଶ ଯାଦବ କଂଗ୍ରେସର ନିର୍ବାଚନୀ ପ୍ରସ୍ତୁତି ଉପରେ ମତ ଦେଇଥିବା ବେଳେ, ଇମ୍ରାନ ମସୁଦ କହିଛନ୍ତି ଯେ ଯଦି ଅଖିଳେଶଙ୍କୁ ଲାଗୁଛି କଂଗ୍ରେସ ଦୁର୍ବଳ, ତେବେ ସେ ଏକାକୀ ନିର୍ବାଚନ ଲଢ଼ି ଦେଖାନ୍ତୁ।
ଇମ୍ରାନ ମସୁଦ ଆହୁରି ଅଭିଯୋଗ କରିଛନ୍ତି ଯେ ଦେଶରେ ମୁସଲମାନଙ୍କ ଉପରେ ଅତ୍ୟାଚାର ଓ ମସଜିଦ ସମ୍ପର୍କିତ ବିବାଦ ଭଳି ପ୍ରସଙ୍ଗରେ ଅଖିଳେଶ ଯାଦବ ଚୁପ୍ ରହୁଛନ୍ତି। ଏହି ପ୍ରସଙ୍ଗଗୁଡ଼ିକରେ ସପା ନେତୃତ୍ୱ ପକ୍ଷରୁ କୌଣସି ସ୍ପଷ୍ଟ ମତ ଆସୁନଥିବା ସେ କହିଛନ୍ତି।
ଉତ୍ତରପ୍ରଦେଶ ନିର୍ବାଚନ ପାଇଁ କଂଗ୍ରେସ ପ୍ରସ୍ତୁତି ଆରମ୍ଭ କରିଥିବା ମଧ୍ୟ ଇମ୍ରାନ ମସୁଦ କହିଛନ୍ତି। ତାଙ୍କ ମତରେ, ଦଳ ରାଜ୍ୟର ସମସ୍ତ ୪୦୩ ବିଧାନସଭା ଆସନ ପାଇଁ ପ୍ରସ୍ତୁତି ଚଳାଇଛି ଏବଂ ଆବଶ୍ୟକ ପଡ଼ିଲେ କୌଣସି ମେଣ୍ଟ ବିନା ମଧ୍ୟ ନିର୍ବାଚନ ଲଢ଼ିବାକୁ ପ୍ରସ୍ତୁତ ଅଛି।
ତେବେ INDIA ମେଣ୍ଟର ଭବିଷ୍ୟତକୁ ନେଇ ଇମ୍ରାନ ମସୁଦ ସକାରାତ୍ମକ ମତ ରଖିଛନ୍ତି। ସେ କହିଛନ୍ତି ଯେ ମେଣ୍ଟର ସମସ୍ତ ସହଯୋଗୀ ଦଳ ଏକାଠି ଅଛନ୍ତି ଏବଂ ଏହାକୁ ଆହୁରି ମଜବୁତ କରିବା ଦିଗରେ କାମ ହେବ।
ଅନ୍ୟପଟେ, ନିକଟରେ ଏକ ପଡ୍କାଷ୍ଟରେ ଅଖିଳେଶ ଯାଦବ କହିଥିଲେ ଯେ କଂଗ୍ରେସ ମଧ୍ୟ ୪୦୩ଟି ଆସନ ପାଇଁ ପ୍ରସ୍ତୁତି କରୁଛି ଏବଂ ସମାଜବାଦୀ ପାର୍ଟି ମଧ୍ୟ ନିଜର ପ୍ରସ୍ତୁତି ଜାରି ରଖିଛି। ଦୁଇ ଦଳ ମିଳିତ ଭାବେ ନିର୍ବାଚନ ଲଢ଼ିବେ ବୋଲି ସେ କହିଥିଲେ, କିନ୍ତୁ ଏଯାଏଁ ଯେତେ ପ୍ରସ୍ତୁତି ହେବା କଥା ସେତେଟା ଦେଖିବାକୁ ମିଳୁନାହିଁ ବୋଲି ମଧ୍ୟ ମତ ରଖିଥିଲେ।
ଏହି ବୟାନ ପରେ ସପା ଓ କଂଗ୍ରେସ ମଧ୍ୟରେ ମତଭେଦ ଚର୍ଚ୍ଚାର ବିଷୟ ପାଲଟିଛି। ଆଗାମୀ ଦିନରେ ଉଭୟ ଦଳ ମଧ୍ୟରେ ସମ୍ପର୍କ କେଉଁ ଦିଗକୁ ଯିବ, ତାହା ଉପରେ ରାଜନୈତିକ ମହଲର ନଜର ରହିଛି।
