ଭୁବନେଶ୍ୱର, ୧୮ ଜୁନ୍:
ଦେଶରେ ମୌସୁମୀ ବର୍ଷାର ଅଗ୍ରଗତି ଗତ କିଛି ଦିନ ଧରି ମନ୍ଥର ହୋଇପଡ଼ିଛି। ଭାରତୀୟ ପାଣିପାଗ ବିଭାଗ (IMD) ସୂଚନା ଅନୁସାରେ, ଜୁନ୍ ୪ରୁ ୧୮ ମଧ୍ୟରେ ମୌସୁମୀ ୧୯ଟି ରାଜ୍ୟରେ ପହଞ୍ଚିଥିଲେ ମଧ୍ୟ ଜୁନ୍ ୮ ପରଠାରୁ ତେଲେଙ୍ଗାନାର ଭଦ୍ରାଚଳମ ଅଞ୍ଚଳରେ ଅଟକି ରହିଛି। ଆବହା ବିଶେଷଜ୍ଞଙ୍କ ମତରେ, ଜୁନ୍ ୨୨ ସୁଦ୍ଧା ମୌସୁମୀ ଉତ୍ତର-ପଶ୍ଚିମ ଓ ମଧ୍ୟ ଭାରତର ଅଧିକାଂଶ ଅଞ୍ଚଳକୁ ବିସ୍ତାର ହେବାର ସମ୍ଭାବନା ରହିଛି।
ଚଳିତ ବର୍ଷ ଜୁନ୍ ମାସରେ ମୌସୁମୀ ପ୍ରାୟ ଦୁଇ ସପ୍ତାହ ଧରି ବିରତି ନେଇଥିବା ଦେଖାଯାଇଛି। ଫଳରେ ଦେଶବ୍ୟାପୀ ବର୍ଷା ପରିମାଣ ସାଧାରଣ ହାରଠାରୁ ଅନେକ କମ୍ ରହିଛି। ଜୁନ୍ ୧୭ ସୁଦ୍ଧା ସାରା ଦେଶରେ ବର୍ଷାର ଘାଟତି ପ୍ରାୟ ୩୮ ପ୍ରତିଶତ ରେକର୍ଡ ହୋଇଛି।
ଏପରି ସ୍ଥିତିରେ ଉତ୍ତର-ପୂର୍ବ ଭାରତର ଅରୁଣାଚଳ ପ୍ରଦେଶ, ଆସାମ, ମେଘାଳୟ, ନାଗାଲାଣ୍ଡ, ମଣିପୁର, ମିଜୋରାମ ଓ ତ୍ରିପୁରାରେ ପ୍ରବଳ ବର୍ଷା ସମ୍ଭାବନା ରହିଛି। ସେହିପରି କେରଳ, ତାମିଲନାଡୁ, ପୁଡୁଚେରୀ ଓ କର୍ଣ୍ଣାଟକର କିଛି ଅଞ୍ଚଳରେ ମଧ୍ୟ ଭଲ ବର୍ଷା ହୋଇପାରେ।
ଅନ୍ୟପଟେ ଓଡ଼ିଶା, ବିହାର, ଝାଡ଼ଖଣ୍ଡ, ମଧ୍ୟ ପ୍ରଦେଶ, ଉତ୍ତର ପ୍ରଦେଶ, ତେଲେଙ୍ଗାନା ଓ ମହାରାଷ୍ଟ୍ରରେ ତାପମାତ୍ରା ୪୦ରୁ ୪୫ ଡିଗ୍ରୀ ସେଲସିୟସ୍ ମଧ୍ୟରେ ରହୁଥିବାରୁ ଲୋକେ ଗ୍ରୀଷ୍ମ ପ୍ରବାହର ସମ୍ମୁଖୀନ ହେଉଛନ୍ତି। ଓଡ଼ିଶାର କିଛି ଅଞ୍ଚଳରେ ଗରମ ସହ ଆର୍ଦ୍ରତା ବୃଦ୍ଧି ପାଇବାରୁ ଅସହ୍ୟ ଗୁଳୁଗୁଳି ଅନୁଭୂତ ହେଉଛି।
ପାଣିପାଗ ବିଭାଗ ଆକଳନ କରିଛି ଯେ ଜୁନ୍ ୧୯ ଓ ୨୦ ତାରିଖରେ ଓଡ଼ିଶା, ବିହାର, ଝାଡ଼ଖଣ୍ଡ ଓ ପଶ୍ଚିମବଙ୍ଗର କିଛି ସ୍ଥାନରେ ବଜ୍ରପାତ ସହ ବର୍ଷା ହୋଇପାରେ। କେତେକ ଅଞ୍ଚଳରେ ଘଣ୍ଟାପ୍ରତି ୫୦ରୁ ୭୦ କିଲୋମିଟର ବେଗରେ ପବନ ବହିବାର ମଧ୍ୟ ସମ୍ଭାବନା ରହିଛି।
ବର୍ଷାର ଅପେକ୍ଷା ମଧ୍ୟରେ ଦେଶର ଅନେକ ଅଞ୍ଚଳରେ ଗରମ ଓ ଆର୍ଦ୍ର ପାଗ ଜାରି ରହିଥିବାବେଳେ ଆସନ୍ତା କିଛି ଦିନ ମଧ୍ୟରେ ମୌସୁମୀର ଅଗ୍ରଗତି ଉପରେ ସମସ୍ତଙ୍କ ନଜର ରହିଛି।
