ରାଜସ୍ଥାନର ଜୟପୁରରୁ ଜଣେ ୩୮ ବର୍ଷୀୟା ମହିଳାଙ୍କୁ ଜୈଶ-ଇ-ମହମ୍ମଦ ଆତଙ୍କବାଦୀ ସଂଗଠନ ସହ ସମ୍ପର୍କ ରଖିଥିବା ଅଭିଯୋଗରେ ଗିରଫ କରାଯାଇଛି। ଗିରଫ ହୋଇଥିବା ମହିଳାଙ୍କ ନାମ ବବିତା ଧାକଡ଼ ଓରଫ ଖଦିଜା। ରାଜସ୍ଥାନ ଆଣ୍ଟି ଟେରରିଷ୍ଟ ସ୍କ୍ୱାଡ୍ (ATS) ତାଙ୍କୁ ରବିବାର ଗିରଫ କରିଥିଲା। ତାଙ୍କ ବିରୋଧରେ ୟୁଏପିଏ (UAPA)ର ବିଭିନ୍ନ ଧାରାରେ ମାମଲା ରୁଜୁ କରାଯାଇଛି। ଅଦାଲତ ତାଙ୍କୁ ଜୁନ୍ ୨୭ ପର୍ଯ୍ୟନ୍ତ ପୋଲିସ ହେପାଜତକୁ ପଠାଇଛନ୍ତି।
ତଦନ୍ତକାରୀ ସଂସ୍ଥା କହିଛି, ମହିଳାଙ୍କ ଇଲେକ୍ଟ୍ରୋନିକ୍ ଡିଭାଇସର ଫରେନ୍ସିକ୍ ଯାଞ୍ଚରୁ ଅନେକ ପାକିସ୍ତାନୀ ନାଗରିକଙ୍କ ସହ ସମ୍ପର୍କ ଥିବା ସୂଚନା ମିଳିଛି। ଏଥିରେ ଜୈଶ-ଇ-ମହମ୍ମଦ ମୁଖ୍ୟ ମସୁଦ ଅଜହରଙ୍କ ଘନିଷ୍ଠ ସମ୍ପର୍କୀୟ ୟୁସୁଫ ଅଜହର ଏବଂ ଆତଙ୍କବାଦୀ କାରୀ ଜରାରଙ୍କ ସହ ଜଡ଼ିତ ନମ୍ବର ମଧ୍ୟ ରହିଥିବା ଅଭିଯୋଗ ରହିଛି।
ଅଧିକାରୀମାନଙ୍କ କହିବା ଅନୁସାରେ, ପାହାଲଗାମ ଆତଙ୍କୀ ଆକ୍ରମଣ ପରେ ବବିତାଙ୍କ ଉପରେ ସେନା ଗୁଇନ୍ଦା ସଂସ୍ଥା ନଜର ରଖିଥିଲା। ପଚରାଉଚରା ବେଳେ ବବିତା କହିଥିଲେ ଯେ, ୨୦୨୫ର ପାହାଲଗାମ ଆକ୍ରମଣ ପରେ ସେ ସୋସିଆଲ ମିଡିଆରେ ପାକିସ୍ତାନୀ ଆତଙ୍କବାଦୀଙ୍କ ବିଷୟରେ ଖୋଜିବା ଆରମ୍ଭ କରିଥିଲେ। ସେ ପାକିସ୍ତାନ ଅଧିକୃତ କାଶ୍ମୀର ସମ୍ବନ୍ଧୀୟ ପେଜ୍ ମଧ୍ୟ ଦେଖୁଥିଲେ ଏବଂ ଫେସବୁକ୍ ମେସେଞ୍ଜର ଓ ହ୍ୱାଟସଆପ୍ ମାଧ୍ୟମରେ ପାକିସ୍ତାନର ଅନେକ ଲୋକଙ୍କ ସହ ଯୋଗାଯୋଗରେ ଥିଲେ।
ପୋଲିସ କହିଛି, ତାଙ୍କ ମୋବାଇଲରୁ ନିଷିଦ୍ଧ ଆତଙ୍କୀ ସଂଗଠନର ସଦସ୍ୟଙ୍କ ସହ ଚାଟ୍, ଭିଡିଓ ଏବଂ କଣ୍ଟାକ୍ଟ ମିଳିଛି। ସେ ଭାରତୀୟ ମୋବାଇଲ ନମ୍ବରକୁ ଆସିଥିବା OTP ମଧ୍ୟ ଜୈଶର ଜଣେ ଅପରେଟିଭଙ୍କ ସହ ସେୟାର କରିଥିବା ଅଭିଯୋଗ ରହିଛି, ଯାହାକୁ ସୋସିଆଲ ମିଡିଆ ଓ ଅନ୍ୟ ଯୋଗାଯୋଗ ମାଧ୍ୟମରେ ବ୍ୟବହାର କରାଯାଇଥିଲା।
ତଦନ୍ତରେ ଆହୁରି ଜଣାପଡ଼ିଛି ଯେ, ବବିତାଙ୍କର ଅବୁ ଉବୈଦା ନାମକ ଜଣେ ବ୍ୟକ୍ତିଙ୍କ ସହ ଅନଲାଇନରେ ପରିଚୟ ହୋଇଥିଲା। ଧୀରେ ଧୀରେ ଦୁହିଁଙ୍କ ମଧ୍ୟରେ ଘନିଷ୍ଠ ସମ୍ପର୍କ ଗଢ଼ିଉଠିଥିଲା। ବବିତାଙ୍କ ବିବାହ ୨୦୧୮ରେ ହୋଇଥିଲେ ମଧ୍ୟ କିଛି ସମୟ ପରେ ସେ ଅଲଗା ହୋଇଯାଇଥିଲେ। ତଦନ୍ତ ଅନୁସାରେ, ଅବୁ ଉବୈଦା ବବିତାଙ୍କୁ ବିବାହ ପ୍ରସ୍ତାବ ଦେଇଥିଲେ ଏବଂ ଇସଲାମ ଧର୍ମର ରୀତିନୀତି ଅନୁସରଣ କରିବାକୁ ପ୍ରେରିତ କରିଥିଲେ। ତାଙ୍କୁ ନମାଜ ପଢ଼ିବା, କୁରଆନ ପଢ଼ିବା ଏବଂ ଜୈଶ-ଇ-ମହମ୍ମଦ ପାଇଁ କାମ କରିବାକୁ ପାକିସ୍ତାନ ଆସିବାକୁ କୁହାଯାଇଥିଲା। ଏଥିପାଇଁ ପାସପୋର୍ଟ କରିବାକୁ ମଧ୍ୟ କୁହାଯାଇଥିଲା।
ଅଧିକାରୀଙ୍କ ଦାବି ଅନୁସାରେ, ବବିତା, ଅବୁ ଉବୈଦା ଏବଂ ଜଣେ ଅନଲାଇନ ମୌଲବୀଙ୍କ ମଧ୍ୟରେ ପାକିସ୍ତାନ ଯିବାର ବିଭିନ୍ନ ରାସ୍ତା ନେଇ ଆଲୋଚନା ହୋଇଥିଲା। ନେପାଳ, ସାଉଦି ଆରବ ଓ ସଂଯୁକ୍ତ ଆରବ ଏମିରେଟ୍ସ ଦେଇ ପାକିସ୍ତାନ ଯିବା ଏବଂ କ୍ରିପ୍ଟୋକରେନ୍ସି ମାଧ୍ୟମରେ ଅର୍ଥ ସଂଗ୍ରହ କରିବା ନେଇ ମଧ୍ୟ ଚର୍ଚ୍ଚା ହୋଇଥିବା କୁହାଯାଇଛି। ଏହି ସମୟରେ ବବିତା କ୍ରିପ୍ଟୋକରେନ୍ସି ସମ୍ବନ୍ଧୀୟ କିଛି ଆପ୍ ମଧ୍ୟ ଡାଉନଲୋଡ୍ କରିଥିଲେ।
ପୋଲିସ କହିଛି, ବବିତା ଇସଲାମ ଧର୍ମ ଗ୍ରହଣ କରି ନିଜ ନାମ ପରିବର୍ତ୍ତନ କରି ଖଦିଜା ରଖିଥିଲେ। ବର୍ତ୍ତମାନ ଏହି ମାମଲାରେ ପଚରାଉଚରା ଓ ତଦନ୍ତ ଜାରି ରହିଛି।
