ଭାରତ ଓ ଆର୍ଜେଣ୍ଟିନା ମଧ୍ୟରେ ରଣନୈତିକ ଓ ଆର୍ଥିକ ସହଭାଗିତାକୁ ଆହୁରି ମଜବୁତ କରିବା ନେଇ ଦୁଇ ଦେଶ ପ୍ରତିବଦ୍ଧତା ଦୋହରାଇଛନ୍ତି। ଅଗଷ୍ଟ ୨୪ରେ ବୁଏନୋସ୍ ଆଇରେସ୍ର ପାଲାସିଓ ସାନ୍ ମାର୍ଟିନ୍ରେ ଅନୁଷ୍ଠିତ ଚତୁର୍ଥ ଭାରତ-ଆର୍ଜେଣ୍ଟିନା ଯୁଗ୍ମ ବାଣିଜ୍ୟ କମିଟି ବୈଠକରେ ବାଣିଜ୍ୟ, ନିବେଶ ଓ ପ୍ରଯୁକ୍ତି ସହଯୋଗ ନେଇ ବିସ୍ତୃତ ଆଲୋଚନା ହୋଇଛି।
ଭାରତୀୟ ପ୍ରତିନିଧି ଦଳର ନେତୃତ୍ୱ ବାଣିଜ୍ୟ ସଚିବ ରାଜେଶ ଅଗ୍ରୱାଲ କରିଥିବା ବେଳେ ଆର୍ଜେଣ୍ଟିନା ପକ୍ଷରୁ ଆନ୍ତର୍ଜାତିକ ଆର୍ଥିକ ସମ୍ପର୍କ ସଚିବ ଫର୍ନାଣ୍ଡୋ ବ୍ରୁନ୍ ନେତୃତ୍ୱ ନେଇଥିଲେ। ୨୦୨୫ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆର୍ଜେଣ୍ଟିନା ଗସ୍ତ ସମୟରେ ସହମତି ହୋଇଥିବା ରୋଡମ୍ୟାପ୍ର ଅଗ୍ରଗତି ସମୀକ୍ଷା କରାଯାଇଥିଲା।
୨୦୨୫ରେ ଭାରତ-ଆର୍ଜେଣ୍ଟିନା ଦ୍ୱିପାକ୍ଷିକ ବାଣିଜ୍ୟ ୬.୫ ବିଲିୟନ ଆମେରିକୀୟ ଡଲାର ଅତିକ୍ରମ କରିଛି। ବାର୍ଷିକ ଭିତ୍ତିରେ ବାଣିଜ୍ୟରେ ୧୭ ପ୍ରତିଶତରୁ ଅଧିକ ବୃଦ୍ଧି ହୋଇଛି। ଏହା ସହ ଭାରତ ଆର୍ଜେଣ୍ଟିନାର ପଞ୍ଚମ ବୃହତ୍ତମ ବାଣିଜ୍ୟିକ ଭାଗିଦାର ହୋଇଛି।
ବୈଠକରେ ଖଣି, ଶକ୍ତି ଓ ଭିତ୍ତିଭୂମି କ୍ଷେତ୍ରରେ ନିବେଶ ସୁଯୋଗ ନେଇ ମଧ୍ୟ ଆଲୋଚନା ହୋଇଛି। ଆର୍ଜେଣ୍ଟିନାର ଲିଥିୟମ୍ କ୍ଷେତ୍ରରେ ଭାରତୀୟ କମ୍ପାନୀ KABILର ନିବେଶ ଓ ଖଣି କାର୍ଯ୍ୟକଳାପକୁ ନେଇ ଅଗ୍ରଗତି ଉପରେ ଗୁରୁତ୍ୱ ଦିଆଯାଇଛି। କାଟାମାର୍କାରେ KABILର ପ୍ରଥମ ଲିଥିୟମ୍ ଖଣି ପ୍ରକଳ୍ପର ଦ୍ୱିତୀୟ ପର୍ଯ୍ୟାୟ ଡ୍ରିଲିଂ ଶେଷ ହୋଇଥିବା ବେଳେ ସାଲ୍ଟା ଓ ଜୁଜୁୟ ପ୍ରଦେଶରେ ମଧ୍ୟ ନୂଆ ସୁଯୋଗ ଖୋଜାଯାଉଛି।
କୃଷି କ୍ଷେତ୍ରରେ ଭାରତୀୟ ଉତ୍ପାଦ ପାଇଁ ଆର୍ଜେଣ୍ଟିନାର ବଜାର ପ୍ରବେଶକୁ ସହଜ କରିବା ନେଇ ମଧ୍ୟ ଆଲୋଚନା ହୋଇଛି। ପିଆଜ, କ୍ଷୀର ଓ ଦୁଗ୍ଧଜାତ ଦ୍ରବ୍ୟ, ଅଙ୍ଗୁର, ଆଳୁ, କଦଳୀ ଓ ଡାଲି ଭଳି ଭାରତୀୟ କୃଷିଜାତ ଉତ୍ପାଦ ପାଇଁ ସାନିଟାରୀ ଓ ଫାଇଟୋସାନିଟାରୀ ମାନଦଣ୍ଡ ନେଇ ବୈଷୟିକ ଆଲୋଚନା ଆଗେଇ ଚାଲିଛି।
ଔଷଧ କ୍ଷେତ୍ରରେ ମଧ୍ୟ ଭାରତ ପାଇଁ ବଡ଼ ସୁଯୋଗ ସୃଷ୍ଟି ହେବାର ଆଶା ରହିଛି। ଆର୍ଜେଣ୍ଟିନା ଭାରତର ଫାର୍ମାସ୍ୟୁଟିକାଲ୍ ନିୟାମକ ସ୍ଥିତିକୁ Annex IIରୁ Annex Iକୁ ଉନ୍ନୀତ କରିବା ଏବଂ ବଜାର ପ୍ରବେଶରେ ଥିବା ବାଧା କମାଇବା ଦିଗରେ କାମ କରିବାକୁ ସହମତ ହୋଇଛି। ଏହା ଭାରତୀୟ ଔଷଧ କମ୍ପାନୀଗୁଡ଼ିକ ପାଇଁ ନୂଆ ବଜାର ସୁଯୋଗ ଖୋଲିପାରେ।
ଏହା ସହିତ 5G, କୃତ୍ରିମ ବୁଦ୍ଧିମତ୍ତା, ଡିଜିଟାଲ୍ ଭିତ୍ତିଭୂମି, ଟେଲିକମ୍, ମହାକାଶ ଓ ବିମାନ ଚଳାଚଳ ଭଳି ଉଦୀୟମାନ କ୍ଷେତ୍ରରେ ସହଯୋଗ ବଢ଼ାଇବା ଉପରେ ଦୁଇ ଦେଶ ଗୁରୁତ୍ୱ ଦେଇଛନ୍ତି। India-MERCOSUR Preferential Trade Agreement ମାଧ୍ୟମରେ ବଜାର ପ୍ରବେଶ ବଢ଼ାଇବା ନେଇ ମଧ୍ୟ ଆଲୋଚନା ହୋଇଛି।
ଅଗଷ୍ଟ ୨୫ରେ ଅନୁଷ୍ଠିତ India-Argentina Business Forumରେ ୨୫ରୁ ଅଧିକ ଭାରତୀୟ ଶିଳ୍ପପତି ଓ ବ୍ୟବସାୟିକ ପ୍ରତିନିଧି ଯୋଗ ଦେଇଥିଲେ। କୃଷି, ଖଣିଜ, ଶକ୍ତି, ଔଷଧ, ସ୍ୱାସ୍ଥ୍ୟସେବା, ପର୍ଯ୍ୟଟନ, ବ୍ୟାଙ୍କିଂ ଓ ଟେଲିକମ୍ କ୍ଷେତ୍ରରେ ବାଣିଜ୍ୟ ଓ ନିବେଶର ନୂଆ ସୁଯୋଗ ନେଇ ଆଲୋଚନା ହୋଇଛି।
ଭାରତ-ଆର୍ଜେଣ୍ଟିନା ଆର୍ଥିକ ସମ୍ପର୍କରେ ଏହି ନୂଆ ପଦକ୍ଷେପ ଆଗାମୀ ଦିନରେ ଦ୍ୱିପାକ୍ଷିକ ବାଣିଜ୍ୟ, ନିବେଶ ଓ ପ୍ରଯୁକ୍ତି ସହଯୋଗକୁ ଆହୁରି ବ୍ୟାପକ କରିବ ବୋଲି ଆଶା କରାଯାଉଛି।
