ଭାରତର BRICS ୨୦୨୬ ଅଧ୍ୟକ୍ଷତା ଅଧୀନରେ କେନ୍ଦ୍ର ଶିକ୍ଷା ମନ୍ତ୍ରଣାଳୟ ପକ୍ଷରୁ ଅଗଷ୍ଟ ୫ରୁ ୭ ପର୍ଯ୍ୟନ୍ତ ଭୁବନେଶ୍ୱରରେ ୧୩ତମ BRICS ଶିକ୍ଷାମନ୍ତ୍ରୀ ସମ୍ମିଳନୀ ଏବଂ ୩ୟ BRICS ବରିଷ୍ଠ ଅଧିକାରୀ ବୈଠକ ଆୟୋଜନ କରାଯାଉଛି।
ଏହି ସମ୍ମିଳନୀରେ କେନ୍ଦ୍ର ଶିକ୍ଷାମନ୍ତ୍ରୀ ପ୍ରହ୍ଲାଦ ଯୋଶୀ ଯୋଗଦେବେ। BRICS ସଦସ୍ୟ ଦେଶଗୁଡ଼ିକର ଶିକ୍ଷାମନ୍ତ୍ରୀ, ବରିଷ୍ଠ ଅଧିକାରୀ ଏବଂ ପ୍ରତିନିଧିମାନେ ଏହି ତିନି ଦିନିଆ ବୈଠକରେ ଅଂଶଗ୍ରହଣ କରି ଶିକ୍ଷା ଓ ଦକ୍ଷତା ବିକାଶ କ୍ଷେତ୍ରରେ ସହଯୋଗ ବୃଦ୍ଧି ଉପରେ ଆଲୋଚନା କରିବେ।
ଏଥର ଭାରତର BRICS ଅଧ୍ୟକ୍ଷତାର ଥିମ୍ ରହିଛି “Building for Resilience, Innovation, Cooperation and Sustainability”। ୨୦୨୫ ରିଓ ଡି ଜେନେରିଓ BRICS ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଇଥିବା ‘ଜନକୈନ୍ଦ୍ରିକ ଏବଂ ମାନବତା ପ୍ରଥମ’ ଦୃଷ୍ଟିକୋଣକୁ ଏହି ଥିମ୍ ପ୍ରତିଫଳିତ କରୁଛି।
ଏହି ୫ଟି ପ୍ରସଙ୍ଗ ଉପରେ ହେବ ମୁଖ୍ୟ ଆଲୋଚନା
- ପ୍ରାରମ୍ଭିକ ଶିଶୁ ଯତ୍ନ ଓ ଶିକ୍ଷା (ECCE)କୁ ସୁଦୃଢ଼ କରିବା।
- BRICS TVET ସହଯୋଗ ମଞ୍ଚ ମାଧ୍ୟମରେ ଦକ୍ଷତା ବିକାଶକୁ ବଢ଼ାଇବା।
- ଗବେଷଣା, ନବସୃଜନ ଏବଂ ଷ୍ଟାର୍ଟଅପ୍ କ୍ଷେତ୍ରରେ ସହଯୋଗ ବୃଦ୍ଧି।
- ଶିକ୍ଷାଗତ ଯୋଗ୍ୟତାର ପାରସ୍ପରିକ ସ୍ୱୀକୃତି (MRQ)କୁ ସୁଦୃଢ଼ କରିବା।
- ଶିକ୍ଷାନୁଷ୍ଠାନର ନେତୃତ୍ୱ କ୍ଷମତା ବିକାଶ।
ଭୁବନେଶ୍ୱରର ଏହି ବୈଠକ ପୂର୍ବରୁ BRICS ଶିକ୍ଷା ଟ୍ରାକ୍ ଅଧୀନରେ ଅନେକ ବୈଠକ ହୋଇସାରିଛି। ଏପ୍ରିଲ ୭ ଓ ୨୮ରେ ପ୍ରଥମ ଓ ଦ୍ୱିତୀୟ ବରିଷ୍ଠ ଅଧିକାରୀ ବୈଠକ ହୋଇଥିଲା। ଜୁଲାଇ ୨୦-୨୧ରେ BRICS ନେଟୱର୍କ ୟୁନିଭର୍ସିଟି ସମ୍ମିଳନୀ ଓ ଆନ୍ତର୍ଜାତୀୟ ପରିଚାଳନା ବୋର୍ଡ ବୈଠକ ମଧ୍ୟ ଆୟୋଜିତ ହୋଇଥିଲା।
ସେହିପରି, ଅଗଷ୍ଟ ୩ ଓ ୪ରେ ନୂଆଦିଲ୍ଲୀରେ BRICS TVET ସିମ୍ପୋଜିୟମ୍ ଏବଂ BRICS TVET ସହଯୋଗ ମଞ୍ଚର ଯୁକ୍ତ ପରିଚାଳନା କମିଟି ବୈଠକ ଅନୁଷ୍ଠିତ ହୋଇଥିଲା। ଏହାକୁ କେନ୍ଦ୍ର ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରଣାଳୟ ଆୟୋଜନ କରିଥିଲା।
ଏଥିସହ ଯୁବପିଢ଼ିଙ୍କ ଅଂଶଗ୍ରହଣ ବଢ଼ାଇବା ପାଇଁ ‘ମଡେଲ୍ BRICS’ ନାମକ ଏକ ଛାତ୍ରକୈନ୍ଦ୍ରିକ କାର୍ଯ୍ୟକ୍ରମ ମଧ୍ୟ ଆରମ୍ଭ କରାଯାଇଛି। ଏହା ମାଧ୍ୟମରେ ଛାତ୍ରଛାତ୍ରୀମାନଙ୍କୁ BRICSର କାର୍ଯ୍ୟପ୍ରଣାଳୀ, କୂଟନୀତି, ବହୁପକ୍ଷୀୟ ସହଯୋଗ ଓ ସର୍ବସମ୍ମତି ଭିତ୍ତିକ ନିଷ୍ପତ୍ତି ପ୍ରକ୍ରିୟା ସହ ପରିଚିତ କରାଯିବ।
ଏହି ୧୩ତମ BRICS ଶିକ୍ଷାମନ୍ତ୍ରୀ ସମ୍ମିଳନୀରେ ଆସନ୍ତା ବର୍ଷ ପାଇଁ BRICS ଦେଶମାନଙ୍କ ମଧ୍ୟରେ ଶିକ୍ଷା କ୍ଷେତ୍ରର ସହଯୋଗର ରୋଡମ୍ୟାପ୍ ପ୍ରସ୍ତୁତ ହେବ ବୋଲି ଆଶା କରାଯାଉଛି।
