ପଶ୍ଚିମବଙ୍ଗ ସରକାର ସୋମବାର ନିଜ ବଜେଟ୍ ଘୋଷଣା କରି ବହୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ସରକାରୀ କର୍ମଚାରୀଙ୍କ ମହଙ୍ଗା ଭତ୍ତା (DA)ରେ ୨୦ ପ୍ରତିଶତ ବୃଦ୍ଧି କରାଯାଇଛି। ଏହି ଘୋଷଣା ରାଜ୍ୟର ଅର୍ଥମନ୍ତ୍ରୀ ସ୍ୱପନ ଦାସଗୁପ୍ତା ବଜେଟ୍ ଉପସ୍ଥାପନ ବେଳେ କରିଥିଲେ।
ଏହି ବୃଦ୍ଧି ପରେ ସରକାରୀ କର୍ମଚାରୀଙ୍କ ମୋଟ DA ୩୮ ପ୍ରତିଶତକୁ ବୃଦ୍ଧି ପାଇବ। ସରକାର ସ୍ପଷ୍ଟ କରିଛନ୍ତି ଯେ ନୂଆ DA ଅକ୍ଟୋବର ୧, ୨୦୨୬ ଠାରୁ ଲାଗୁ ହେବ।
ଏହା ଶୁଭେନ୍ଦୁ ଅଧିକାରୀ ସରକାରଙ୍କ ପ୍ରଥମ ବଜେଟ୍ ହୋଇଥିବାରୁ ଏହା ଉପରେ ସମସ୍ତଙ୍କ ନଜର ଥିଲା। ବଜେଟ୍ରେ ଛାତ୍ରୀମାନଙ୍କ ପାଇଁ ମଧ୍ୟ ଏକ ବଡ଼ ଘୋଷଣା କରାଯାଇଛି।
ରାଜ୍ୟ ସରକାରୀ ଓ ସରକାରୀ ସହାୟତାପ୍ରାପ୍ତ ସ୍କୁଲରେ ପଢ଼ୁଥିବା ଛାତ୍ରୀମାନଙ୍କୁ ୫୦ ହଜାର ଟଙ୍କାର ସ୍କଲାରସିପ୍ ଦିଆଯିବ। ଏହି ଯୋଜନାର ଲକ୍ଷ୍ୟ ହେଉଛି ଝିଅମାନଙ୍କ ଉଚ୍ଚଶିକ୍ଷାକୁ ପ୍ରୋତ୍ସାହନ ଦେବା ଓ ଆର୍ଥିକ ସହାୟତା ଯୋଗାଇବା।
ରୋଜଗାର କ୍ଷେତ୍ରରେ ମଧ୍ୟ ସରକାର ବଡ଼ ପଦକ୍ଷେପ ନେଇଛନ୍ତି। ବିଭିନ୍ନ ସରକାରୀ ବିଭାଗରେ ଖାଲି ପଡ଼ିଥିବା ପଦବୀରେ ୧ ଲକ୍ଷ ନୂଆ ନିଯୁକ୍ତି କରାଯିବ ବୋଲି ଘୋଷଣା କରାଯାଇଛି।
ମହିଳାମାନଙ୍କୁ ଅଧିକ ଚାକିରି ସୁଯୋଗ ଦେବା ପାଇଁ ସମସ୍ତ ଖାଲି ପଦବୀ ମଧ୍ୟରୁ ୩୩ ପ୍ରତିଶତ ଆସନ ମହିଳା ପ୍ରାର୍ଥୀଙ୍କ ପାଇଁ ସଂରକ୍ଷିତ ରହିବ। ଏହାଦ୍ୱାରା ସରକାରୀ ଚାକିରିରେ ମହିଳାଙ୍କ ଅଂଶଗ୍ରହଣ ବଢ଼ିବ ବୋଲି ସରକାର ଆଶା ପ୍ରକାଶ କରିଛନ୍ତି।
ଏହାଛଡ଼ା ଆଇନ ଶୃଙ୍ଖଳାକୁ ଆହୁରି ମଜବୁତ କରିବା ପାଇଁ ରାଜ୍ୟ ପୋଲିସ ବିଭାଗରେ ୨୦ ହଜାର ନୂଆ ନିଯୁକ୍ତି କରାଯିବ ବୋଲି ମଧ୍ୟ ବଜେଟ୍ରେ ଘୋଷଣା କରାଯାଇଛି।
ସରକାରଙ୍କ ମତରେ, ଏହି ସବୁ ପଦକ୍ଷେପ ରାଜ୍ୟରେ ରୋଜଗାର ସୁଯୋଗ ବଢ଼ାଇବା ସହ ଶିକ୍ଷା, ମହିଳା ସଶକ୍ତିକରଣ ଓ ପ୍ରଶାସନିକ ବ୍ୟବସ୍ଥାକୁ ଅଧିକ ମଜବୁତ କରିବ।
