ନାଇଜେରିଆର ଲାଗୋସ୍ରେ ଅନୁଷ୍ଠିତ କମନୱେଲଥ ପାରା ଫେନ୍ସିଂ ଚାମ୍ପିଅନଶିପ୍ରେ ଓଡ଼ିଶାର ପୁରୁଷ ପାରା ଫେନ୍ସରମାନେ ଚମତ୍କାର ପ୍ରଦର୍ଶନ କରି ୨ଟି ସ୍ୱର୍ଣ୍ଣ, ୧ଟି ରୌପ୍ୟ ଓ ୨ଟି କାଂସ୍ୟ ପଦକ ଜିତିଛନ୍ତି।
ପୁରୁଷ ଫଏଲ୍ କାଟାଗୋରୀ A
ଭି. ରମେଶ ରାଓ ପୁରୁଷ ଫଏଲ୍ କାଟାଗୋରୀ Aରେ ସ୍ୱର୍ଣ୍ଣ ପଦକ ଜିତିଛନ୍ତି। ପୁଲ୍ ପର୍ଯ୍ୟାୟରେ ପ୍ରଥମ ସ୍ଥାନରେ ରହି ସେ କ୍ୱାର୍ଟର ଫାଇନାଲ୍ରେ ପହଞ୍ଚିଥିଲେ। ସେଠାରେ ସେ ODUNEYE Opeoluwaଙ୍କୁ 15-2ରେ ପରାସ୍ତ କରିଥିଲେ। ସେମିଫାଇନାଲ୍ରେ ଓଡ଼ିଶାର ଅନ୍ୟତମ ଖେଳାଳି ପବିତ୍ର ସାହୁଙ୍କୁ 15-12ରେ ପରାସ୍ତ କରି ଫାଇନାଲ୍ରେ ପ୍ରବେଶ କରିଥିଲେ। ଫାଇନାଲ୍ରେ ପିଙ୍କୁଙ୍କୁ 15-10ରେ ପରାସ୍ତ କରି ରମେଶ ସ୍ୱର୍ଣ୍ଣ ପଦକ ହାସଲ କରିଥିଲେ।
ରାଖାଲ କୁମାର ସେଠୀ ମଧ୍ୟ ଭଲ ପ୍ରଦର୍ଶନ କରିଥିଲେ। ପୁଲ୍ ପର୍ଯ୍ୟାୟରୁ ଆଗକୁ ବଢ଼ି କ୍ୱାର୍ଟର ଫାଇନାଲ୍ରେ PARVEENଙ୍କୁ 15-10ରେ ପରାସ୍ତ କରି ସେମିଫାଇନାଲ୍ରେ ପହଞ୍ଚିଥିଲେ। ସେମିଫାଇନାଲ୍ରେ ପିଙ୍କୁଙ୍କଠାରୁ 15-13ରେ ପରାଜିତ ହୋଇ କାଂସ୍ୟ ପଦକ ଜିତିଥିଲେ।
ପବିତ୍ର ସାହୁ ମଧ୍ୟ ଚମତ୍କାର ପ୍ରଦର୍ଶନ କରିଥିଲେ। ପୁଲ୍ ପର୍ଯ୍ୟାୟରୁ ଆଗକୁ ବଢ଼ି କ୍ୱାର୍ଟର ଫାଇନାଲ୍ରେ Sandeepଙ୍କୁ 15-9 ପରାସ୍ତ କରିଥିଲେ। ସେମିଫାଇନାଲ୍ରେ ଭି. ରମେଶ ରାଓଙ୍କଠାରୁ 15-12ରେ ପରାଜିତ ହୋଇ ସେ କାଂସ୍ୟ ପଦକ ହାସଲ କରିଥିଲେ।
ପୁରୁଷ ଫଏଲ୍ କାଟାଗୋରୀ B
ଓମ୍ ପ୍ରକାଶ ବେହେରା ପୁରୁଷ ଫଏଲ୍ କାଟାଗୋରୀ Bରେ ସ୍ୱର୍ଣ୍ଣ ପଦକ ଜିତିଛନ୍ତି। ପୁଲ୍ ପର୍ଯ୍ୟାୟରେ ପ୍ରଥମ ସ୍ଥାନ ହାସଲ କରି ସେ ସିଧାସଳଖ ସେମିଫାଇନାଲ୍ରେ ପ୍ରବେଶ କରିଥିଲେ। ସେଠାରେ OWOYELE Damilolaଙ୍କୁ 15-2ରେ ପରାସ୍ତ କରି ଫାଇନାଲ୍ରେ ପହଞ୍ଚିଥିଲେ। ଫାଇନାଲ୍ରେ ଓଡ଼ିଶାର ରୁଦ୍ରନାରାୟଣ ବେହେରାଙ୍କୁ 15-5ରେ ପରାସ୍ତ କରି ସ୍ୱର୍ଣ୍ଣ ପଦକ ହାସଲ କରିଥିଲେ।
ରୁଦ୍ରନାରାୟଣ ବେହେରା ପୁଲ୍ ପର୍ଯ୍ୟାୟ ପରେ ସିଧାସଳଖ ସେମିଫାଇନାଲ୍ରେ ପ୍ରବେଶ କରି AJANI Idowuଙ୍କୁ 15-3ରେ ପରାସ୍ତ କରିଥିଲେ। ଫାଇନାଲ୍ରେ ଓମ୍ ପ୍ରକାଶ ବେହେରାଙ୍କଠାରୁ 15-5ରେ ପରାଜିତ ହୋଇ ସେ ରୌପ୍ୟ ପଦକ ଜିତିଥିଲେ।
ଓଡ଼ିଶାର ପାରା ଫେନ୍ସରମାନଙ୍କ ଏହି ଉଲ୍ଲେଖନୀୟ ପ୍ରଦର୍ଶନ ରାଜ୍ୟର ପାରା ଫେନ୍ସିଂର ବଢ଼ୁଥିବା ଶକ୍ତିକୁ ପ୍ରମାଣିତ କରିଛି ଏବଂ ନାଇଜେରିଆରେ ଭାରତର ଅଭିଯାନକୁ ଆହୁରି ଗୌରବମୟ କରିଛି।
